រាជធានីភ្នំពេញ ៖ ចាត់ទុកជាដំណឹងល្អមួយសម្រាប់កម្មករ-កម្មការិនីព្រោះនៅព្រឹកថ្ងៃទី១០ ខែឧសភា ឆ្នាំ២០១៨នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបញ្ជាទៅរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោក…
រាជធានីភ្នំពេញ ៖ ចាត់ទុកជាដំណឹងល្អមួយសម្រាប់កម្មករ-កម្មការិនីព្រោះនៅព្រឹកថ្ងៃទី១០ ខែឧសភា ឆ្នាំ២០១៨នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបញ្ជាទៅរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោក អ៊ិត សំហេង ជួបប្រជុំជាមួយនឹងម្ចាស់រោងចក្រ ដើម្បីធ្វើការងារលើបញ្ហានៃការអនុញ្ញាតិឲ្យកម្មករឈប់សម្រាកមានប្រាក់បៀរវត្សនៅដំណាក់កាលដែលភរិយាដែលជាកម្មការិនីសម្រាលកូនព្រោះវាជាផ្នែកមួយនៃគោលនយោបាយគាំពារសង្គម ។
ថ្លែងនៅចំពោះមុខកម្មករ-កម្មការិនីនៅឯកម្មវិធីពិធីជួបសំណេះសំណាលជាមួយកម្មករ-កម្មការិនីសរុបចំនួន១៩,៤៨៩នាក់ មកពីរោងចក្រចំនួន៣២នៃតំបន់សេដ្ឋកិច្ចពិសេសក្នុងក្រុងបាវិត ខេត្តស្វាយរៀងដែលពិធីនេះធ្វើឡើងនៅតំបន់សេដ្ឋកិច្ចពិសេស Interior Automobile Industry Complex សម្តេចនាយករដ្ឋមន្ត្រីបានឲ្យដឹងថា រាជរដ្ឋាភិបាលបាននឹងកំពុងពិចារណាថា តើអាចឲ្យកម្មករដែលជាប្តីកម្មការិនីបានឈប់សម្រាក់ដូចកម្មការិនីដែរ ឬយ៉ាងណា នៅពេលប្រពន្ធសម្រាលកូន ។
សម្តេចបានបញ្ជាក់ថា បញ្ហានៅត្រង់ថាយើងឲ្យប្រពន្ធឆ្លងទន្លេទទួលបាននូវការឈប់សម្រាក៣ខែជាមួយប្រាក់បៀរវត្ស១២០ភាគរយ ។ សម្តេចតេជោ ហ៊ុន សែនថ្លែងយ៉ាងដូច្នេះថា ៖ «ក៏ប៉ុន្តែបញ្ហាវាស្ថិតនៅត្រង់នេះទៀតត្រង់ថា នៅពេលប្រពន្ធឆ្លងទន្លេ តើប្តីទៅមើល ឬអត់? នែ! រឿងនៅកន្លែងនេះប្តីទៅមើលឬអត់ ? វាច្បាស់ជាទៅមើល ទោះបីយ៉ាងម៉េចក៏ដោយត្រូវសុំច្បាប់ទៅមើល ។ ចោលការងារក៏ចោល ប៉ុន្តែមិនអាចចោលប្រពន្ធ ចោលកូនបានទេ អញ្ចឹងទេ តើយើងគួរមានគោលនយោបាយចំពោះបុរសដែលជាប្តីរបស់កម្មការិនីគួរត្រូវបានឈប់សម្រាក៣ថ្ងៃ ឬមួយអាទិត្យ ដោយមានប្រាក់បៀរវត្សទេ ? ចំណុចនេះជាចំណុចដែលត្រូវការពិចារណ ដើម្បីយកមកគិត » ។
ចាប់ពីដើមឆ្នាំ២០១៨ រហូតមកដល់ពេលនេះមានកម្មការិនីចំនួនជិត២ម៉ឺននាក់បានសម្រាលកូន និងបានការឈប់សម្រាករយៈពេល៣ខែជាមួយនឹងប្រាក់ខែ១២០ភាគរយបូកនឹងប្រាក់ដែលរាជរដ្ឋាភិបាលផ្គត់ផ្គង់ជូនចំនួន៤០ម៉ឺនរៀល សម្រាប់ការសម្រាលបានកូនមួយ, ចំនួន៨០ម៉ឺនរៀលសម្រាប់កូនភ្លោះ២ ។
សម្តេចនាយករដ្ឋមន្ត្រីបានរម្លឹកដល់អតីតកាលដ៏ជូរចត់ដែលសម្តេចគ្មានសិទ្ធកុំដល់ថា កំដរភរិយាសម្រាលកូន សូម្បីតែសិទ្ធយកកូនដែលស្លាប់ក៏មិនមានផង ។ សម្តេចតេជោ ហ៊ុន សែនមានប្រសាសន៍ថា ៖ «ប៉ុន្តែបញ្ហាចំណោទរបស់យើងនៅត្រង់ថា ធម្មតាប្តី គឺត្រូវទៅកំដរប្រពន្ធ […] លើកលែងតែពូ ដែលករណីពិសេសកាលពីសម័យអតីតកាលឆ្នាំ៧៦ សូម្បីតែយកកូនខ្លួនឯងដែលស្លាប់ហើយទៅកប់ក៏គ្មានសិទ្ធដែរ ។
សិទ្ធរបស់យើងកាលពីអតីតកាល គឺអន់ជាងឆ្កែទៅទៀត ។ ឆ្កែវាមានសិទ្ធការពារកូនរបស់វា ប៉ុន្តែពូនៅពេលនោះគ្មានសិទ្ធយកកូនខ្លួនឯងទៅកប់ទេ ។ គេថា គេមានមនុស្សយកទៅកប់ហើយ» ។ កន្លងមកប្តីធ្វើការនៅរោងចក្រប្រពន្ធធ្វើការជាកម្មការិនីរោងចក្រ ដូច្នេះប្តីតែងតែឈប់សម្រាកទៅមើលប្រពន្ធតែត្រូវកាត់សងវិញពេលក្រោយ ៕
ចែករំលែកព័តមាននេះ