រាជធានីភ្នំពេញ ៖ ការប្រឡងសម្រស់ឯកវាយនភណ្ឌឆ្នាំ២០១៨ វគ្គផ្តាច់ព្រ័ត្រ កាលពីរាត្រីថ្ងៃទី១ ខែឧសភា គណៈកម្មការរកឃើញបេក្ខជន-បេក្ខនារីជ័យលាភីហើយ ។ ព្រឹត្តិការណ៍ដ៏ធំប្រចាំឆ្នាំនេះធ្វើឡើងនៅសាលមហោស្រពកោះពេជ្រ ក្រោមអធិបតីភាពលោកអ៊ិត…
រាជធានីភ្នំពេញ ៖ ការប្រឡងសម្រស់ឯកវាយនភណ្ឌឆ្នាំ២០១៨ វគ្គផ្តាច់ព្រ័ត្រ កាលពីរាត្រីថ្ងៃទី១ ខែឧសភា គណៈកម្មការរកឃើញបេក្ខជន-បេក្ខនារីជ័យលាភីហើយ ។
ព្រឹត្តិការណ៍ដ៏ធំប្រចាំឆ្នាំនេះធ្វើឡើងនៅសាលមហោស្រពកោះពេជ្រ ក្រោមអធិបតីភាពលោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ព្រមទាំងមានការចួលរួមពីលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា តំណាងនិយោជក តំណាងសហជីព តារាចម្រៀង និងតំណាងកម្មករជាច្រើននាក់ ។
សម្រស់ឯកវាយនភណ្ឌឆ្នាំ២០១៨រួមមាន៖
សម្រាប់បេក្ខជន ៖ ជ័យលាភីលេខ១ បានទៅលើកលោកឌិន សិត ពាក់ស្លាកលេខ៨ ពីមណ្ឌលភ្នំពេញ ទទួលបានប្រាក់ចំនួន ៥.០០០.០០០រៀល និងម៉ូតូ១គ្រឿង ។ ជ័យលាភីលេខ២ បានទៅលើលោក គង់ វិតាក់ ពាក់ស្លាកលេខ១២ ពីមណ្ឌល ស្វាយរៀង ទទួលបានប្រាក់ចំនួន៤.០០០.០០០រៀល និងម៉ូតូ១គ្រឿង ។ ជ័យលាភីលេខ៣ លោកទូត ទិត្យា ពាក់ស្លាកលេខ១៤ ពីមណ្ឌលព្រះសីហនុទទួលបានប្រាក់ចំនួន៣.០០០.០០០រៀល និងម៉ូតូ១គ្រឿង ។
សម្រាប់បេក្ខនារី ៖ ជ័យលាភីលេខ១ បានទៅលើកកញ្ញាញឿន ស៊ូវិ ពាក់ស្លាកលេខ៣ ពីមណ្ឌលភ្នំពេញ ទទួលបានប្រាក់ចំនួន ៥.០០០.០០០រៀល និងម៉ូតូចំនួន១គ្រឿង ។ ជ័យលាភីលេខ២ កញ្ញាប៊ិន អ៊័ន ពាក់ស្លាកលេខ៧ពីមណ្ឌលព្រះសីហនុ ទទួលបាន ប្រាក់ចំនួន៤.០០០.០០០រៀល និងម៉ូតូចំនួន១គ្រឿង ។ ជ័យលាភីលេខ៣ កញ្ញាហុក ណាគ្រី ពាក់ស្លាកលេខ១២ ពីមណ្ឌលបន្ទាយមានជ័យ ទទួលបានប្រាក់ចំនួន៣.០០០.០០០រៀល និងម៉ូតូ១គ្រឿង ។
ក្នុងពិធីប្រកួតប្រជែងផ្តាច់ព្រ័ត្រលោករដ្ឋមន្ត្រី អ៊ិត សំហេង ថ្លែងថា ការរៀបចំកម្មវិធីសម្រស់ឯកវាយនភណ្ឌបង្កើតឡើងក្រោមគំនិតផ្តួចផ្តើមរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចំនួន៣លើករួចមកហើយ គឺនៅឆ្នាំ២០១៥ ឆ្នាំ២០១៦ និងឆ្នាំ២០១៧ ទទួលបានជោគជ័យ និងការគាំទ្រយ៉ាងពេញទំហឹងពីសាធារណជន ជាពិសេសពីកម្មករ-កម្មការិនី ។
ចំពោះឆ្នាំនេះគឺជាលើកទី៤ហើយ ដែលក្រសួងការងារបានរៀបចំកម្មវិធីសម្រស់ឯកវាយនភណ្ឌ ដែលកាន់តែមានលក្ខណៈទូលំទូលាយជាងមុន ដោយមានការចូលរួមពីសមាគមរោងចក្រកាត់ដេរនៅកម្ពុជា (GMAC) សហភាពសហព័ន្ធយុវជនកម្ពុជា (ស.ស.យ.ក) អគ្គនាយកដ្ឋានវិទ្យុ និងទូរទស្សន៍បាយ័ន ក្រុមប្រឹក្សាសហជីពជាតិកម្ពុជា (CCNU) និងសភាសម្ព័ន្ធសហជីពជាតិកម្ពុជា (NACC) ព្រមទាំងដៃគូពាក់ព័ន្ធនានាសម្តៅលើកតម្លៃកម្មករ-កម្មការិនី និងបង្កើតនូវបរិយាកាសសប្បាយរីករាយជូនកម្មករ-កម្មការិនី ដែលកំពុងបម្រើការងារក្នុងឧស្សាហកម្មផ្នែកវាយនភណ្ឌកាត់ដេរ និងផលិតស្បែកជើងនៅកម្ពុជា និងវិស័យសេដ្ឋកិច្ច ផ្សេងៗទៀត ក្នុងឱកាសអបអរសាទរខួបអនុស្សាវរីយ៍លើកទី១៣២ ទិវាពលកម្មអន្តរជាតិ ក្រោមប្រធានបទ «សន្តិភាព ស្ថិរភាព ដើម្បីការងារ និងមុខរបរ» ។
លោករដ្ឋមន្ត្រីបានលើកទឹកចិត្តដល់កម្មករ-កម្មការិនីឲ្យត្រូវមានមោទនភាពថា ពិតជាបានចូលរួមលើកស្ទួយដល់សិទ្ធិ និងផលប្រយោជន៍របស់កម្មករនិយោជិតក្នុងវិស័យនេះ ដោយបានចូលរួមបំផុសឱ្យកម្មករនិយោជិតឱ្យស្គាល់តម្លៃនៃការងាររបស់ខ្លួន កាន់តែស្រឡាញ់ ការងារខ្លួនសម្តៅបង្កើនផលិតភាពការងារ និងការទាក់ទងកាន់តែល្អជាមួយថៅកែ និងគោរពច្បាប់ស្តីពីការងារទាំងអស់គ្នា ។
លោក អ៊ិត សំហេង បញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ នឹងបន្តរៀបចំកម្មវិធីនេះនៅឆ្នាំក្រោយៗទៀត ហើយសង្ឃឹមថាកម្មករ-កម្មការីនីនឹងបន្តចូលរួមក្នុងកម្មវិធីនេះកាន់តែអធិកអធមថែមទៀត ៕
ចែករំលែកព័តមាននេះ