រាជធានីភ្នំពេញ ៖ បើតាមក្រសួងសាធារណការ និងដឹកជញ្ជូន គម្រោងពង្រីក និងលើកកម្រិតផ្លូវជាតិលេខ៣ គឺមានប្រវែងជាង១៣៤គីឡូម៉ែត្រ និងគ្រោងចំណាយថវិកា២១៩.៩១១លានដុល្លារ ក្រោមហិរញ្ញប្បទានសម្បទានពីសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា ។ វាជាផ្លូវតែមួយគត់ដែលបានរួមចំណែកយ៉ាងសំខាន់ក្នុងការធ្វើដំណើររបស់ប្រជាពលរដ្ឋ និងការដឹកជញ្ជូនផលិតផល ជាពិសេស ការដឹកជញ្ជូនអំបិលពីខេត្តកំពតទៅកាន់ខេត្តផ្សេងៗ និងបម្រើដល់វិស័យទេសចរណ៍ទៅកាន់ភូមិភាគនិរតីនៃតំបន់សមុទ្រកម្ពុជាផងដែរ ។
ថ្លែងក្នុងពិធីបើកការដ្ឋានផ្លូវជាតិលេខ៣ កាលពីថ្ងៃទី៧ ឧសភា លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា ផ្លូវជាតិលេខ៣នេះ គឺជាខ្សែផ្លូវនៃប៉ូលសេដ្ឋកិច្ច និងទេសចរណ៍ដ៏មានសក្តានុពលរបស់កម្ពុជា តភ្ជាប់រាជធានីភ្នំពេញ ទៅកាន់ខេត្តកំពត ដោយឆ្លងកាត់រាជធានី-ខេត្តចំនួន៥រួមមាន រាជធានីភ្នំពេញ ខេត្តកណ្តាល កំពង់ស្ពឺ តាកែវ និងកំពត និងអាចតភ្ជាប់ទៅកាន់កំពង់ផែសមុទ្រអន្តរជាតិខេត្តព្រះសីហនុ តាមរយៈផ្លូវជាតិលេខ៤ និងខេត្តកោះកុង ច្រកព្រំដែនកម្ពុជា-ថៃ តាមរយៈផ្លូវជាតិលេខ៤ និងផ្លូវជាតិលេខ៤៨ ។
លោករដ្ឋមន្ត្រីថ្លែងថា ៖« បន្ទាប់ពីការសាងសង់រួចរាល់ជាស្ថាពរ ផ្លូវជាតិលេខ៣នេះ នឹងដើរតួនាទីយ៉ាងសំខាន់ក្នុងការលើកកម្ពស់ប្រសិទ្ធភាពនៃការធ្វើដំណើរ និងដឹកជញ្ជូនផលិតផល ដំណាំកសិផល និងកសិ-ឧស្សាហកម្មរបស់ក្រុមហ៊ុនវិនិយោគ និងបងប្អូនប្រជាពលរដ្ឋមកពីគ្រប់តំបន់នៅទូទាំងប្រទេស ទៅកាន់ទីផ្សារក្នុងស្រុក ជាពិសេស ទៅកាន់ទីផ្សារអន្តរជាតិ តាមរយៈកំពង់ផែសមុទ្រទឹកជ្រៅរបស់យើង ប្រកបដោយភាពងាយស្រួល និងឆាប់រហ័ស សំដៅទាញយកអត្ថប្រយោជន៍ឲ្យបានច្រើនលើសលប់ពីសមាហរណកម្មសេដ្ឋកិច្ចអាស៊ាន តំបន់ និងពិភពលោក។ ផ្លូវជាតិនេះ នឹងក្លាយជាផ្លូវមួយដ៏ទំនើបនៅកម្ពុជា មានភាពរឹងមាំ ធំទូលាយ អាចកាត់បន្ថយគ្រោះថ្នាក់ចរាចរណ៍នៅតាមដងផ្លូវ ការកកស្ទះចរាចរណ៍ ជាពិសេស ជួយសម្រួលដល់ការធ្វើចរាចរណ៍នៅលើផ្លូវជាតិលេខ៤ បានមួយកម្រិតថែមទៀត » ។
លើសពីនេះ ផ្លូវជាតិលេខ៣ ក៏ជាចំណែកនៃច្រករបៀងប៉ែកខាងត្បូងតាមមាត់សមុទ្រនៃមហាអនុតំបន់មេគង្គ តភ្ជាប់បណ្តាញផ្លូវអាស៊ានហាយវ៉េលេខ១២៣ ពីប្រទេសថៃ មកប្រទេសកម្ពុជា តាមរយៈផ្លូវជាតិលេខ៤៨ ហើយឆ្លងកាត់ផ្លូវជាតិលេខ៤ ត្រង់ចំការលួង ផ្លូវជាតិលេខ៣ ត្រង់ចំណុចផ្លូវបំបែកវាលរេញ និងបន្តទៅប្រទេសវៀតណាម តាមរយៈផ្លូវជាតិលេខ៣៣ កាត់តាមកំពង់ត្រាច ចេញទៅច្រកព្រំដែនកម្ពុជា-វៀតណាម ព្រែកចាក (កំពត)-សាសៀរ (ហាទៀង) ដែលនឹងជួយជំរុញកំណើននៃទំហំពាណិជ្ជកម្ម និងទេសចរណ៍រវាងកម្ពុជា ជាមួយប្រទេសជិតខាង ។ លោក ស៊ុន ចាន់ថុល បានបញ្ជាក់បន្ថែម ។
លោក វ៉ា វីរៈ ប្រធានជំនាញអចលនទ្រព្យអន្តរជាតិ បានថ្លែងប្រាប់កោះសន្តិភាពតាមទូរស័ព្ទ នាថ្ងៃទី៧ ឧសភា ថា សក្តានុពលខេត្តកំពតមកទល់ពេលនេះ គឺកំពុងមានសន្ទុះខ្លាំង ហើយបើសិនជាការសាងសង់ផ្លូវជាតិលេខ៣រួចរាល់ទៀតនោះ គឺកាន់តែធ្វើឲ្យខេត្តជាប់មាត់សមុទ្រមួយនេះ រឹតតែកើនឡើងបន្ថែមទៀតទាំងវិស័យទេសចរណ៍ និងអចលនទ្រព្យ ។
លោកថ្លែងថា ៖« កំពតជាកន្លែងមួយដែលទាក់ទាញភ្ញៀវទេសចរ និងអ្នកវិនិយោគ ព្រោះមានដងព្រែកយ៉ាងស្រស់ស្អាត និងភ្នំបូកគោ ដែលជាកន្លែងទាក់ទាញភ្ញៀវទេសចរខ្លាំងជាងគេ ហើយភ្ញៀវទេសចរនឹងកាន់តែចូលមកទស្សនាច្រើនថែមទៀត ស្របពេលយើងមានផ្លូវល្បឿនលឿនងាយស្រួលសម្រាប់អ្នកធ្វើដំណើរទៅកម្សាន្ត » ។
លោកបន្តថា បន្ទាប់ពីផ្លូវជាតិលេខ៣នេះធ្វើរួចរាល់ហើយ សក្ដានុពលរបស់ខេត្តមួយចំនួនដែលនៅជាប់ផ្លូវនោះ នឹងបន្តកើនឡើង ស្របពេលខេត្តមួយចំនួនក៏មានរោងចក្រកាត់ដេរ ឬដីសម្រាប់ធ្វើកសិកម្មរួចហើយ ។ ជាក់ស្តែង ដូចជា ខេត្តកណ្តាល ស្ថិតនៅក្បែររាជធានីភ្នំពេញ អីចឹង សក្តានុពលសេដ្ឋកិច្ច គឺពាក់ព័ន្ធនឹងវិស័យឧស្សាហកម្មរួមមាន ការសាងសង់រោងចក្រ ជាដើម ដែលធ្វើឲ្យការដឹកជញ្ជូនមានភាពងាយស្រួល ។ រីឯខេត្តតាកែវ មានសក្តានុពលខាងកសិកម្ម ដែលអាចទាក់ទាញភ្ញៀវទេសចរ ហើយប្រជាពលរដ្ឋនៅទីនោះក៏អាចរកចំណូលបន្ថែមពីការលក់ដូរផងដែរ ។
ថ្លែងក្នុងពីធីបើកការដ្ឋានពង្រីក និងលើកកម្រិតផ្លូវជាតិលេខ៣ ពីរាជធានីភ្នំពេញ ទៅក្រុងកំពត សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាក់ថា នៅពេលផ្លូវជាតិលេខ៣នេះសាងសង់រួចហើយ បងប្អូនប្រជាពលរដ្ឋធ្វើដំណើរនឹងចំណេញពេលវេលា ព្រមទាំងកាត់បន្ថយការចំណាយផ្សេងៗបានច្រើន ។
សម្តេចថ្លែងដូច្នេះថា ៖« តាមរយៈផ្លូវជាតិលេខ៣នេះ បើមានបងប្អូនប្រជាពលរដ្ឋចង់ធ្វើដំណើរទៅលេងកំពង់សោម ក៏អាចធ្វើដំណើរតាមផ្លូវជាតិនេះ ហើយចំពោះបងប្អូនប្រជាពលរដ្ឋប្រកបមុខរបរតាមផ្លូវជាតិលេខ៣ ក៏កាន់តែងាយស្រួលផងដែរ » ។
គួរបញ្ជាក់ថា គម្រោងពង្រីក និងលើកកម្រិតផ្លូវជាតិលេខ៣ គឺមានប្រវែងសរុប១៣៤.៨២៦គីឡូម៉ែត្រ ចាប់ពីរាជធានីភ្នំពេញ (ចោមចៅ) ដល់ក្រុងកំពត ដោយឆ្លងកាត់រាជធានីភ្នំពេញ ប្រវែង១២គីឡូម៉ែត្រ, ខេត្តកណ្តាល ប្រវែង១១គីឡូម៉ែត្រ, ខេត្តកំពង់ស្ពឺ ប្រវែង៣០គីឡូម៉ែត្រ, ខេត្តតាកែវ ប្រវែង៣០គីឡូម៉ែត្រ និងខេត្តកំពត ប្រវែង៥១គីឡូម៉ែត្រ ។
គម្រោងនេះសាងសង់ដោយក្រុមហ៊ុនសាជីវកម្មស្ពាន និងថ្នល់ចិន (China Road and Bridge Corporation) និងទីប្រឹក្សាបច្ចេកទេស ដោយក្រុមហ៊ុនត្រួតពិនិត្យសាងសង់ ក្វាងចូវវ៉ានអាន (Guangzhou Wanan Construction Supervision Co., Ltd) និងប្រើរយៈពេល៤៨ខែ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ