រាជធានីភ្នំពេញ ៖ ធនាគារពិភពលោកបាននិយាយនៅក្នុងរបាយការណ៍ថ្មីមួយដែលចេញផ្សាយកាលពីថ្ងៃទី១០ ឧសភា ម្សិលមិញ ថា កំណើនសេដ្ឋកិច្ចរបស់កម្ពុជានៅតែបន្តរក្សាភាពស្វាហាប់ ហើយត្រូវបានព្យាករទុកថា នឹងកើនល្បឿនបន្តិចរហូតដល់ទៅ៦,៩%ក្នុងឆ្នាំ២០១៨ ដោយសារតែការស្ទុះឡើងវិញក្នុងវិស័យនាំចេញវាយនភ័ណ្ឌ…
រាជធានីភ្នំពេញ ៖ ធនាគារពិភពលោកបាននិយាយនៅក្នុងរបាយការណ៍ថ្មីមួយដែលចេញផ្សាយកាលពីថ្ងៃទី១០ ឧសភា ម្សិលមិញ ថា កំណើនសេដ្ឋកិច្ចរបស់កម្ពុជានៅតែបន្តរក្សាភាពស្វាហាប់ ហើយត្រូវបានព្យាករទុកថា នឹងកើនល្បឿនបន្តិចរហូតដល់ទៅ៦,៩%ក្នុងឆ្នាំ២០១៨ ដោយសារតែការស្ទុះឡើងវិញក្នុងវិស័យនាំចេញវាយនភ័ណ្ឌ និងសម្លៀកបំពាក់ អមដោយការងើបឡើងរបស់វិស័យទេសចរណ៍ និងកសិកម្មផងដែរ ។ នេះបើយោងតាមសេចក្ដីប្រកាសព័ត៌មានពីធនាគារមួយនេះ ។
យោងតាមរបាយការណ៍បច្ចុប្បន្នភាពសេដ្ឋកិច្ចកម្ពុជា (Cambodia Economic Update) ដែលត្រូវបានប្រកាសថា ការចំណាយកាន់តែច្រើនឡើងរបស់រាជរដ្ឋាភិបាល និងលក្ខខណ្ឌសេដ្ឋកិច្ចពិភពលោកមានអំណោយផល ក្នុងនោះរួមមាន តម្រូវការយ៉ាងស្វាហាប់នៅក្នុងបណ្តាសេដ្ឋកិច្ចប្រទេសជឿនលឿនផង សុទ្ធតែជាកត្តាដែលត្រូវបានគេរំពឹងទុកថា ជាមូលដ្ឋានទ្រទ្រង់ធ្វើឱ្យកម្ពុជាបន្តទទួលបានកំណើនសេដ្ឋកិច្ចខ្ពស់ ។
ប៉ុន្តែទោះយ៉ាងណាក៏ដោយ ហានិភ័យនៅតែបន្តមាន ហើយក្នុងនោះរួមមាន ការបាត់បង់បន្តិចម្តងៗនូវភាពប្រកួតប្រជែងក្នុងការនាំចេញ ដោយសារតែការកើនឡើងយ៉ាងរហ័សនូវបៀវត្សរ៍របស់កម្មករ, ពូនគរនៃភាពងាយរងគ្រោះដែលមានជាយូរមកហើយនៅក្នុងកំណើននៃវិស័យអចលនទ្រព្យ និងសំណង់, ភាពមិនច្បាស់លាស់ដែលអាចកើតមានជុំវិញការបោះឆ្នោត, ភាពរញ្ជួយម្តងម្កាលបណ្តាលមកពីការគាំពារនិយម និងភាពតានតឹងខ្លាំងឡើងនៅក្នុងវិវាទពាណិជ្ជកម្មរវាងប្រទេសដែលមានជំនួញធំៗក្នុងពិភពលោក ។
លោកស្រី អុិនហ្គូណា ដូប្រាចា នាយិកាគ្រប់គ្រងធនាគារពិភពលោកសម្រាប់ប្រទេសកម្ពុជា មានប្រសាសន៍ថា ៖« ដើម្បីរក្សាឱ្យបានកំណើនសេដ្ឋកិច្ចរឹងមាំ ប្រទេសកម្ពុជាសំខាន់ណាស់ ត្រូវវិនិយោគថែមទៀតទៅលើវិស័យអប់រំ និងបណ្តុះបណ្តាលជំនាញ ហើយស្របពេលគ្នានោះដែរ ត្រូវប្រឹងរកដំណោះស្រាយដល់ឧបសគ្គនានាដែលធុរកិច្ចធុនតូច និងមធ្យមកំពុងជួបប្រទះ ។ ការវិនិយោគទៅលើមនុស្សជាជម្រើសដ៏ប្រសើរបំផុតសម្រាប់ឈានទៅកាន់អនាគតមួយកាន់តែចម្រុងចម្រើន » ។
របាយការណ៍នេះបានកត់សម្គាល់ថា ប្រទេសកម្ពុជាអាចធ្វើឱ្យកំណើនសេដ្ឋកិច្ចកាន់តែមានចម្រុះភាពជាងមុន និងបង្កើតការងារបានកាន់តែច្រើនថែមទៀត តាមរយៈការកាត់បន្ថយចំណាយរបស់ក្រុមហ៊ុនទៅលើដំណើរការបំពេញបែបបទបង្កើតក្រុមហ៊ុន ទៅលើផ្នែកប្រតិបត្តិការ និងការធ្វើហិរញ្ញប្បទាន ។ របាយការណ៍នេះក៏បានផ្តល់ផងដែរនូវអនុសាសន៍ឱ្យប្រទេសកម្ពុជាតាមឃ្លាំមើលឱ្យបានដិតដល់ទៅលើដំណើរស្ទុះឡើងនៅក្នុងវិស័យសំណង់ និងអចលនទ្រព្យ ដោយរៀបចំឱ្យមានគោលនយោបាយប្រុងប្រយ័ត្នជាលក្ខណៈម៉ាក្រូ ដែលនឹងជួយបន្ថយវិសាលភាពរបស់សកម្មភាពកេងយកចំណេញនៅក្នុងវិស័យទាំងនេះ ។
ការមកដល់របស់ភ្ញៀវទេសចរបានកើនដល់ទៅ១១,៨%នៅក្នុងឆ្នាំ២០១៧ ធៀបនឹងកំណើន៥%នៅក្នុងឆ្នាំ២០១៦ ដោយសារលទ្ធផលនៃកិច្ចខិតខំរបស់អាជ្ញាធររដ្ឋាភិបាលក្នុងការធ្វើឱ្យមានការហោះហើរកាន់តែច្រើនមកពីក្នុងតំបន់ រួមទាំងពីប្រទេសចិនផង ដែលជាទីផ្សារសំខាន់មួយសម្រាប់វិស័យទេសចរណ៍ ។ វិស័យកសិកម្មក៏មានការស្ទុះឡើងដែរ ជាមួយនឹងការពង្រីកផ្ទៃដីធ្វើស្រូវនិងចម្ការកៅស៊ូ និងការងើបឡើងវិញបន្តិចម្តងៗរបស់តម្លៃកសិផល ។
គួរបញ្ជាក់ថា របាយការណ៍បច្ចុប្បន្នភាពសេដ្ឋកិច្ចកម្ពុជា ជារបាយការណ៍ដែលត្រូវបានរៀបចំឡើង២ដងក្នុង១ឆ្នាំ សម្រាប់ផ្តល់ព័ត៌មានថ្មីៗបំផុតអំពីការវិវត្តស្ថានភាពម៉ាក្រូសេដ្ឋកិច្ចរបស់កម្ពុជា ទាំងក្នុងរយៈពេលខ្លី និងរយៈពេលមធ្យម ៕
ចែករំលែកព័តមាននេះ