រាជធានីភ្នំពេញ ៖ បច្ចុប្បន្ន សហគ្រិនវ័យក្មេងកម្ពុជាជាច្រើនមានគំនិតច្នៃប្រឌិតខ្ពស់ក្នុងការបង្កើត និងពង្រីកអាជីវកម្មថ្មីៗបន្ថែមទៀត ក៏ប៉ុន្តែដោយសារកង្វះខាតផ្នែកហិរញ្ញវត្ថុ បាននិងកំពុងក្លាយជាឧបសគ្គរារាំងដល់ការរីកលូតលាស់អាជីវកម្មរបស់ពួកគេ ។ នេះបើតាមការលើកឡើងពីប្រធានសមាគមសហគ្រិនវ័យក្មេងកម្ពុជា ។
លោក គួច ផេង ប្រធានសមាគមរូបនេះបានលើកឡើងថា បច្ចុប្បន្ននេះ សហគ្រិនវ័យក្មេងដែលបានចុះឈ្មោះនៅក្នុងសមាគម មានរហូតដល់ជាង២០០នាក់ ។ បើសិនជាពួកគាត់បានពង្រីកអាជីវកម្មម្នាក់បន្តិចៗនោះ ឱកាសការងារដែលផ្ដល់ជូនប្រជាពលរដ្ឋកម្ពុជា នឹងមានកាន់តែច្រើន ក៏ប៉ុន្តែពួកគាត់មិនអាចពង្រីកអាជីវកម្មតាមអ្វីដែលពួកគាត់គ្រោង ឬមានផែនការបានរលូនទេ ។
លោកនិយាយថា ៖« កត្តាទុនបង្វិល ឬហិរញ្ញវត្ថុ យកមកពង្រីកអាជីវកម្ម គឺជាការរារាំងមួយដ៏សំខាន់សម្រាប់សហគ្រិនវ័យក្មេង ក៏ដូចជាសហគ្រិនទូទៅនៅក្នុងប្រទេសកម្ពុជា » ។
លោកបន្តថា ដើម្បីដោះស្រាយនូវបញ្ហាទាំងនេះ សមាគមសហគ្រិនវ័យក្មេងកម្ពុជាបានព្យាយាមស្វែងរកដៃគូពីខាងក្រៅ ដើម្បីជួយពន្យល់ និងរៀបចំផែនការអាជីវកម្មផ្សេងៗធ្វើឲ្យអាជីវកម្មបានលូតលាស់ម្ដងបន្តិចៗ បើទោះបីជាមិនរីកចម្រើនភ្លាមៗក៏ដោយ ។ ជាក់ស្ដែងកន្លងមកនេះ សមាគមសហគ្រិនវ័យក្មេងកម្ពុជា បានសហការជាមួយទីភ្នាក់ងារកិច្ចសហប្រតិបត្តិការអន្តរជាតិជប៉ុនប្រចាំកម្ពុជា ឲ្យជួយរៀបចំប្រព័ន្ធគ្រប់គ្រង និងហេដ្ឋារចនាសម្ព័ន្ធអាជីវកម្មឲ្យកាន់តែប្រសើរឡើង ។
លោកបន្ថែមទៀតថា បច្ចុប្បន្ននេះ លោកមើលឃើញថា សហគ្រិនកម្ពុជាជាច្រើនបានចាប់ផ្ដើមធ្វើអាជីវកម្មរបស់ខ្លួនជាលក្ខណៈអាជីវកម្មខ្នាតតូច ហើយភាគច្រើននៃអាជីវកម្មដែលសហគ្រិនបានចាប់ផ្ដើមថ្មីៗនាពេលបច្ចុប្បន្ននេះ គឺផ្ដោតសំខាន់ទៅលើបច្ចេកវិទ្យា ពោលគឺជាក្រុមហ៊ុនដំណោះស្រាយបច្ចេកវិទ្យា និងប្រព័ន្ធផ្សព្វផ្សាយ ជាដើម ពីព្រោះវិស័យនេះបាននិងកំពុងតែរីកលូតលាស់បន្តិចម្ដងៗនៅក្នុងព្រះរាជាណាចក្រកម្ពុជា ។
លោកស្រីឧកញ៉ា កែវ មុំ អគ្គនាយិកាក្រុមហ៊ុនផលិតនំស្រួយលីលី បានឲ្យដឹងដែរថា បញ្ហាហិរញ្ញវត្ថុ ជាកត្តាដែលមិនអាចធ្វើឲ្យម្ចាស់អាជីវកម្មពង្រីកខ្លួនបានលឿន ដូចនេះហើយពួកគាត់ត្រូវពង្រីកម្ដងបន្តិចៗទៅតាមលទ្ធភាពដែលខ្លួនមាន ។
លោកស្រីនិយាយថា ៖« សហគ្រិនមួយចំនួនបានដំណើរការអាជីវកម្មរបស់ខ្លួនដោយរលូន ហើយចង់ពង្រីកបន្ថែមទៀត តែមិនមានទុនគ្រប់គ្រាន់សម្រាប់ពង្រីក ។ អីចឹងហើយទើបធ្វើឲ្យដំណើរការពង្រីកត្រូវយឺតយ៉ាវ និងរង់ចាំប្រាក់ចំណេញរបស់ខ្លួនយកមកពង្រីក ។ បើសិនជាពួកគេមានទុនគ្រប់គ្រាន់នោះ ការពង្រីកអាជីវកម្មវាមិនពិបាកទេ ហើយក៏អាចផ្ដល់ការងារបានកាន់តែច្រើនដល់ប្រជាពលរដ្ឋដែរ។ ជាពិសេសនោះ កម្ពុជាក៏មានផលិតផលកាន់តែសម្បូរបែបសម្រាប់លក់នៅលើទីផ្សារក្នុងស្រុក ក៏ដូចជាសម្រាប់នាំចេញទៅក្រៅប្រទេសផងដែរ » ។
ដោយសារវិស័យនេះកំពុងក្លាយជាសូចនាករក្នុងការគាំទ្រកំណើនសេដ្ឋកិច្ច រាជរដ្ឋាភិបាលបាននិងកំពុងគិតគូរជួយជ្រោមជ្រែង តាមរយៈការបង្កើតធនាគារ SME Bank ដែលគ្រោងនឹងដាក់ឲ្យដំណើរការនៅឆ្នាំ២០១៩ខាងមុខ និងបង្កើតមូលនិធិគម្រោងអភិវឌ្ឍន៍សហគ្រិនកម្ពុជា (Cambodia Entrepreneurship Development Project Fund) ដើម្បីកៀរគរប្រភពទុនសម្រាប់ចូលរួមអភិវឌ្ឍន៍វិស័យSME កម្ពុជា ឲ្យកាន់តែរីកចម្រើន និងមានភាពប្រកួតប្រជែងនៅក្នុងតំបន់ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបញ្ជាក់ថា រាជរដ្ឋាភិបាលបានទទួលស្គាល់ពីសារសំខាន់នៃសហគ្រាសធុនតូច និងមធ្យម ហើយបានប្រឹងប្រែងជំរុញវិស័យនេះតាមរយៈក្របខ័ណ្ឌ ការអភិវឌ្ឍសហគ្រាសធុនតូច និងមធ្យម ឆ្នាំ២០០៥-២០១០ យុទ្ធសាស្ត្រចតុកោណ និងគោលនយោបាយអភិវឌ្ឍន៍ឧស្សាហកម្មកម្ពុជា ឆ្នាំ២០១៥-២០២៥ ដែលមានគោលដៅពង្រីកនិងធ្វើទំនើបកម្មសហគ្រាសធុនតូច និងមធ្យម តាមរយៈជំនួយបច្ចេកទេស ធនធានហិរញ្ញវត្ថុ និងការគាំទ្រទីផ្សារ ជាដើម ។
តាមរបាយការណ៍បូកសរុបលទ្ធផលការងាររបស់ក្រសួងឧស្សាហកម្ម និងសិប្បកម្មរយៈពេល៥ឆ្នាំ (២០១៣-២០១៧) បានបង្ហាញថា សហគ្រាសធុនតូច និងមធ្យម និងសិប្បកម្ម ឆ្នាំ២០១៧ មានសរុបប្រមាណជាង១៥ម៉ឺនមូលដ្ឋាន ស្មើជាង២៩%នៃចំនួនសហគ្រាសធុនតូច និងមធ្យម និងសិប្បកម្មទាំងអស់ ដែលបានបង្កើតការងារសរុបចំនួនជាង១លានកន្លែង ព្រមទាំងបានប្រើប្រាស់ទុនសមមូលសរុបសម្រាប់ការវិនិយោគប្រមាណជា៤.៧០០លានដុល្លារ និងនាំមកនូវផលរបរប្រចាំឆ្នាំប្រមាណជាង៩៣ពាន់លានដុល្លារ ៕
ចែករំលែកព័តមាននេះ