រាជធានីភ្នំពេញ ៖ ការសម្តែងសិល្បៈល្ខោនបាសាក់រឿងអក្សរសិល្ប៍ខ្មែរគេតែងចាត់ទុកតួអង្គយក្សជាសភាវៈមួយតំណាងឲ្យភាពសាហាវ ឃោរឃៅ ព្រៃផ្សៃ ហើយបើមានតួអង្គយក្សនោះផ្ទៃរឿងទាំងមូលគឺប្រាកដជាសម្បូរដោយភាពទំនាស់ ការកាប់សម្លាប់គ្នា និងការរំលោភបំពាន ។ អ្នកទស្សនាមួយចំនួនតែងតែមិនសប្បាយចិត្ត ឬក៏ស្អប់សម្រាប់តួយក្ស ក្នុងផ្ទៃសាច់រឿងខ្វះការពិចារណា ខណៈពេលដែលតួអង្គក្រៅឆាកអាចជាមនុស្សស្លូតបូត សុភាពរាបសា ខុសពីគ្នាឆ្ងាយពីទិដ្ឋភាពនៅក្នុងឆាក ។
មហាជនភាគច្រើនហាក់មិនបានដឹងទេថា ភាពលំបាកនានាដែលបានកើតមានឡើង ចំពោះតួអង្គដែលសម្តែងជាយក្សនៅក្នុងសាច់រឿង ខណៈពេលដែលមនុស្សមួយចំនួនទៀតបានចាត់ទុកអ្នកសម្តែងតួយក្សអាចជាមនុស្សដែលមានចរិតកាចដូចយក្សដែរ ។
ជាក់ស្តែងតួអង្គយក្សត្រូវបានគេចាត់ទុកថា ជាតួអង្គមួយដែលសំខាន់នៅក្នុងរឿងល្ខោនខ្មែរ ខណៈពេលដែលតួយក្សជាតួអង្គធ្វើឲ្យមានភាពកន្ត្រាក់ឆាក និងពញ្ញាក់ស្មារតីអ្នកមើលជក់ចិត្ត ហើយពេលខ្លះតួយក្សក៏បានផ្តល់ភាពសប្បាយរីករាយផងដែរដល់អ្នកទស្សនា ។
ជាការកត់សម្គាល់តួអង្គយក្សបានអះអាងស្រដៀងគ្នាថា ទម្រាំសម្តែងបានឲ្យធ្វើឲ្យទស្សនិកជនទស្សនាយ៉ាងជក់ចិត្តនោះ គឺមិនមែនជាការងាយឡើយ ខណៈពេលដែលការសម្តែងជាន់ឆាកទល់ភ្លឺ តែកម្រៃបានមកហាក់មិនសមកម្លាំងដែលបញ្ចេញទេ ។
ជាអ្នកសម្តែងល្ខោនតួយក្សដែលមានបទពិសោធន៍ជាង១០ឆ្នាំលោក សុង សារឿន បានអះអាង កាលពីពេលថ្មីៗកន្លងមកថា វាពិបាកសម្តែងខ្លាំងណាស់នៅពេលដែលយើងមិនទាន់ចេះស្ទាត់លើជំនាញតួអង្គនេះ ។ នៅមុនពេលសម្តែងតួអង្គយក្សម្នាក់ត្រូវចំណាយពេលគូរមុខប្រមាណ១ទៅ២ម៉ោងទើបរួចរាល់ ហើយសម្តែងនេះទៀតសោធត្រូវជាន់ឆាកទល់ភ្លឺ និងត្រូវប្រើសំឡេងស្រែកស្ទើរបែកបំពង់កក៏មាន ។
បើតាមលោកសុង សារឿន ពេលខ្លះសម្តែងទៅដើម្បីឲ្យសមនឹងសាច់រឿង និងជាតួអង្គយក្សដែលមានភាពកាចសាហាវនោះគឺត្រូវអ្នកទស្សនាស្អប់ រហូតពេលខ្លះមានអ្នកគប់ដុំដី និងស្រែកជេរ ខ្លាំងៗផងដែរ ។
ក្នុងវ័យ៤១ឆ្នាំលោកសុង សារឿន បានឲ្យដឹងទៀតថា សម្រាប់លោកដែលជាតួយក្ស គឺសម្តែងម្តងបានប្រាក់ប្រមាណជា១០ម៉ឺនរៀល ឬលើសនេះតិចតួចប៉ុណ្ណោះ បើទោះបីជាត្រូវសម្តែងនៅទីជិត ឬទីឆ្ងាយក៏ដោយ ។ តម្លៃនេះសម្រាប់លោកដែលបានចំណាយពេលការហាត់រៀន និងការចំណាយកម្លាំងសម្តែងនោះ គឺហាក់មានចំនួនតិចតួច ។ ប៉ុន្តែយ៉ាងណាក្តីលោកពេញចិត្តដែលមានឱកាសបញ្ចេញទេពកោសល្យរបស់ខ្លួន ។
តួយក្សដែលមានមូលដ្ឋាននៅក្នុងខេត្តកំពង់ស្ពឺរូបនេះបានលើកឡើងទៀតថា ដោយសារតែអាជីពល្ខោននេះមិនសូវជាផ្តល់កម្រៃគ្រប់គ្រាន់សម្រាប់ផ្គត់ផ្គង់គ្រួសារនោះ លោកបានបង្កើតវង់ភ្លេងខ្មែរ ដើម្បីរកចំណូលបន្ថែម។ ភ្លេងខ្មែរអាចលេងពេលថ្ងៃបាន ចំណែកល្ខោនអាចឆ្លៀតលេងពេលយប់ ដោយមិនប៉ះពាល់ម៉ោងសម្តែងគ្នាឡើយ ។
ជាតួអង្គយក្សនៅក្នុងវង់ល្ខោនលោកអុល សំអាង ក្នុងបទពិសោធន៍ជាង៥ឆ្នាំ លោកនឿន សុភា ឲ្យដឹងថា សម្រាប់តួអង្គយក្សរបស់លោកសម្តែងមួយយប់បានតម្លៃប្រមាណ១៦ម៉ឺនរៀល ហើយតម្លៃនេះថេរមិនថាជិត ឬឆ្ងាយឡើយ ។តម្លៃនេះគឺសម្រាប់លោកផ្ទាល់មិនសូវមានបញ្ហាចោទឡើយ បើទោះបីជាវាហាក់មិនច្រើន សម្រាប់ផ្កត់ផ្គង់គ្រួសារក៏ដោយ ។ ឆ្លៀតពីការលេងល្ខោនលោកក៏បានធ្វើស្រែចម្ការ ដើម្បីបានប្រាក់ចំណូលគួបផ្សំពីការសម្តែងល្ខោន ដែលអាចឲ្យគ្រួសាររបស់លោករស់នៅក្នុងជីវភាពមួយសមរម្យ។
បើតាមលោកនឿន សុភា កាលពីមិនទាន់សូវចេះសម្តែងតួអង្គយក្ស លោកបានខិតខំយ៉ាងលំបាកទាំងកាយវិការ និងការប្រើប្រាស់សំឡេង រហូតពេលខ្លះបានធ្វើឲ្យលោកធ្លាក់ខ្លួនឈឺព្យួរសេរ៉ូមក៏មាន ។ ពេលខ្លះទៀតមេក្រូមិនសូវលឺដោយសារត្រូវទឹកភ្លៀង តម្រូវឲ្យលោកប្រើប្រាស់សំឡេងស្រែកខ្លាំងជាងធម្មតា ដែលជាហេតុធ្វើឲ្យលោកស្ងួត និងស្អកក ។
តួអង្គយ្សដែលមានដើមកំណើតពីខេត្តកំពង់ចាម និងមានកូនម្នាក់រូបនេះឲ្យដឹងបន្ថែមថា សម្រាប់រូបលោកផ្ទាល់គឺមិនមែនអាចសម្តែងតែតួយក្សតែមួយមុខនោះឡើយ ពោលលោកអាចសម្តែងជាតួសេដ្ឋី ក្មេងស្ទាវ និងតួចោរក៏បានដែរ ។
ឆ្លងកាត់បទពិសោធន៍នៃការសម្តែងល្ខោនបាសាក់ជាង៥ឆ្នាំ បុរសដែលមានវ័យ៣២ឆ្នាំរូបនេះបានឆ្លងកាត់នូវរឿងរ៉ាវជាច្រើនទាំងអាក្រក់ និងល្អ ជាពិសេសពេលសម្តែងជាតួដែលគេស្អប់ ម្តងៗនោះគឺត្រូវអ្នកទស្សនាគប់ថង់ ដបទឹកសុទ្ធក៏មាន ។ ជាងនេះទៅទៀតពេលសម្តែងតួអង្គដែលនិយាយទៅប៉ះពាល់ដល់ក្មេងស្ទាវឈាមរាវនោះ គឺតែងតែត្រូវពួកគេរករឿង ឌឺ និងគប់ដំបូលឆាកថែមទៀតផង ។
បើទោះបីជាមានរឿងរ៉ាវដូចនេះក៏ដោយលោកនឿន សុភា មិនរារែកចិត្តក្នុងការបន្តអាជីពជាអ្នកសម្តែងល្ខោនឡើយ ដោយសារតែបច្ចុប្បន្នវង់ល្ខោនរបស់លោកកំពុងមានទីផ្សារជាបន្តបន្ទាប់ ៕
ចែករំលែកព័តមាននេះ