រាជធានីភ្នំពេញ ៖ ម៉ូតូម៉ាកហុងដា Beat មួយគ្រឿង បើកបរដោយបុរស២នាក់ ក្នុងស្ថានភាពស្រវឹង បោះពួយលឿនដូចហោះ ជ្រុលបុករ៉ឺម៉កម៉ូតូពេញទំហឹងបណ្តាលឲ្យរ៉ឺម៉កម៉ូតូក្រឡាប់ផ្ងារជើង ធ្វើឲ្យអ្នកជិះម៉ូតូរងរបួសធ្ងន់ម្នាក់និងស្រាលម្នាក់…
រាជធានីភ្នំពេញ ៖ ម៉ូតូម៉ាកហុងដា Beat មួយគ្រឿង បើកបរដោយបុរស២នាក់ ក្នុងស្ថានភាពស្រវឹង បោះពួយលឿនដូចហោះ ជ្រុលបុករ៉ឺម៉កម៉ូតូពេញទំហឹងបណ្តាលឲ្យរ៉ឺម៉កម៉ូតូក្រឡាប់ផ្ងារជើង ធ្វើឲ្យអ្នកជិះម៉ូតូរងរបួសធ្ងន់ម្នាក់និងស្រាលម្នាក់ ហេតុការណ៍នេះបានកើតឡើងកាលពីវេលាម៉ោង៩និង៤០នាទីយប់ ថ្ងៃទី១០ ខែឧសភា ឆ្នាំ២០១៨ នៅផ្លូវ១៤៣ កែងនិងផ្លូវ៣២០ សង្កាត់បឹងកេងកង៣ ខណ្ឌចំការមន។
តាមប្រភពព័ត៌មានពីកន្លែងកើតហេតុបានប្រាប់ឱ្យដឹងថា មុនកើតហេតុ គេឃើញម៉ូតូមួយគ្រឿងម៉ាកហុងដា beat ពណ៌ខ្មៅ បើកបរដោយបុរស២នាក់ក្នុងស្ថានភាពស្រវឹង ហើយបើកក្នុងល្បឿនយ៉ាងលឿនតាមបណ្តោយផ្លូវ៣២០ ក្នុងទិសដៅពីកើតទៅលិច លុះមកដល់ចំណុចកើតហេតុ មានរ៉ឺម៉កម៉ូតូមួយគ្រឿងធ្វើដំណើរតាមបណ្តោយផ្លូវ១៤៣ ក្នុងទិសដៅពីជើងទៅត្បូងឆ្លងផ្លូវ៣២០ ក៏ត្រូវម៉ូតូបុកចំពាក់កណ្តាលរ៉ឺម៉កម៉ូតូពេញទំហឹង បណ្តាលអោយរ៉ឺម៉កម៉ូតូក្រឡាប់ផ្ងារជើង ចំណែកម៉ូតូខូចខាតមួយកំណាត់ខាងមុខ រីឯអ្នកបើកម៉ូតូរងរបួសធ្ងន់ រីឯអ្នកជិះពីក្រោយរងរបួសស្រាល ចំណែកអ្នកបើករ៉ឺម៉កម៉ូតូពុំមានរងរបួសអ្វីទេ។
តាមសម្តីអ្នកបើករ៉ឺម៉កម៉ូតូបានឱ្យដឹងថា មុនកើតហេតុគាត់បានបើករ៉ឺម៉កម៉ូតូតែម្នាក់ឯងតាមផ្លូវ១៤៣ ក្នុងទិសដៅពីជើងទៅត្បូង ក្នុងល្បឿនមធ្យម ឆ្លងផ្លូវ៣២០ ស្រាប់តែមានម៉ូតូមួយគ្រឿង ជិះដោយបុរស២នាក់ ហើយបើកក្នុងល្បឿនលឿនបានបុកចំពាក់កណ្តាលរ៉ឺម៉កម៉ូតូធ្វើអោយក្រឡាប់ផ្ងារជើង ។
ក្រោយពេលកើតហេតុ ជនរងគ្រោះទាំងពីរនាក់ត្រូវបានរថយន្តសង្គ្រោះដឹកទៅសង្គ្រោះនៅមន្ទីរពេទ្យភ្លាមៗដែរ ចំណែកម៉ូតូ និងរ៉ឺម៉កម៉ូតូ ត្រូវបានកម្លាំងសមត្ថកិច្ចជំនាញចរាចរណ៌ធ្វើការវាស់វែងយកទៅរក្សាទុកនៅការិយាល័យនគបាលចរាចរណ៌ជើងគោករង់ចាំដោះស្រាយ ពេលក្រោយ ៕
ចែករំលែកព័តមាននេះ