ខេត្តព្រះសីហនុ ៖ អង្គការទេសចរណ៍ពិភពលោក (UNWTO) បានឲ្យដឹងថា បច្ចុប្បន្ននេះ តំបន់ឆ្នេរ និងកោះបាននិងកំពុងក្លាយជាគោលដៅទេសចរណ៍ថ្មីរបស់ភ្ញៀវទេសចរមកកម្សាន្តកាន់តែច្រើនឡើងៗគួរឲ្យចាប់អារម្មណ៍ ។ ដោយមើលឃើញបែបនេះ ក្រសួងទេសចរណ៍បានដាក់ចេញនូវគោលការណ៍៣ចំណុចសំខាន់ៗ ដើម្បីគ្រប់គ្រង និងអភិវឌ្ឍន៍តំបន់ឆ្នេរឲ្យកាន់តែល្អប្រសើរ សម្រាប់ទាក់ទាញភ្ញៀវទេសចរមកទស្សនាបន្ថែមទៀត ។
ក្នុងសិក្ខាសាលាស្តីពី «វឌ្ឍនភាពនៃការអភិវឌ្ឍឆ្នេរសមុទ្រកម្ពុជា ក្នុងនាមជាសមាជិកក្លិបឆ្នេរសមុទ្រដែលស្អាតបំផុតលើពិភពលោក» កាលពីថ្ងៃទី៧ ឧសភា នៅសណ្ឋាគារឆ្នេរឯករាជ្យ លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងថា កម្ពុជាបានកំណត់ទិសដៅជាយុទ្ធសាស្ត្រ ក្នុងការអភិវឌ្ឍទេសចរណ៍តំបន់ឆ្នេរទាំង៤ រួមមាន ឆ្នេរខេត្តព្រះសីហនុ ឆ្នេរខេត្តកំពត ឆ្នេរខេត្តកែប និងឆ្នេរខេត្តកោះកុង រួមទាំងកោះ ឲ្យស្របតាមអត្តសញ្ញាណនិងសក្តានុពលនៃខេត្តនីមួយៗ ព្រមទាំងដើម្បីស្រូបយកភ្ញៀវទេសចរផងដែរ ។
លោក ថោង ខុន មានប្រសាសន៍ថា ៖
« ដើម្បីសម្រេចបាននូវផែនការយុទ្ធសាស្ត្រខាងលើនេះ ក្រសួងទេសចរណ៍ និងគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរ រួមទាំងរដ្ឋបាលថ្នាក់ខេត្តតំបន់ឆ្នេរ បាននិងកំពុងយកចិត្តទុកដាក់លើការងារយុទ្ធសាស្ត្រចំនួន៣ចំណុចសំខាន់ៗរួមមាន ការគ្រប់គ្រងតំបន់ឆ្នេរខ្សាច់កម្សាន្ត, ការគ្រប់គ្រងទីតាំងក្រុងទេសចរណ៍ជាប់ឆ្នេរ និងការគ្រប់គ្រងកោះ » ។
លោករដ្ឋមន្ត្រីបន្តថា ការងារយុទ្ធសាស្ត្រទាំងនេះ គឺអនុវត្តតាមអនុសាសន៍របស់សម្តេច ហ៊ុន សែន នាយករដ្ឋមន្ត្រីកម្ពុជា ក្នុងពិធីអបអរសាទរការដាក់បញ្ចូលឆ្នេរសមុទ្រកម្ពុជា និងសមាជិកក្លិបឆ្នេរសមុទ្រស្អាតបំផុតលើសកលលោក ចាប់ពីថ្ងៃទី១១ ខែកក្កដា ឆ្នាំ២០១១ កន្លងទៅ ។ ការងារនេះ ដើម្បីធានាឲ្យសកម្មភាពទេសចរណ៍នៅតាមបណ្តោយឆ្នេរសមុទ្រកម្ពុជាកាន់តែស្រស់ស្អាត មានអនាម័យ និងសណ្តាប់ធ្នាប់ប្រកបដោយភាពទាក់ទាញ ។
ពាក់ព័ន្ធនឹងការគ្រប់គ្រងទីក្រុងទេសចរណ៍ជាប់ឆ្នេរ លោករដ្ឋមន្ត្រីលើកឡើងថា ៖« ទីក្រុង ជាប់ឆ្នេរ នឹងត្រូវបានរៀបចំឱ្យមានសណ្តាប់ធ្នាប់ ល្អ សេវាកម្មល្អប្រកបដោយគុណភាព និងមានសុវត្ថិភាព ព្រមទាំងអភិរក្សបាននូវភាពស្អាតនិងបៃតង និងចូលរួមចំណែកដល់ការអភិវឌ្ឍទីក្រុងនៅតាមបណ្តោយឆ្នេរសមុទ្រ ប៉ុន្តែការអភិវឌ្ឍទីក្រុងតែងតែផ្តល់ផលប៉ះពាល់ដល់តំបន់ឆ្នេរផងដែរ ។ ដូច្នេះ ដើម្បីកាត់បន្ថយផលប៉ះពាល់ជាអវិជ្ជមានទៅតំបន់ឆ្នេរ ចាំបាច់ណាស់ត្រូវអភិវឌ្ឍន៍ទីក្រុងឱ្យក្លាយជាទីក្រុងបៃតង » ។
លោក ថោង ខុន បញ្ជាក់ថា ក្រសួងទេសចរណ៍ និងគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរ បាននិងកំពុងរៀបចំផែនការគ្រប់គ្រងកោះនៅតាមតំបន់ឆ្នេរសមុទ្រកម្ពុជា ដើម្បីឱ្យកោះទាំងអស់ក្លាយជាគោលដៅទេសចរណ៍បៃតង និងគោលដៅអេកូទេសចរណ៍ ។ លោកថា ៖« រាជរដ្ឋាភិបាលកម្ពុជាបាននិងកំពុងមានវិធានការត្រួតពិនិត្យលើគម្រោងវិនិយោគកោះទាំងអស់ដែលបានអនុម័តរួចហើយ ហើយមិនមានដំណើរការរៀបចំនិងអភិវឌ្ឍន៍ គឺត្រូវដកហូតយកមកវិញ ដើម្បីធ្វើការរៀបចំ និងស្វែងរកដៃគូវិនិយោគដែលមានការអភិវឌ្ឍពិតប្រាកដ » ។
យោងតាមរបាយការណ៍ក្រសួងទេសចរណ៍ ក្នុងរយៈពេល២ខែដើមឆ្នាំ២០១៨នេះ កម្ពុជាទទួលបានភ្ញៀវទេសចរអន្តរជាតិចំនួន១,១លាននាក់ កើនឡើង១១,១% បើធៀបនឹងរយៈពេលដូចគ្នាក្នុងឆ្នាំ២០១៧ ។
ការកើនឡើងនេះ បើតាមទីប្រឹក្សាសមាគមទីភ្នាក់ងារទេសចរណ៍កម្ពុជា និងជានាយកគ្រប់គ្រងក្រុមហ៊ុនទេសចរណ៍ World Express Tours & Travel លោក ហូ វណ្ឌី បានកាលពីពេលថ្មីៗនេះថា ដោយសារតែការភ្ជាប់ជើងហោះហើរតាមគោលដៅសហគមន៍របស់យើងនៅអាស៊ី ជាពិសេសប្រទេសចិន ។
ទន្ទឹមនឹងនេះ ដើម្បីទាក់ទាញភ្ញៀវទេសចរអន្តរជាតិមកទស្សនាកាន់តែច្រើនថែមទៀត លោកថា ៖« យើងគួរយកចិត្តទុកដាក់លើការការពារ និងការថែទាំ ដែលជាកត្តាសំខាន់ ពិសេសគឺថែរក្សានូវកេរដំណែលបុព្វបុរសដូនតាយើងឲ្យនៅគង់វង្ស ព្រមទាំងថែរក្សាបរិស្ថាន និងអនាម័យឲ្យបានស្អាត ព្រោះសំរាមជាសត្រូវរបស់ភ្ញៀវទេសចរ » ។
លោកបន្ដថា ទន្ទឹមនឹងភ្ញៀវទេសចរកាន់តែច្រើននេះ បញ្ហាកើតមានក៏កាន់តែច្រើនដែរ ពិសេសការបំពុលបរិស្ថាន និងអនាម័យតែម្ដង ។ ដូច្នេះ សូមចូលរួមថែរក្សាបរិស្ថាន និងអនាម័យឲ្យបានល្អ ។ ទន្ទឹមនឹងនេះ អាជ្ញាធរមានសមត្ថកិច្ច ក៏ត្រូវអនុវត្តច្បាប់ឲ្យបានតឹងរ៉ឹងផងដែរ ដើម្បីកែប្រែផ្នត់គំនិតពីការបោះសំរាមតាមទីសាធារណៈ មករក្សាទុកក្នុងធុងសំរាមឲ្យបានត្រឹមត្រូវ ។
លោកសង្កត់ធ្ងន់ថា ៖« នៅបណ្ដាប្រទេសអភិវឌ្ឍន៍ក្ដី ប្រទេសកំពុងអភិវឌ្ឍន៍ក្ដី ការអនុវត្ត និងគោរពច្បាប់ ជាកត្តាចាំបាច់បំផុត គឺមានទាំងការដាក់ទោសទណ្ឌ មានទាំងការផាកពិន័យ និងការយកទៅឃុំខ្លួនក៏មាន ។ ដូច្នេះ យើងត្រូវចូលរួមគោរព និងអនុវត្តច្បាប់ឲ្យបានគ្រប់គ្នា ដើម្បីកំណើនទេសចរ ដើម្បីកំណើនការងារ និងប្រាក់ចំណូល។ ប្រសិនបើគ្មានចំណុចទាំងនេះទេ ភ្ញៀវក្នុងស្រុកក៏មិនទៅ ភ្ញៀវក្រៅស្រុកក៏មិនមក នោះហើយគឺជាផលវិបាករបស់យើងទាំងអស់គ្នាតែម្ដង » ។
តាមការព្យាករ កម្ពុជានឹងទទួលបានទេសចរអន្តរជាតិប្រមាណ៦,១លាននាក់នៅឆ្នាំនេះ, ប្រមាណ១០លាននាក់នៅឆ្នាំ២០២៥ និងប្រមាណ១៥លាននាក់នៅឆ្នាំ២០៣០ ដោយផ្តល់ចំណូលប្រមាណ១០ពាន់លានដុល្លារចាក់បញ្ចូលក្នុងសេដ្ឋកិច្ចជាតិ ហើយផ្តល់ឱកាសការងារដោយផ្ទាល់ប្រមាណ២លាននាក់ និងប្រយោលរាប់លាននាក់បន្ថែមទៀត ៕
ចែករំលែកព័តមាននេះ