រាជធានីភ្នំពេញ៖ មន្ត្រីជំនាញសាធារណការនិងដឹកជញ្ជូនរាជធានីភ្នំពេញបានអះអាងថា ក្រោយពីសម្ពោធដាក់ឲ្យប្រើប្រាស់ជាផ្លូវការ ស្ពានដែកបេឡេឫស្សីកែវឆ្លងកាត់ទន្លេសាប អាជ្ញាធរមិនអនុញ្ញាតឲ្យរថយន្តក្រុង រថយន្តដឹកលើសពី៥តោន និងអ្នកថ្មើជើងឆ្លងកាត់ស្ពាននោះទេ ។ ដូចកម្មវិធីដែលបានគ្រោងទុក នារសៀលថ្ងៃទី៨…
រាជធានីភ្នំពេញ៖ មន្ត្រីជំនាញសាធារណការនិងដឹកជញ្ជូនរាជធានីភ្នំពេញបានអះអាងថា ក្រោយពីសម្ពោធដាក់ឲ្យប្រើប្រាស់ជាផ្លូវការ ស្ពានដែកបេឡេឫស្សីកែវឆ្លងកាត់ទន្លេសាប អាជ្ញាធរមិនអនុញ្ញាតឲ្យរថយន្តក្រុង រថយន្តដឹកលើសពី៥តោន និងអ្នកថ្មើជើងឆ្លងកាត់ស្ពាននោះទេ ។
ដូចកម្មវិធីដែលបានគ្រោងទុក នារសៀលថ្ងៃទី៨ ឧសភា ឆ្នាំ២០១៨នេះ លោក ឃួង ស្រេង អភិបាលរាជធានីភ្នំពេញ អមដោយមន្ត្រីរាជការក្រោមឱវាទ និងតំណាងក្រុមហ៊ុនអភិវឌ្ឍន៏តំបន់ជ្រោយចង្វា បានធ្វើពិធីសម្ពោធដាក់ឲ្យដំណើរ ការស្ពានដែកបេឡេឫស្សីកែវឆ្លងកាត់ទន្លេសាបតភ្ជាប់ពីផ្លូវជាតិលេខ៥ដល់ផ្លូវជាតិលេខ៦ ដើម្បីរំដោះចរាចរណ៏កំណាត់ផ្លូវជាតិទាំងពីរនេះឲ្យមានភាពប្រសើរឡើង ជាពិសេសពង្វាង និងរំដោះចរាចរណ៏នៅតំបន់ស្ពានជ្រោយចង្វា បន្ទាប់ពីស្ពានជ្រោយចង្វាចាស់ត្រូវបានបិទ ហើយធ្វើការជួសជុល ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ស្ពានដែកបេឡេឬស្សីកែវនេះ ចាប់ផ្តើមសាងសង់នៅថ្ងៃទី២៤ ខែតុលា ឆ្នាំ២០១៧ និងបញ្ចប់នៅថ្ងៃទី៥ ខែឧសភា ឆ្នាំ២០១៨ គឺមានរយៈពេលសាងសង់៦ខែ១១ថ្ងៃ ដែលសាងសង់ដោយក្រុមហ៊ុន OCIC មានប្រវែងសរុប៦៥៥ម៉ែត្រ ក្នុងនោះតួស្ពានប្រវែង៥០៥ម៉ែត្រ គល់ស្ពានសងខាងប្រវែង១៥០ម៉ែត្រ ទទឹងស្ពាន១២ម៉ែត្រ ។ ស្ពាននេះស្ថិតនៅស្របចម្ងាយពីគម្រោងស្ពាបេតុង ២២ម៉ែត្រ សរសរស្ពានចំនួន១៣ ប្រឡោះសរសរចំនួន១២ ប្រឡោះចំនួន២នៅកណ្តាលទន្លេ ពីសរសរមួយទៅសរសរ មួយ សម្រាប់នាវាចរប្រវែង៤១ម៉ែត្រ និងប្រឡោះចំនួន១០ទៀត ប្រវែង២៨ម៉ែត្រទៅ៣២ម៉ែត្រ កំពស់ស្ពានសុវត្ថិភាព ២០.៥ម៉ែត្រ ធៀបទៅនឹងទឹកទន្លេស្រកទាបបំផុត និងកំពស់ស្ពានសុវត្ថិភាព១០.៥ម៉ែត្រ ធៀបនឹងទឹកទន្លេឡើងខ្ពស់ បំផុតកំពស់ គឺប្រហាក់ប្រហែលស្ពានជ្រោយចង្វារ ។ លោកបានបញ្ជាក់ទៀតថា ស្ពាននេះធ្វើចរាចរទ្វេរទិស សម្រាប់រថយន្ត១គន្លងទៅ ១គន្លងមក និងម៉ូតូ១គន្លងទៅ ១គន្លងមក ជម្រាលស្ពាន៤.៥% ឯលើកណ្តាលទន្លេជម្រាល០% ល្បឿនកំណត់២៥គីឡូម៉ែត្រក្នុង១ម៉ោង កំពស់យានយន្តអនុញ្ញាតមិនលើស២.៨ម៉ែត្រ ហាមរថយន្តក្រុងឆ្លងកាត់ ទម្ងន់យានយន្តអនុញ្ញាតមិនលើសពី៥តោន មិនអនុញ្ញាត្តអ្នកថ្មើរជើងដើរឆ្លងកាត់ស្ពាន។ ស្ពាន បេឡេនេះត្រូវតម្លើងបង្គោលភ្លើងលើស្ពានចំនួន៣៤បង្គោលនិងផ្លូវសងខាងចំនួន១៦បង្គោល សរុបបង្គោលភ្លើងចំនួន៥០បង្គោល កំពស់បង្គោលភ្លើង១០ម៉ែត្រជាប្រភេទអំពូលLED ដំឡើងភ្លើងហ្វានៅខាងក្រោមស្ពាន និងបារ៉ាសការពារសុវត្ថិភាព សម្រាប់នាវាចរឆ្លងកាត់ កំពស់បង្កាន់ដៃស្ពាន១.៧ម៉ែត្រ ពាសដោយសំណាញ់ដែក តភ្ជាប់ពីផ្លូវជាតិលេខ៥ដល់ផ្លូវជាតិលេខ៦ ឆ្លង កាត់ ស្ពានមាន ប្រវែងសរុប៩៧៥ម៉ែត្រ មានរង្វង់មូលនាងទេពមច្ឆា នៅតំបន់ជ្រោយចង្វារដំឡើងភ្លើងស្តុបចំនួន២ កន្លែង គឺនៅប្រសព្វផ្លូវជាតិលេខ៥ និងផ្លូវជាតិលេខ៦។ បំពាក់ស្លាកសញ្ញាចរាចរណ៍ គូសគំនូសចរាចរណ៍ និងដំឡើងបារ៉ាសដែកកំពស់២.៨ម៉ត្រ សងខាងស្ពានផងដែរ ។
គួររំលឹកថា ស្ពានបេឡេនេះ ត្រូវបានបើកការដ្ឋានសាងសង់ ជាមួយស្ពានបេតុងអារមេខ្សែកាបឆ្លងកាត់ទន្លេសាបតភ្ជាប់ពីផ្លូវជាតិលេខ៥ទៅផ្លូវជាតិលេខ៦ ស្ពាននេះស្របគ្នា និងនៅក្បែរគ្នា ស្ថិតក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃទី២៣ តុលា ២០១៧កន្លងមក ក្នុងគោលបំណងដើម្បីរំដោះ ចរាចរណ៏ឲ្យកំណាត់ផ្លូវជាតិទាំងពីរនេះឱ្យមានភាពប្រសើរឡើង ជាពិសេសពង្វាង និងរំដោះចរាចរណ៏នៅតំបន់ស្ពានជ្រោយចង្វារ បន្ទាប់ពីស្ពានជ្រោយចង្វាចាស់ត្រូវបានបិទដើម្បីជួសជុល ៕
ចែករំលែកព័តមាននេះ