ខេត្តកំពង់ឆ្នាំង ៖ បុរសម្នាក់បានរងរបួសធ្ងន់ ខណៈជិះម៉ូតូបុកជាមួយនឹងរថយន្តបានកើតឡើងកាលពីវេលាម៉ោង៣និង៣០នាទីរសៀលថ្ងៃទី១១ ខែឧសភា ឆ្នាំ ២០១៨ នៅលើកំណាត់ផ្លូវជាតិលេខ៥ ស្ថិតក្នុងភូមិក្រសាស់ថ្មី ឃុំឈូកស ស្រុកកំពង់ត្រឡាច ។
សមត្ថកិច្ចនគរបាលបានអោយដឹងថា បុរសរងគ្រោះឈ្មោះ លាស់ ញ៉ អាយុ៤៥ឆ្នាំ ជាខ្មែរ-អ៊ិស្លាម មានទីលំនៅក្នុងភូមិ-ឃុំកើតហេតុខាងលើ ។ មុនពេលកើតហេតុ គេបានឃើញបុរសរងគ្រោះខាងលើជិះម៉ូតូម៉ាកស៊ុយហ្ស៊ុយគី គ្មានស្លាកលេខមួយគ្រឿង ក្នុងទិសដៅពីត្បូងទៅជើង លុះមកដល់ចំណុចកើតហេតុក៏បានបត់ឆ្លងថ្នល់មកខាងឆ្វេងដៃ ហើយក៏បានបុកយ៉ាងពេញទំហឹងជាមួយរថយន្តមួយគ្រឿងទៀតម៉ាក ម៉ាស្តា ពណ៌ស ពាក់ផ្លាកលេខ រដ្ឋ ២-០២៦៣ បើកបរដោយបុរសមិនស្គាល់អត្តសញ្ញាណ ក្នុងទិសដៅពីជើងទៅត្បូង បណ្ដាលឱ្យម៉ូតូជាប់ក្រោមរថយន្ត ហើយអ្នកបើកបរម៉ូតូបានរងរបួសធ្ងន់ត្រូវបានដឹកទៅសង្គ្រោះនៅមន្ទីរពេទ្យខេត្តជាបន្ទាន់។
ក្រោយពេលកើតហេតុ សមត្ថកិច្ចនគរបាលបានធ្វើការវាស់វែង ហើយបានយករថយន្តនិងម៉ូតូទៅរក្សាទុក ដើម្បីរង់ចាំការដោះស្រាយតាមនីតិវិធី ៕
ចែករំលែកព័តមាននេះ