រាជធានីភ្នំពេញ ៖ ក្នុងរយៈពេលត្រីមាសទី១ ឆ្នាំ២០១៨នេះ នគរបាលចរាចរណ៍ផ្លូវគោកបានផាកពិន័យអ្នកល្មើសច្បាប់ចរាចរណ៍ផ្លូវគោកបានប្រាក់ចំនួន៦៥៨.៥១០.០០០រៀល ខណៈ គ្រោះថ្នាក់កើតឡើងចំនួន៨១៩លើក ស្លាប់៤៨០នាក់ និងរបួស១២៣៤នាក់ ។ នេះបើតាមរបាយការរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក ។
យោងតាមរបាយការណ៍ដដែលអានដោយលោកស្រីមឹន មាណវី រដ្ឋលេខាធិការក្រសួងសាធារណៈការដឹកជញ្ជូនក្នុងកិច្ចផ្សព្វផ្សាយ និងប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំខែមេសា ឆ្នាំ២០១៨នាព្រឹកថ្ងៃទី១០ ឧសភា ក្រោមអធិបតីភាពលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនបានឲ្យដឹងថា ក្រោមការអនុវត្តច្បាប់ចរាចរណ៍ផ្លូវគោកមន្ត្រីនគរបាលចរាចរណ៍ផ្លូវគោកបានត្រួតពិនិត្យយានយន្តក្នុងមួយត្រីមាស បានចំនួនសរុប៣៨០.៣៤២គ្រឿង រកឃើញយានយន្តល្មើសច្បាប់៥៤.៤៧៦គ្រឿងស្មើ១៤% បានធ្វើការអប់រំចំនួន២៧.៤៧៦គ្រឿង និងបានផាកពិន័យចំនួន ២៦.៦០២គ្រឿងស្មើ៤៩% ។
លោកស្រីបញ្ជាក់ថា ក្នុងត្រីមាសទី១ការបង់ប្រាក់ពិន័យតាមស្នាក់ការនគរបាលចរាចរណ៍ផ្លូវគោកបានទទួលប្រាក់ពីការពិន័យបានចំនួន ៦៥៨.៥១០.០០០ រៀល ។ ប្រភពក៏បានលើកឡើងថា ក្នុងមួយត្រីមាសបានត្រួតពិនិត្យរថយន្តបើកបរលើសល្បឿនចំនួន ២.៣៤០ គ្រឿង ដោយបានចាត់វិធានការតាមច្បាប់ ។ ត្រួតពិនិត្យជាតិស្រវឹងចំពោះអ្នកបើកបរចំនួន១៣.៨២៩នាក់ ក្នុងអ្នកបើកបររថយន្តចំនួន៥.០២០នាក់ និងអ្នកបើកបរម៉ូតូចំនួន ៨.៨០៩នាក់ និងអ្នកបើកបរស្ថិតក្នងស្ថានភាពស្រវឹងចំនួន៥០១នាក់ ស្មើ៣,៦% មកចាត់វិធានការតាមច្បាប់ ។
លោកស្រីបន្ថែមថា ក្នុងត្រីមាសនេះគ្រោះថ្នាក់ចរាចរណ៍បានកើតឡើងចំនួន៨១៩លើក បណ្តាលឲ្យស្លាប់ចំនួន៤៨០នាក់ និងរបួសចំនួន១.២៣៤នាក់ ភាគច្រើននៅរាជធានីភ្នំពេញមានអ្នកស្លាប់ចំនួន៤៩នាក់ ខេត្តកណ្តាលចំនួន៤៣នាក់ និងខេត្តកំពងធំ៤០នាក់ ។ ជនរងគ្រោះជាមធ្យមក្នុងមួយថ្ងៃស្លាប់ ៥.៣នាក់ និងរបួសចំនួន១៣.៧នាក់ ។
មូលហេតុមកពីការបើកបរលើសល្បឿនកំណត់៣៦% មិនគោរពច្បាប់ សិទ្ធិ១៩% មិនប្រកាន់ស្តាំ១៤% វ៉ាជែង១២% បត់៨% ស្រវឹង៦% កត្តាយានយន្ត ៥% និងងុយដេក១% ។ ចំនួនគ្រោះថ្នាក់អ្នកស្លាប់ និងរបួសបើព្រៀបធៀបក្នុងរយៈពេលមួយត្រីមាស ឆ្នាំ២០១៧ គ្រោះថ្នាក់ថយចំនួន១៧០លើកស្មើ១៧% ស្លាប់ថយ១២នាក់ ស្មើ២% និងរបួសថយចំនួន២៣៤នាក់ ស្មើ១៦% ។
លោកស្រីមឹនមាណវីក៏បានកត់សម្គាល់ក្នុងត្រីមាសទី១ រថយន្តដឹកកម្មករទទួលរងគ្រោះថ្នាក់ចរាចណ៍មានចំនួន០៣លើករបួសចំនួន១២៤នាក់ ស្លាប់១នាក់ របួសធ្ងន់១៧នាក់ របួសស្រាល១០៦នាក់ កើតឡើងនៅខេត្តតាកែវ កំពង់ស្ពឺ និងខេត្តព្រះសីហនុដែលបណ្តាលមកពីការវ៉ាជែងដោយប្រថុយប្រថាន និងលក្ខណៈបច្ចេកទេសយានយន្ត ។
ក្នុងចំណោមអ្នកស្លាប់ចំនួន៤៨០នាក់គាភច្រើនជាអ្នកជិះម៉ូតូមានចំនួន៣៦០នាក់ ស្មើ៧៥% (ប្រភេទ១២៥សេសេ ចុះក្រោម)ក្នុងនោះមិនពាក់មួកសុវត្ថិភាពមាមចំនួន២៦៣នាក់ ស្មើ៧៣% ។ ករណីគ្រោះថ្នាក់ត្រូវបានដោះស្រាយចប់ចំនួន៣១៨លើកបញ្ជូនទៅតុលាការ២៨៣ករណី កំពុងអង្កេត២៧៧ករណី និងបញ្ជូនជនល្មើសទៅតុលាការចំនួន៨៧នាក់ ៕
ចែករំលែកព័តមាននេះ