រាជធានីភ្នំពេញ ៖ សម្រាប់រយៈពេល២ថ្ងៃនៃការចុះឈ្មោះគណបក្សនយោបាយសម្រាប់ការបោះឆ្នោត ជ្រើសតាំងអ្នកតំណាងរាស្ត្រអាណត្តិទី៦ រដ្ឋសភា គណៈកម្មាធិការជាតិរៀបចំការបោះ ឆ្នោតបានទទួលចុះបញ្ជីបេក្ខជនឈរឈ្មោះគណបក្សនយោបាយចំនួនមួយ គឺគណបក្សសញ្ជាតិខ្មែរ និងមានគណបក្សចំនួនមួយមកសុំពាក្យ ដើម្បីបំពេញបែបបទសុំចុះឈ្មោះបេក្ខជន ។ នេះបើតាមការឲ្យដឹងពីអ្នកនាំពាក្យគ.ជ.ប ។
លោកឌឹម សុវណ្ណារុំសមាជិក គ.ជ.ប និងជាអ្នកនាំពាក្យបានប្រាប់កោះសន្តិភាពដឹងតាមទូរស័ព្ទនៅរសៀលថ្ងៃទី០១ ខែឧសភា ឆ្នាំ២០១៨ថា សម្រាប់ថ្ងៃទី២ នៃការទទួលចុះបញ្ជីបេក្ខជនឈរឈ្មោះបោះឆ្នោតជ្រើសតាំងអ្នកតំណាងរាស្ត្រអាណត្តិទី៦ គ.ជ.ប បានទទួលពាក្យសុំចុះបញ្ជីបេក្ខជនគណបក្សចំនួនមួយ គឺគណបក្សសញ្ជាតិកម្ពុជា ហើយមានគណបក្សមកសុំពាក្យ ដើម្បីបំពេញបែបបទ គឺគណបក្សឆន្ទៈខ្មែរ របស់កូនប្រុសលោកគង់គាំ ។
លោកបញ្ជាក់ថា «ព្រឹកមិញនេះមានគណបក្សសញ្ជាតិខ្មែរបានមកសុំចុះបញ្ជីដោយឡែកគណបក្សឆន្ទៈខ្មែរបានមកសុំពាក្យទម្រង់១០០៨ ទៅបំពេញបែបបទ ។ ហើយរហូតមកដល់ពេលនេះ មានគណបក្សនយោបាយមកសុំពាក្យទៅចំពេញបែបបទមានចំនួន១៨ គណបក្សនយោបាយ» ។
លោកបន្តថា ចាប់តាំងពីបើកដំណើរទទួលពាក្យចុះបញ្ជីគណបក្សនយោបាយកាលពីថ្ងៃទី៣០ មេសាមក គ.ជ.ប បានទទួលសុំបញ្ជីបេក្ខជនឈរឈ្មោះសម្រាប់ការបោះឆ្នោតបានចំនួន៣ គឺគណបក្សប្រជាជនកម្ពុជា គណបក្សយុវជនកម្ពុជា និងគណបក្សសញ្ជាតិខ្មែរ ។ លោកបន្ថែមថា គ.ជ.បនឹងប្រើប្រាស់ពេលរយៈ៧ថ្ងៃ ដើម្បីពិនិត្យសម្រេចទទួលយក ឬមិនទទួលយក ហើយប្រសិនបើគណបក្សនយោបាយមិនទាន់បានបំពេញបែបបទគ្រប់គ្រាន់ គ.ជ.ប នឹងបញ្ជូនទៅគណបក្សសាមីវិញដើម្បីបន្ថែម ។ ផ្ទុយទៅវិញប្រសិនបើពាក្យសុំរបស់គណបក្សនយោបាយមានភាពត្រឹមត្រូវ គ.ជ.បនឹងសម្រេចចុះជាផ្លូវការតែម្តង ។
លោកបញ្ជាក់ថា ៖ « អីញ្ចឹងខ្ញុំគិតថា អាណត្តិទី៦នេះគណបក្សនយោបាយចំនួនច្រើនមកប្រកួតប្រជែង ប៉ុន្តែយើងមិនអាចកំណត់បានចំនួនប៉ុន្មាននោះទេ តែយើងដឹងថា នៅក្រសួងមហាផ្ទៃបានទទួលចុះបញ្ជីគណបក្សនយោបាយចំនួន៣៨ រួចហើយនៅគ.ជ.ប យើងបានចុះបានចែកទម្រង១០០៨ ដល់គណបក្សនយោបាយចំនួន២០ទាំងគណបក្សដែលបានដាក់ ហើយមានចំនួន២១ គណបក្សនយោបាយ» ។
ទាក់ទិននឹងការចុះឈ្មោះគណបក្សនយោបាយនេះដែរគណបក្សឆន្ទៈខ្មែរដែលគេ ស្គាល់ថា ជាគណបក្សថ្មីមួយរបស់លោក គង់ មុនីកា កូនប្រុសពៅរបស់អតីតសមាជិក គណបក្សសង្គ្រោះជាតិ គឺលោក គង់ គាំ គ្រោងនឹងដាក់បេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រនៅទូទាំង២៥មណ្ឌល (២៥រាជធានី-ខេត្ត) ហើយប្រធានគ ណបក្សអាចនឹងឈរឈ្មោះនៅមណ្ឌលភ្នំពេញ ។ នេះបើតាមអ្នកនាំពាក្យគណបក្សឆន្ទៈខ្មែរ លោក ហ៊ីង យឿន ។
តំណាងគណបក្សថ្មីសន្លាងមួយនេះបានបន្តថា ប្រធានគណបក្សឆន្ទៈខ្មែរ គឺលោក គង់ មុនីកាប្រហែលជានឹងនៅឈរឈ្មោះតំណាងរាស្ត្រនៅមណ្ឌលភ្នំពេញ ប៉ុន្តែផែនការល ម្អិតយ៉ាងណានោះ មិនទាន់ជាក់ច្បាស់នៅឡើយទេ ។
លោកបានជម្រាបពីគោលបំណងរបស់គណបក្សឆន្ទៈខ្មែរផងដែរថា គណបក្សឆន្ទៈខ្មែរ បង្កើតឡើងដើម្បីប្រមូលឆន្ទៈប្រជាពលរដ្ឋខ្មែរក៏ដូចជា ដាស់ស្មារតីប្រជាពលរដ្ឋខ្មែរ ដែលធ្លាប់គាំទ្រអតីតគណបក្សប្រឆាំងកាលពីឆ្នាំ២០១៣ និងឆ្នាំ២០១៧ ឡើងវិញ ។
គ.ជ.បបានចេញសេចក្តីប្រកាសព័ត៌មានប្រាប់គណបក្សនយោបាយពីការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត ត្រូវធ្វើឡើងតាមទម្រង់បែបបទលេខ១០០៨ របស់គ.ជ.ប ដោយគណបក្សនយោបាយត្រូវបំពេញពាក្យសុំចុះបញ្ជីនេះចំនូន២(ពីរ)ច្បាប់នឹងត្រូវឯកសារភ្ជាប់មកជាមួយចំនួន១០ ដូចជាទី១- សេចក្តីចម្លងលិខិតបញ្ជាក់ការចុះបញ្ជីគណបក្សនយោបាយ នៅក្រសួងមហាផ្ទៃចំនួន១ច្បាប់ ។ ទី២ – ឈ្មោះគណបក្សនយោបាយជាអក្សរពេញជាអក្សកាត់ និងសញ្ញាសម្គាល់គណបក្សនយោបាយ ។ ទី៣ – អាសយដ្ឋាននៃទីស្នាក់ការកណ្តាលគណបក្សនយោបាយ ។ ទី៤- បញ្ជីបេក្ខជនឈរឈ្មោះបោះឆ្នោតឆ្នោតសរុប ទូទាំងប្រទេស ។ បញ្ជីនេះត្រូវមានបេក្ខជនពេញសិទ្ធិចំនួនយ៉ាងតិច១/៣ (ភាគបី) ស្មើនឹង ៤២អាសនៈ នៃចំនួនអាសនៈក្នុងរដ្ឋសភា និងបេក្ខជនបម្រុងចំនួនស្មើគ្នានឹងបេក្ខជនពេញសិទ្ធិ ។ ទី៥ – ឈ្មោះមណ្ឌលដែលគណបក្សនយោបាយមានបំណងទៅឈរ និងបញ្ជីបេក្ខជនឈរឈ្មោះតាមណ្ឌលទាំងនោះ ។ បញ្ជីបេក្ខជនឈរឈ្មោះតាមមណ្ឌលទាំងនោះ ។ បញ្ជីបេក្ខជនឈ្មោះតាមមណ្ឌលត្រូវមានបេក្ខជនគ្រប់តាមចំនួនអាសនៈ និងតាមគំរូដែលគ.ជ.ប ផ្តល់ជូន ។ ចំពោះមណ្ឌលបោះឆ្នោតដែលមានអាសនៈ១ ឬ២ ត្រូវមានបេក្ខជនបម្រុងយ៉ាងតិច៣(បី)រូប ។ ទី៦ – សេចក្តីប្រកាសអំពីគណនីគណនាគារដែលគណបក្សនយោបាយបានទុកប្រាក់ចំណូលផ្សេងៗ រួមទាំងវិភាគទានដែលបានមកពីប្រភពណាក៏ដោយ នៅធនាគាក្នុងព្រះរាជាណាចក្រកម្ពុជា ដែលមានការទទួលស្គាល់ពីធនាគារជាតិនៃកម្ពុជា ។ ទី៧ – លក្ខន្តិកៈគណបក្សនយោបាយ និងឯកសារផ្សេងៗដែលបញ្ជាក់ពីការបង្កើតគណបក្សនយោបាយ ។
ទី៨ – សេចក្តីប្រកាសរបស់គណបក្សនយោបាយថា ចូលរួមបោះឆ្នោត និងទទួលយកលទ្ធផលបោះឆ្នោតដែលប្រព្រឹត្តិទៅដោយសេរីត្រឹមត្រូវយុត្តិធម៌ និងចូលរួមអនុវត្តច្បាប់ស្តីពីការបោះឆ្នោតជ្រើសតាំងតំណាងរាស្ត្របទបញ្ហា និងនីតិវិធីរបស់គ.ជ.ប និងក្រមសីលធម៌ និងច្បាប់ស្តីពីគណបក្សនយោបាយ ។ ទី៩ – បញ្ជីរាយនាមគណៈកម្មាធិការនាយក ឬគណៈកម្មាធិការអចិន្ត្រៃយ៍ ឬអង្គការសមមូលរបស់គណបក្សនយោបាយ ។ ទី១០ – បង្កាន់ដៃ បង់ប្រាក់តម្កល់ចំនួន១៥លានរៀល ដោយរតនាគារជាតិ ។
ក្នុងករណីគ.ជ.ប ពិនិត្យឃើញថា សំណុំលិខិតរបស់គណបក្សនយោបាយណាមួយពុំបានបំពេញលក្ខខណ្ឌ ស្តីពីការចុះបញ្ជីគណបក្សនយោបាយឈរឈ្មោះបោះឆ្នោត គ.ជ.ប នឹងជូនដំណឹងទៅសាម៉ីគណបក្សនយោបាយនោះវិញ ដើម្បីបំពេញបន្ថែម ឬកែតម្រូវ ។ សាម៉ីគណបក្សនយោបាយត្រូវបំពេញ ឬកែតម្រូវលក្ខខណ្ឌដែលខ្វះខាតយ៉ាងយូរ៥ថ្ងៃ បន្ទាប់ពីថ្ងៃបានទទួលលិខជូនដំណឹងរបស់ គ.ជ.ប ។
ចំពោះគណបក្សនយោបាយវិញអ្នកនាំពាក្យក្រសួងមហាផ្ទៃនាយឧត្តមសេនីយ៍ខៀវ សុភ័គបានឲ្យដឹងថា បច្ចុប្បន្នគិតត្រឹមថ្ងៃទី៣០ ខែមេសា ឆ្នាំ២០១៨ កម្ពុជាមានគណប ក្សនយោបាយចំនួន៣៨ ហើយត្រូវបានចុះបញ្ជីទទួលស្គាល់ភាពស្របច្បាប់ដោយក្រ សួងមហាផ្ទៃខណៈគណបក្សចំនួន២ទៀត ពោល គឺគណបក្សឆន្ទៈខ្មែររបស់កូនលោក គង់ គាំ និងគណបក្សខ្មែរក្រោករបស់លោក សុខសុវណ្ណ វឌ្ឍនាសាប៊ុង កំពុងដំណើរ ការស្វែងរកស្នាមមេដៃ ដើម្បីចុះបញ្ជី ។
សូមជម្រាបថា គណៈកម្មាធិការជាតិរៀបចំការបោះឆ្នោតបានចាប់ផ្តើមការចុះបញ្ជីគ ណប ក្សនយោបាយឈរឈ្មោះបោះឆ្នោត និងបញ្ជីឈ្មោះបេក្ខជនតំណាងរាស្ត្រ ស ម្រាប់ ការ បោះឆ្នោតជ្រើសតាំងតំណាងរាស្ដ្រ នីតិកាលទី៦ ឆ្នាំ២០១៨ ចាប់ពីថ្ងៃទី៣០ ខែមេសាដល់ថ្ងៃទី១៤ ខែឧសភា ឆ្នាំ២០១៨ ៕
ចែករំលែកព័តមាននេះ