ខេត្តមណ្ឌលគិរី ៖ ដំរីព្រៃមួយហ្វូង បានបង្កឱ្យអ្នកភូមិព្រួយបារម្ភពីសុវត្ថិភាព ខណៈកាលពីយប់ថ្ងៃទី២៩-៣០ មេសា គេបានប្រទះឃើញដំរីទាំងនោះ ចេញមករាតត្បាតដំណាំចេករបស់អ្នកស្រុកបោចស៊ី និងជាន់កម្ទេចចោល តាមអំពើចិត្តអស់ជាច្រើនកន្លែងនៅភូមិអណ្តូងក្រឡឹង ឃុំសែនមនោរម្យ ស្រុកអូររាំង ។
អ្នកភូមិបានរាយការណ៍ថា នៅយប់នោះ ហ្វូងដំរីព្រៃប្រមាណ១៥ក្បាលមានទាំងតូចនិងធំ ក្នុងនោះមេហ្វូងឈ្មោលមួយ ក្បាល បានបណ្តើរគ្នាចេញពីព្រៃត្រង់ចំណុចព្រៃរកា ចូលទៅចម្ការស្វាយចន្ទី និងចម្ការចេករបស់អ្នកភូមិដោយពួកវាវ៉ៃ និងជាន់កម្ទេចផលដំណាំទាំងនោះ បង្កឱ្យមានការខូចខាតអស់ជាច្រើន ។ លោក ខៃ វណ្ណៈ អធិការរងនគរបាលស្រុកអូររាំងបានឱ្យដឹងថា ដំរីព្រៃទាំងនោះបានចូលទៅបំផ្លាញផល ដំណាំរបស់អ្នកស្រុក តាំងពីយប់ថ្ងៃទី២៨ រហូតដល់យប់ថ្ងៃទី៣០ មេសា នៅមិនទាន់ចូលទៅក្នុងព្រៃវិញទេ ។ លោកថា ដំរីទាំងនោះ តែងចេញមកស៊ីផលដំណាំអ្នកស្រុកនៅពេលយប់ និងចូលទៅក្នុងព្រៃវិញនៅវេលាទៀបភ្លឺ ។ ទោះជាយ៉ាងណា ហ្វូងដំរីទាំងនេះមិនបានបង្កគ្រោះថ្នាក់ដល់ម្ចាស់ចម្ការ ឬអ្នកភូមិណាម្នាក់ឡើយ គឺពួកវាស៊ីតែដំណាំ និងជាន់កម្ទេចចោលនូវរបស់របរប្រើប្រាស់មួយចំនួន ។
អ្នកភូមិអណ្តូងក្រឡឹងបានស្នើដល់អាជ្ញាធរ ជាពិសេស មន្ត្រីជំនាញផ្នែកការពារសត្វព្រៃ ជួយរកវិធានការទប់ស្កាត់សកម្មភាពរបស់ហ្វូងដំរីព្រៃទាំងនោះកុំឱ្យពួកវាចូលមកបំផ្លាញផលដំណាំបន្តទៀត និងដើម្បីសុវត្ថិ ភាពរបស់ពួកគាត់ផង ។
កាលពីព្រឹកថ្ងៃទី១ ឧសភា កោះសន្តិភាពមិនអាចសុំការបំភ្លឺបានទេពីលោក ឌិន ប៊ុនធឿន នាយកដែនជម្រកសត្វព្រៃកែវសីមា ជុំវិញបញ្ហាខាងលើនេះ ។ ប៉ុន្តែលោកបានបញ្ចេញមតិ លើបណ្តាញសង្គមកាលពីថ្ងៃទី៣០ មេសាថា ៖ «ការដែលដំរីទាំងនោះជាន់កម្ទេចផលដំណាំ មកពីយើងទាំងអស់គ្នាទៅរំខានទីជម្រករបស់ពួកវា» ។
ក្នុងន័យនេះ អាចប្រហែលជាលោក ឌិន ប៊ុនធឿន សំដៅទៅលើការកាប់បំផ្លាញព្រៃឈើ ក្នុងដែនជម្រករបស់សត្វព្រៃ ដែលកំពុងកើតមានជារៀងរាល់ថ្ងៃ គឺមានគ្រប់រូបភាពទាំងការរានព្រៃយកដីធ្វើជាកម្មសិទ្ធិផង និងរត់ពន្ធឈើទៅក្រៅប្រទេសផង គឺមានការកាប់ឈើអារលក់យ៉ាងរង្គាលស្ទើរអស់ព្រៃសម្រាប់សត្វព្រៃជ្រកទៅហើយ ។
លោក កែវ សុភគ៌ ប្រធានមន្ទីរបរិស្ថានខេត្តបានឱ្យដឹងនៅព្រឹកថ្ងៃទី១ ឧសភា ថា សព្វថ្ងៃនេះ នៅទូទាំងខេត្តមណ្ឌលគិរី ផ្អែកតាមការសិក្សារបស់ជំនាញបង្ហាញថា ដំរីព្រៃមានចំនួនជាង២០០ក្បាល ។ លោកថា ចាប់ពីខែមិថុនា ២០១៨នេះ ទៅ មន្ទីរបរិស្ថាននឹងសហការជាមួយអង្គការ WWF សិក្សាជាថ្មីលើរបាយការណ៍ពីចំនួនសត្វដំរី ក្នុងខេត្តមណ្ឌលគិរីឡើងវិញ ។
ចែករំលែកព័តមាននេះ