មូលហេតុពិតប្រាកដជុំវិញគណបក្សភ្លើងទៀនមិនចូលរួមបោះឆ្នោត ដោយសារវិបត្តិមួយ!
- ភ្នំពេញ
រាជធានីភ្នំពេញ ៖ គណបក្សភ្លើងទៀន (អតីតគណបក្សសម រង្ស៊ី) ដែលបានប្រកាសនៅថ្ងៃទី ៣ ខែឧសភា ថា គណបក្សរបស់ខ្លួន…
រាជធានីភ្នំពេញ ៖ គណបក្សភ្លើងទៀន (អតីតគណបក្សសម រង្ស៊ី) ដែលបានប្រកាសនៅថ្ងៃទី ៣ ខែឧសភា ថា គណបក្សរបស់ខ្លួន «នឹងមិនចូលរួមការបោះឆ្នោត» នៅថ្ងៃទី ២៩ខែកក្កដា ឆ្នាំ២០១៨ សម្រាប់ការបោះឆ្នោតជ្រើសតាំងតំណាងរាស្ត្រសម្រាប់អាសន្នៈសភាចំនួន ១២៥ អាសន្នៈនោះទេ ហើយបែរជាទាមទារឲ្យមានការដោះស្រាយវិបត្តិនយោបាយ ដើម្បីធានាការបោះឆ្នោតថា នឹងប្រព្រឹត្តទៅដោយសេរី និងយុត្តិធម៌ ដែលឆ្លុះបញ្ចាំងពីឆន្ទៈរបស់ប្រជាពលរដ្ឋខ្មែរ ។
ក៏ប៉ុន្តែបើតាមប្រភពស្ថិតនឹងថ្នាក់ដឹកនាំរបស់គណបក្សភ្លើងទៀន (អតីតគណបក្សសម រង្ស៊ី) ដែលជាស្ថាបនិកគណបក្សសង្គ្រោះជាតិ ដែលជាគណបក្សប្រឆាំងត្រូវបានរំលាយចោលកាលពីថ្ងៃទី ១៦ វិច្ឆិកា ឆ្នាំ២០១៧ ដោយអំណាចសាលដីការបស់តុលាការកំពូល គឺមិនមែនពាក់ព័ន្ធនឹងវិបត្តិនយោបាយនោះទេ «តែគឺវិបត្តិផ្ទៃក្នុងរបស់គណបក្សដោយសារតែគ្មានធនធានមនុស្សគ្រប់គ្រាន់» សម្រាប់រៀបចំបញ្ជីឈ្មោះបេក្ខជនចូលរួមការប្រកួតប្រជែងការបោះឆ្នោតជាតិខាងមុខនេះ ។
សូមបញ្ជាក់ថា តុលាការកំពូលបានសម្រេចរំលាយគណបក្សសង្គ្រោះជាតិ និងហាមធ្វើសកម្មភាពនយោបាយរយៈពេល ៥ ឆ្នាំ របស់ថ្នាក់ដឹកនាំគណបក្សនេះចំនួន ១១៨ នាក់។
គណបក្សសង្គ្រោះជាតិកាលពីការបោះឆ្នោតជ្រើសតាំងតំណាងរាស្ត្រនៅឆ្នាំ ២០១៣ ឈ្នះបាន៥៥ អាសន្នៈនៅរដ្ឋសភា ក្នុងចំណោមអាសន្នៈសរុប ១២៣ ។ ក្រោយមកទៀត គណបក្សសង្គ្រោះជាតិ គណបក្សបានទទួលសម្លេងច្រើនសម្រាប់ការបោះឆ្នោតក្រុមប្រឹក្សាឃុំ-សង្កាត់ ដែលក្នុងនោះមានមេឃុំ និងចៅសង្កាត់ចំនួន ៤៨៩ អាសនៈ និងក្រុមប្រឹក្សាឃុំ-សង្កាត់ចំនួន ៥០០៧ អាសនៈ។ ក្រោយមកប្រធានគណបក្សប្រឆាំង លោក កឹម សុខា ត្រូវបានចាប់ខ្លួន និងកំពុងជាប់ឃុំនៅក្នុងពន្ធនាគារ ត្រពាំងថ្លុង នៅខេត្តត្បូងឃ្មុំ ក្រោយពីត្រូវចោទពីបទ «ក្បត់ជាតិ» ហើយគណបក្សសង្គ្រោះជាតិត្រូវរំលាយ ដូច្នេះអតីតគណបក្សប្រឆាំងត្រូវបាត់បង់អាសន្នៈទាំងអស់ ។
ងាកមកគណបក្សភ្លើងទៀនវិញ គឺពីដំបូងសង្ឃឹមថា អាចនឹងចូលរួមប្រកូតប្រជែងដណ្តើមអាសន្នៈនៅរដ្ឋសភា បើសិនជាថ្នាក់ដឹកនាំអតីតគណបក្សប្រឆាំងចំនួន ១១៨ នាក់ អាចត្រូវបានលើកលែងទោស ។ តែគួរឲ្យស្តាយ ថ្នាក់ដឹកនាំរាជរដ្ឋាភិបាលកម្ពុជា សម្តេចតេជោ ហ៊ុន សែន ធ្លាប់ប្រកាសជាសាធារណៈថា ពិតជាមានអតីតមន្ត្រីអតីតគណបក្សប្រឆាំងសុំមកសម្តេចឲ្យជួយ បានលើកលែងទោស និងអាចមានឱកាសចូលរួមឆាកនយោបាយបន្តទៀត។
យ៉ាងណាមិញ សម្តេចតេជោ បានបញ្ជាក់ហើយថា អតីតគណបក្សប្រឆាំងចំនួន ១១៨ នាក់ ដែលជាប់បម្រាម គឺគ្មានច្បាប់ណាដែលអនុញ្ញាតិឲ្យសម្តេចស្នើសុំព្រះមហាក្សត្រលើកលែងទោស ឬបន្ធូរបន្ធយទោសបានទេ ។ ហេតុដូច្នេះហើយ គណបក្សភ្លើងទៀន ដែលសម្រេចប្រកាសជាផ្លូវការមិនចូលរួមការបោះឆ្នោតខាងមុខ គឺដោយសារគ្មានធនធានមនុស្សតែម្តង៕
ចែករំលែកព័តមាននេះ