រាជធានីភ្នំពេញ ៖ ដើម្បីបម្រើតម្រូវការប្រើប្រាស់របស់អតិថិជនឲ្យបានគ្រប់គ្រាន់ រដ្ឋាករទឹកស្វយ័តក្រុងភ្នំពេញ គ្រោងផលិត និងផ្គត់ផ្គង់ទឹកស្អាតក្នុងឆ្នាំ២០១៨នេះ ចំនួនជាង២០០លានម៉ែត្រគូប ស្មើជាមធ្យមប្រមាណ៥៧២.៩៦២ម៉ែត្រគូបក្នុង១ថ្ងៃ មានកំណើនប្រមាណ៧% បើធៀបនឹងឆ្នាំ២០១៧…
រាជធានីភ្នំពេញ ៖ ដើម្បីបម្រើតម្រូវការប្រើប្រាស់របស់អតិថិជនឲ្យបានគ្រប់គ្រាន់ រដ្ឋាករទឹកស្វយ័តក្រុងភ្នំពេញ គ្រោងផលិត និងផ្គត់ផ្គង់ទឹកស្អាតក្នុងឆ្នាំ២០១៨នេះ ចំនួនជាង២០០លានម៉ែត្រគូប ស្មើជាមធ្យមប្រមាណ៥៧២.៩៦២ម៉ែត្រគូបក្នុង១ថ្ងៃ មានកំណើនប្រមាណ៧% បើធៀបនឹងឆ្នាំ២០១៧ ។
ការកំណត់ចំនួននេះ ក្នុងគោលបំណងធានាការផ្គត់ផ្គង់ទឹកស្អាតឲ្យបាន២៤ម៉ោងក្នុង១ថ្ងៃ, ៧ថ្ងៃក្នុង១សប្តាហ៍ (លើកលែងតែករណីដាច់ចរន្តអគ្គិសនី) សម្រាប់ចែកជូនប្រជាពលរដ្ឋទូទាំងរាជធានីភ្នំពេញ និងទីប្រជុំជនរបស់ខេត្តកណ្តាល ដែលជាប់នឹងរាជធានីភ្នំពេញ ក្នុងតម្លៃសមស្រប ។
យោងតាមរបាយការណ៍របស់រដ្ឋាករទឹកស្វយ័តក្រុងភ្នំពេញបានឲ្យដឹងថា ក្នុងឆ្នាំ២០១៨នេះ ដើម្បីធានាការផ្គត់ផ្គង់ទឹកស្អាតឲ្យស្របតាមតម្រូវការទីផ្សាររបស់ប្រជាពលរដ្ឋនៅតំបន់ សេវាមានស្រាប់ និងតំបន់សេវាថ្មី រដ្ឋាករទឹកក្រុងភ្នំពេញបានគ្រោងផលិត និងផ្គត់ផ្គង់ទឹកស្អាតប្រចាំឆ្នាំចំនួន២០៩.១៣៧.០២០ម៉ែត្រគូប ស្មើជាមធ្យមប្រមាណ៥៧២.៩៦២ម៉ែត្រគូបក្នុង១ថ្ងៃ ។ បរិមាណផលិតទឹកនៅឆ្នាំនេះ មានកំណើនប្រមាណ៧% ធៀបនឹងបរិមាណផលិតឆ្នាំ២០១៧ ។
របាយការណ៍បញ្ជាក់ថា ៖« ផែនការផលិតទឹកស្អាតក្នុងឆ្នាំ២០១៨ មានអត្រា៩៧,១១% ធៀបនឹងសមត្ថភាពផលិតទឹកសរុប ។ អត្រានេះ យើងឃើញថា រោងចក្រទាំង៤ បានខិតខំផលិតអស់ពីសមត្ថភាព ដើម្បីបម្រើប្រជាពលរដ្ឋប្រើប្រាស់ក្នុងជីវភាពប្រចាំថ្ងៃ » ។
លោក សឹម ណារ៉ា ប្រធានក្រុមប្រឹក្សាភិបាលនៃរដ្ឋាករទឹកស្វយ័តក្រុងភ្នំពេញ បានលើកឡើងក្នុងមហាសន្និបាតភាគហ៊ុនិកលើកទី៦ របស់រដ្ឋាករទឹកស្វយ័តក្រុងភ្នំពេញ នាព្រឹកថ្ងៃទី៩ ឧសភា នៅទីស្តីការរដ្ឋាករទឹកក្រុងភ្នំពេញថា ៖« ក្នុងឆ្នាំ២០១៧ រដ្ឋាករទឹកបានផលិតទឹកជាង១៩៤លានម៉ែត្រគូប និងបានតបណ្តាញទឹកថ្មីជាង១៩៥គីឡូម៉ែត្រ, តបណ្តាញចូលតាមផ្ទះថ្មី២២.៤៥៣បណ្តាញ ក្នុងនោះតជូនអតិថិជនមានចំណូលទាបបានចំនួន៥៤២គ្រួសារ » ។
លោកបន្ថែមថា ក្រោយពីបើកកិច្ចប្រជុំរបស់ក្រុមប្រឹក្សាភិបាលរដ្ឋាករទឹកស្វយ័តក្រុងភ្នំពេញកាលពីពេលថ្មីៗនេះ រដ្ឋាករទឹកស្វយ័តក្រុងភ្នំពេញ បានឯកភាពរក្សាទុកប្រាក់ចំណេញជាង១៦ពាន់លានរៀលសម្រាប់ការវិនិយោគនៅពេលអនាគត ។ សម្រាប់ទឹកប្រាក់នៅសល់ជាង១៣ពាន់លានរៀល គឺបែងចែកភាពលាភទៅឲ្យភាគហ៊ុនិក ។ ប្រាក់ចំណេញនេះ បើធៀបនឹងឆ្នាំ២០១៦ គឺថយចុះ ។
នៅក្នុងសន្និបាតនេះដែរ លោក សឹម ណារ៉ា បានស្នើសុំទៅក្រសួងសាធារណការ និងដឹកជញ្ជូន ជីកប្រឡាយឲ្យរដ្ឋាករទឹកស្វយ័ត និងដាក់បំពង់ទឹកស្អាតសម្រាប់ឲ្យប្រជាពលរដ្ឋប្រើប្រាស់តាមតម្រូវការឲ្យបានគ្រប់គ្រាន់ផងដែរ ។
លោកបញ្ជាក់ថា ៖« កាលណាជីកទៅ វាប៉ះផ្នែកក្រសួងស្ថាប័នពាក់ព័ន្ធ ដូចក្រសួងសាធារណការអីចឹង សូមស្នើឲ្យគាត់ចូលរួមសហការក្នុងការជីកផ្លូវដើម្បីដាក់បំពង់ថ្មី និងសូមអំពាវនាវដល់ប្រជាពលរដ្ឋឲ្យមានការយោគយល់ បើសិនជាធ្វើការជីកប្រឡាយដាក់បំពង់ទឹកស្អាតនេះរំខាន និងប៉ះពាល់ដោយប្រការណាមួយ ហើយក៏សូមឲ្យក្រសួងពាក់ព័ន្ធចូលរួមសហការគ្នា ដើម្បីសម្រួលប្រព័ន្ធប្រឡាយទឹកស្អាតជូនដល់ប្រជាពលរដ្ឋប្រើប្រាស់បានឆាប់រហ័សផងដែរ » ៕
ចែករំលែកព័តមាននេះ