រាជធានីភ្នំពេញ ៖ ឆ្នាំ២០១៨នេះ វិស័យការងារបន្តអភិវឌ្ឍន៍រីកចម្រើនគួរឲ្យកត់សម្គាល់ ក្នុងនោះអត្រាមានការងារធ្វើស្មើនឹង៩៩,៣%, បរិមាណការងារសរុបមានប្រមាណជាង១០លាននាក់ ។ ជាមួយគ្នានេះ សហគ្រាស គ្រឹះស្ថានសេដ្ឋកិច្ចក្នុងប្រព័ន្ធ…
រាជធានីភ្នំពេញ ៖ ឆ្នាំ២០១៨នេះ វិស័យការងារបន្តអភិវឌ្ឍន៍រីកចម្រើនគួរឲ្យកត់សម្គាល់ ក្នុងនោះអត្រាមានការងារធ្វើស្មើនឹង៩៩,៣%, បរិមាណការងារសរុបមានប្រមាណជាង១០លាននាក់ ។ ជាមួយគ្នានេះ សហគ្រាស គ្រឹះស្ថានសេដ្ឋកិច្ចក្នុងប្រព័ន្ធ ដែលបានចុះបញ្ជីនៅក្រសួងការងារ និងបណ្តុះបណ្តាលវិជ្ជាជីវៈ មានចំនួនសរុបជាង១ម៉ឺន២ពាន់គ្រឹះស្ថាន កើនឡើង១០,០២% និងមានកម្មករនិយោជិតសរុបជិត១លាន៥សែននាក់ កើនឡើង២១,១១% ធៀបនឹងឆ្នាំ២០១៧ ក្នុងនោះស្ត្រីជាង៨សែននាក់។ នេះបើតាមការអះអាងពីរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ។
ថ្លែងក្នុងពិធីអបអរសាទរខួបលើកទី១៣២ នៃទិវាពលកម្មអន្តរជាតិ ១ ឧសភា ឆ្នាំ២០១៨ នាព្រឹកថ្ងៃទី៣០ មេសា នៅទីស្តីការក្រសួងការងារ លោករដ្ឋមន្ត្រី អុិត សំហេង បានលើកឡើងថា សហគ្រាស គ្រឹះស្ថានសេដ្ឋកិច្ចក្រៅប្រព័ន្ធសរុបមានចំនួនជិត៦សែន មានកម្មករជាង២លាន៤សែននាក់ ដោយវិស័យកសិកម្មមានប្រមាណជាង៤លាននាក់, ពលករធ្វើការនៅក្រៅប្រទេស មានប្រមាណ១លាន២សែននាក់ និងមន្ត្រីសាធារណៈប្រមាណជាង៥សែននាក់ ។
លោកថា ៖« ប្រព័ន្ធអធិការកិច្ចការងារត្រូវបានកែទម្រង់ ពង្រឹងការអនុវត្តច្បាប់ស្តីពីការងារ ច្បាប់ស្តីពីសហជីព ដែលធ្វើឱ្យលក្ខខណ្ឌការងារ និងការទំនាក់ទំនងវិជ្ជាជីវៈកាន់តែមានភាពប្រសើរឡើង។ ទន្ទឹមនឹងនេះ បញ្ហាកូដកម្ម បាតុកម្ម ត្រូវបានដោះស្រាយប្រកបដោយប្រសិទ្ធភាព ។ យន្ដការត្រីភាគីត្រូវបានពង្រឹង និងបន្ដតួនាទីដ៏សំខាន់ក្នុងការដោះស្រាយបញ្ហានានា ដែលទាក់ទងនឹងផលប្រយោជន៍របស់កម្មករនិយោជិត និងនិយោជក » ។
លោកបន្ដថា ចំណែកប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភ័ណ្ឌកាត់ដេរសម្លៀកបំពាក់ និងផលិតស្បែកជើងក្នុងឆ្នាំ២០១៨ បានកើនពីចំនួន១៥៣ដុល្លារទៅ១៧០ដុល្លារ កើន១១,១% បើគិតពីប្រាក់អត្ថប្រយោជន៍ផ្សេងៗទៀត កម្មករនិយោជិតម្នាក់ៗអាចទទួលបានប្រាក់ចំណូលពី១៨៧ ទៅ១៩៨ដុល្លារអាមេរិកក្នុង១ខែ ។ ជាមួយគ្នានេះ រាជរដ្ឋាភិបាលកំពុងរៀបចំច្បាប់ស្តីពីប្រាក់ឈ្នួលអប្បបរមា ដើម្បីធានាការលើកកម្ពស់ជីវភាពរបស់កម្មករនិយោជិតផងដែរ ។
លោកក៏បានលើកឡើងថា គិតត្រឹមត្រីមាសទី១ ឆ្នាំ២០១៨ កម្ពុជាមានសហជីពមូលដ្ឋានកើនរហូតដល់ចំនួន៤.២២៧, សហព័ន្ធសហជីព១៥៨, សហភាពសហជីព២៥, សមាគម៩, អង្គការ៤ និងសមាគមនិយោជក៨ ។
ការអនុវត្តក្របខ័ណ្ឌគោលនយោបាយជាតិគាំពារសង្គម ដែលបានផ្ដល់អត្ថប្រយោជន៍ថ្មីៗ
ជាច្រើនជូនកម្មករនិយោជិក ដូចជា ៖
-បានពិនិត្យ និងព្យាបាលជំងឺនៅតាមមន្ទីរពេទ្យរដ្ឋទាំងអស់ ដោយមិនបង់ប្រាក់ ។
-បានអនុវត្តការផ្តល់ប្រាក់ឈ្នួល១២០% និងការឈប់សម្រាករយៈពេល៣ខែក្នុងពេលសម្រាលកូន ជូនកម្មការិនី ។
-បានអនុវត្តកម្មវិធីផ្តល់ប្រាក់ឧបត្ថម្ភដល់កម្មការិនីសម្រាលកូនក្នុង១ខែជាមធ្យម ៤.៨០០នាក់ ដោយផ្តល់ជូនកូន១នាក់នូវថវិកាចំនួន៤០ម៉ឺនរៀល, កូន២នាក់ ថវិកាចំនួន៨០ម៉ឺនរៀល និងកូន៣នាក់ ថវិកាចំនួន១,២លានរៀល ព្រមទាំងទទួលបានថវិកាបន្ថែមចំនួន៥លានរៀលពីសម្តេចតេជោ និងសម្តេចកិត្តិព្រឹទ្ធបណ្ឌិតផ្ទាល់ ។
-រាជរដ្ឋាភិបាលបានកំណត់ឱ្យនិយោជកជាប់កាតព្វកិច្ចបង់វិភាគទានរបបសន្តិសុខសង្គម ផ្នែកថែទាំសុខភាព១០០% ជំនួសកម្មករនិយោជិត ចាប់ពីខែមករា ឆ្នាំ២០១៨ ។
-រដ្ឋបាលថ្នាក់ក្រោមជាតិ បានត្រួតពិនិត្យជាប្រចាំនូវថ្លៃឈ្នួលផ្ទះ ថ្លៃទឹក និងថ្លៃអគ្គិសនី នៅតាមផ្ទះជួល និងបានផ្តល់ជូនកម្មករនិយោជិតធ្វើដំណើរតាមរថយន្តក្រុងនៅរាជធានីភ្នំពេញ ដោយឥតបង់ប្រាក់ ។
-រាជរដ្ឋាភិបាលកំពុងរៀបចំដាក់ឲ្យអនុវត្តនូវរបបសន្តិសុខសង្គម ផ្នែកសោធននិវត្តន៍ឆ្នាំ២០១៩ ។
-រាជរដ្ឋាភិបាលបានផ្តល់បុរេប្រទានថវិកាចំនួនជាង៤លាន៦សែនដុល្លារសម្រាប់ទូទាត់ប្រាក់ឈ្នួល និងប្រាក់អត្ថប្រយោជន៍ផ្សេងៗជូនកម្មករនិយោជិត ដែលរោងចក្របិទទ្វារដោយសារម្ចាស់រត់ចោល និងរៀបចំបទប្បញ្ញត្តិ ដើម្បីធានាអត្ថប្រយោជន៍របស់កម្មករនិយោជិតចំពោះករណីនេះនាពេលខាងមុខ ។
-រាជរដ្ឋាភិបាលកំពុងបន្តពង្រឹងកិច្ចសហការជាមួយប្រទេសដៃគូ ដើម្បីបន្តផ្តល់ឱកាសការងារជូនពលករ ការពារសិទ្ធិ និងផលប្រយោជន៍ពលករ ដែលកំពុងបម្រើការងារនៅប្រទេសទាំងនោះ និងបង្កលក្ខណសម្បត្តិឱ្យបងប្អូនទទួលបានរបបគាំពារសង្គមទាំងបច្ចុប្បន្ន និងពេលវិលត្រឡប់មកវិញ ៕
ចែករំលែកព័តមាននេះ