រាជធានីភ្នំពេញ ៖ តារាកំប្លែងលោកខាត់ ចំរើន និងអ្នកនាងកាឆយ មានទំនាស់ផ្ទៃក្នុងរហូតអន់ចិត្តពិបាកមើលមុខគ្នា ។ អ្នកទាំងពីរតែងតែចាប់ដៃគូគ្នាសម្តែងក្នុងកម្មវិធី ផ្សេងៗអស់រយៈពេលជាច្រើនឆ្នាំមកហើយ ។…
រាជធានីភ្នំពេញ ៖ តារាកំប្លែងលោកខាត់ ចំរើន និងអ្នកនាងកាឆយ មានទំនាស់ផ្ទៃក្នុងរហូតអន់ចិត្តពិបាកមើលមុខគ្នា ។ អ្នកទាំងពីរតែងតែចាប់ដៃគូគ្នាសម្តែងក្នុងកម្មវិធី ផ្សេងៗអស់រយៈពេលជាច្រើនឆ្នាំមកហើយ ។
ទំនាស់នេះត្រូវអ្នកនាងកាឆយ ប្រកាសជាសាធារណៈតាមហ្វេសប៊ុក ហើយនាងបានប្រកាសមិនទទួលខុសត្រូវណាមួយចំពោះភ្ញៀវដែលចង់បាននាង និងលោកខាត់ ចំរើន ឲ្យសម្តែងរួមគ្នានោះទេ ។
បើតាមការសរសេរបង្ហោះដោយភ្ជាប់ជាមួយរូបភាពនាង និងលោកខាត់ ចំរើន បញ្ជាក់ថា «ប្រសិនបើមានបងប្អូនណាដែលចង់បានលោកខាត់ ចំរើន ជាដៃគូរបស់ខ្ញុំនោះ គឺនាងខ្ញុំមិនធានាជាដាច់ខាត ។ ការដែលនាងខ្ញុំមិនធានាចំពោះបញ្ហានេះ ដោយសារតែលោក ខាត់ ចំរើន មិនគោរពពេលវេលា និងទៀងទាត់ម៉ោង ដូចដែលនាងខ្ញុំបានខកខានជាមួយតារាកំប្លែងរូបនេះកាលពីថ្ងៃទី៣០ មេសា កន្លងទៅ »។
ការខកខាននៃការសម្តែងអ្វីនោះមិនត្រូវបានអ្នកនាងកាឆយ បញ្ជាក់ឲ្យបានច្បាស់លាស់ឡើយ ប៉ុន្តែទំនងជាបញ្ហានេះកើតឡើងជាញឹកញាប់ទើបធ្វើឲ្យនាងមិនអាចទ្រាំបានទើបចេញមកប្រកាសបែបនេះឡើង ។
ជុំវិញបញ្ហានេះតារាកំប្លែងអ្នកនាងកាឆយ មិនបានរៀបរាប់លម្អិតទេ ជុំវិញការសាកសួរដោយនាងបានបង្វិលឲ្យសួរទៅលោកខាត់ ចំរើន ដើម្បីឆ្លើយបំភ្លឺវិញ ។
ដោយឡែកលោកខាត់ ចំរើន ហៅនាយ កន្តេះឡង់ បានអះអាងប្រាប់កោះសន្តិភាពតាមសារអេឡិចត្រូនិកថា រឿងនេះលោកមិនចង់បកស្រាយអ្វីឲ្យវែងឆ្ងាយឡើយ ព្រោះជារឿងតូចតាច ប៉ុន្តែនៅពេលអ្នកនាងកាឆយ បានសរសេរបង្ហោះយ៉ាងដូច្នេះនោះ លោកក៏មិននឹកស្មានដល់ឡើយ ព្រោះជាអ្នកសិល្បៈប្រៀបបានដូចជានៅផ្ទះជាមួយគ្នា ប៉ុន្តែមានរឿងតិចតួចបែរជារំលើកបើកកកាយទៅវិញ ។
បើតាមលោកខាត់ ចំរើន ប្រសិនបើលោកចោល ឬអាក់ខានមិនបានទៅសម្តែងជាមួយអ្នកនាងកាឆយមែននោះ លោកទទួលខុសទាំងស្រុង តែពេលខ្លះនៅពេលដែលលោកអាក់ខានដោយសារតែលោកមានធុរៈចាំបាច់នោះ គឺលោកតែងតែស្វែងរកអ្នកជំនួសជានិច្ច ។
លោកខាត់ ចំរើន បញ្ជាក់ថា «តាំងពីដើមមក ការសម្តែងជាមួយអ្នកនាងកាឆយ មិនមែនខ្ញុំល្អទាំងស្រុងឡើយ ហើយគាត់ក៏មិនល្អទាំងស្រុងដូចគ្នា គឺបញ្ហាតែងតែជួបប្រទះដូចគ្នា ។ ប៉ុន្តែពួកយើងចេះតែព្យាយាមទុកក្នុងចិត្ត ហើយករណីដែលខ្ញុំបានខកខាននាំឲ្យមានបញ្ហានេះកើតឡើងគឺដោយសារតែខ្ញុំមានធុរៈចាំបាច់នៅឆ្ងាយ ព្រោះត្រូវចុះចែកអំណោយរបស់លោកអភិបាលខណ្ឌនៅក្នុងខេត្តកំពង់ស្ពឺ ។ ដោយពេលនោះម៉ោងប្រហែលជា៣ ទើបខ្ញុំមិនអាចទៅទាន់ច្រៀងជាដៃគូជាមួយអ្នកនាង កាឆយ បានទើបខ្ញុំបានស្វះស្វែងរកដៃគូផ្សេងទៀត ដើម្បីជំនួសរូបខ្ញុំដែលមកមិនទាន់។ ក្នុងពេលនោះខ្ញុំក៏បានហៅនាយស្វិត ឲ្យមកជំនួស ដោយខ្ញុំមិនបានបោះបង់ចោលកម្មវិធីនោះឡើយ គ្រាន់តែខ្ញុំមិនបានទៅចូលរួមសម្តែងតាមការចង់បានពីម្ចាស់កម្មវិធីនោះ» ។
លោកខាត់ ចំរើន បានចាត់ទុកការប្រកាសរបស់អ្នកនាងកាឆយ នាពេលនេះប្រៀបបាននឹងការកាត់ផ្តាច់មនោសញ្ចេតនាទាំងស្រុងជាមួយលោក ក្នុងនាមនាងគឺជារៀមច្បងម្នាក់។ ប្រសិនបើនៅក្នុងកម្មវិធីនោះម្ចាស់កម្មវិធីស្តីបន្ទោសនោះ លោកក៏សុំចូលរួមចំណែកនៅក្នុងការខុសដែរ តែលោកបានសាកសួរទៅកាន់នាយស្វិត គឺមិនត្រឹមតែម្ចាស់កម្មវិធីមិនស្តីបន្ទោសទេ តែផ្ទុយទៅវិញនាយបានទទួលលុយធីបជាច្រើនថែមទៀតផង ។
ការផ្សាភ្ជាប់ការទាក់ទងគ្នាឡើងវិញឬយ៉ាងណានោះ លោក ខាត់ ចំរើន លើកឡើងថា លោកមិនហ៊ាននិយាយអ្វីវែងឆ្ងាយឡើយ ទុកឲ្យពេលវេលាជាអ្នកកំណត់ ព្រោះលោក និងអ្នកនាងកាឆយ បានរាប់អាន និងសម្តែងជាមួយគ្នាជិត២០ឆ្នាំមកហើយ ។ ប្រសិនបើរឿងប៉ុណ្ណឹងនាងប្រកាសកាត់កាល់លោកចោលនោះក៏មិនអីដែរ លោកទទួល ហើយលោកក៏សុំទទួលយកកំហុសពាក់កណ្តាល ។
លោកខាត់ ចំរើន បញ្ជាក់ថា ប្រសិនបើការរាប់អានរវាងលោក និងអ្នកនាកាឆយ អាចនឹងវិលមកវិញនោះគឺលោកទទួលយក ប៉ុន្តែការរាប់អាននេះអាចនឹងមិនដូចមុនឡើយ ព្រោះដោយសារតែនាងបានប្រកាសទៅហើយនោះ ៕
ចែករំលែកព័តមាននេះ