ខេត្តឧត្តរមានជ័យ ៖ រឿងរ៉ាវមួយបានកើតឡើងទៅលើគ្រួសារមួយគួឱ្យអាណិតអាសូរបំផុត ខណៈស្ត្រីម្នាក់ឈឺពោះឆ្លងទន្លេនៅក្នុងមណ្ឌលសុខភាពត្រពាំងប្រាសាទធ្លាក់ឈាមខ្លាំងត្រូវបានក្រុមគ្រួសារបញ្ជូនទៅធ្វើការសង្គ្រោះស្លាប់បាត់បង់ជីវិតនៅទៅដល់មន្ទីរពេទ្យខេត្តសៀមរាបកាលពីថ្ងៃទី៣ ខែឧសភា ឆ្នាំ២០១៨ ។
ស្ត្រីដែលរងគ្រោះស្លាប់បាត់បង់ជីវិតចោលកូន៥ស្ត្រីម្នាក់ឈ្មោះ រុន សំបូ អាយុ៣៣ឆ្នាំ មានប្តីឈ្មោះ ម៉ន សុនាត អាយុ៣៦ឆ្នាំ រស់នៅក្នុងភូមិ-ឃុំកើតហេតុខាងលើ ។
ស្ត្រីវ័យចំណាស់ម្នាក់ឈ្មោះ ឌី សុខជា អាយុ៥៨ឆ្នាំ ប្តីឈ្មោះ ម៉ឹង បាន អាយុ៦០ឆ្នាំ ត្រូវជាឪពុកម្តាយបង្កើតស្ត្រីរងគ្រោះបានរៀបរាប់ថា មុនពេលកើតហេតុនៅវេលាម៉ោង២យប់ថ្ងៃទី២ ខែឧសភា ឆ្នាំ២០១៨ កូនស្រីរបស់គាត់ឈឺពោះឆ្លងទន្លេរូបគាត់រួមទាំងប្តីរបស់នាងបាននាំយកទៅឆ្លងទន្លេនៅក្នុងមណ្ឌលសុខភាពស្រុកត្រពាំងប្រាសាទ លុះនៅវេលាម៉ោង៣ទៀបភ្លឺនាងបានសំរាលកូនប្រុសស្រាប់តែកន្លះម៉ោងក្រោយពីសំរាលកូនរួចធ្លាក់ឈាមខ្លាំងហើយក្រុមគ្រួសាបានដឹកតាមរថយន្តនាំទៅធ្វើការសង្គ្រោះនៅឯមន្ទីរពេទ្យខេត្តសៀមរាប់តែវាហួសពេលទៅហើយខណៈឈាមធ្លាក់ខ្លាំងពេកត្រូវបានដឹកសពកូនយកមកលំនៅឋានវិញធ្វើបុណ្យទៅតាមប្រពៃណី ។
ទាក់ទិននឹងព័ត៌មាននេះលោក សឿង ម៉ៅ ប្រធានមណ្ឌលសុខភាពស្រុកត្រពាំងប្រាសាទបានឱ្យអ្នកយកព័ត៌មានដឹងថា ស្ត្រីដែលរងគ្រោះក្រោយពីសំរាលកូនរួចមកអស់រយៈពេលកន្លះម៉ោងនៅតែមិនទាន់បានធ្លាក់សុខ ហើយគ្រូពេទ្យប្រើប្រាស់ថ្នាំ និងជួយម៉ាស្សាពោះឱ្យសុខឆាប់ធ្លាក់ស្រាប់តែធ្លាក់ឈាមហូរខ្លាំងក៏បញ្ជូនបន្តទៅសង្គ្រោះនៅពេទ្យបង្អែកស្រុកអន្លង់វែង រួចបន្តទៅទៅខេត្តសៀមរាប់បានស្លាប់បាត់បង់ជីវិត ៕
ចែករំលែកព័តមាននេះ