រាជធានីភ្នំពេញ ៖ បន្ទាប់ពីខ្ចរខ្ចាយកិត្តិនាមក្នុងតំណែងជាតួអង្គទេពធីតាឆ្នាំថ្មី ក្នុងកម្មវិធីអង្គរសង្ក្រាន្តមក កញ្ញាសុគា គឹមលាង ត្រូវផលិតកម្មមួយចំនួនទាក់ទងឲ្យសម្តែងភាពយន្ត ប៉ុន្តែឳពុកម្តាយនាងមិនឲ្យសម្តែងទេ ។
ក្នុងវ័យ២០ឆ្នាំកញ្ញាសុគា គឹមលាង ត្រូវមហាជនកោតសសើរចំពោះរូបសម្រស់ដ៏ស្រស់សោភារបស់នាងពេលគ្រងសម្លៀកបំពាក់ជាតួអង្គទេពធីតាក្នុងកម្មវិធីអង្គរសង្ក្រាន្តកាលពីពេលថ្មីៗកន្លងមក ។ ទាំងរូបសម្រស់ និងទេពកោសល្យក្នុងនាមជាអ្នករបាំព្រះរាជទ្រព្យផងនោះ សុគា គឹមលាង ទាក់ចិត្តម្ចាស់ផលិតករភាពយន្តចង់បាននាងចូលរួមសម្តែងភាពយន្ត ។ ទោះជាយ៉ាងណាក្តីយុវតីដែលមានប្រភពកំណើតនៅរាជធានីភ្នំពេញរូបនេះមិនអាចបំពេញបំណងផលិតករទាំងនោះឡើយ ដោយសារតែឪពុកម្តាយរបស់នាងមិនផ្តល់ឱកាសឲ្យនាងសម្តែងភាពយន្តទេ ។
ជួបកោះសន្តិភាពតាមទូរស័ព្ទកាលពីពេល ថ្មីៗកន្លងមក កញ្ញាសុគា គឹមលាង ឲ្យដឹងថា បន្ទាប់ពីនាងបានទទួលការចាប់អារម្មណ៍ពីការតុបតែងខ្លួនជាតួអង្គទេពធីតាអង្គរសង្ក្រាន្តមក មានផលិតកម្មជាច្រើនទាក់ទងនាងឲ្យថតភាពយន្ត ។ ផលិតកម្មទាំងនោះបានទាក់ទងនាងឲ្យសម្តែងទាំងតួឯក និងតួរង ដោយសារតែគេមើលឃើញពីទេពកោសល្យដែលនាងមានលើផ្នែកសិល្បៈ ។ នាងមិនអាចចូលរួមសម្តែងតាមការស្នើសុំទាំងអស់នោះឡើយ ដោយសារតែមិនមានការគាំទ្រណាពីឪពុកម្តាយរបស់នាង ។ ពួកគាត់ស្រឡាញ់របាំព្រះរាជទ្រព្យដែលនាងបានហាត់រៀន ហើយចង់ឲ្យផ្តោតតែលើជំនាញនេះ។
សុគា គឹមលាង បើទោះបីជាមិនអាចចូលរួមសម្តែងភាពយន្តក៏ដោយ ប៉ុន្តែនាងមានឱកាសបានថតជាស្ប៉តពាណិជកម្ម និងថតសំអាងការខ្លះៗដែរ ។
ប្រសិនបើទៅថ្ងៃមុខមានឱកាសនោះ សុគា គឹមលាង ចង់សម្តែងក្នុងខ្សែភាពយន្តដែលនិយាយពីប្រវត្តិ និងតម្លៃនៃសិល្បៈរបាំបុរាណខ្មែរ ព្រោះការសម្តែងរឿងប្រភេទនេះគឺមិនសូវមានឈុតស្នេហា និងការកាច់កុងគ្នាច្រើន ម្យ៉ាងវាក៏ជាការលើកកិត្តិយសដល់សិល្បៈបុរាណខ្មែរយើងផងដែរ ។
ចំពោះឱកាសគរងតំណែងតួអង្គទេពធីតាសុគា គឹមលាង ឲ្យដឹងថា ក្រោមការជ្រើសរើសដោយផ្ទាល់ពីអ្នកគ្រូរបស់នាង ហើយក៏មិនមែនជាលើកដំបូងសម្រាប់នាងដែរ កាលពីឆ្នាំមមី នាងក៏បានគ្រងតំណែងនេះដែរ ។
សុគា គីមលាង មានមោនភាពដែលនាងមានឱកាសបានគ្រងសម្លៀកបំពាក់បុរាណខ្មែរ និងតំណែងជាតួអង្គទេពធីតា ។ នាងគ្រោងនឹងបង្ហាញម៉ូដសម្លៀកបំពាក់បុរាណខ្មែរ ថ្មីៗទៀតនាពេលខាងមុខ ។
ក្នុងវ័យ២០ឆ្នាំ សុភា គឹមលាង បានចាប់អាជីពជាអ្នករាំរបាំបុរាណតែម្នាក់គត់ក្នុងគ្រួសារ ដោយនាងគ្មានឈាមជ័រណាមួយជាអ្នកសិល្បៈ ក្រៅពីអាជីពរកស៊ី និងអ្នកធ្វើការនោះនោះទេ ។
សុភា គឹមលាង បានចំណាយពេលហាត់របាំបុរាណតាំងពីអាយុ១០ឆ្នាំ ។ ក្នុងនាមជាអ្នករបាំបុរាណស្រីស្អាតរូបនេះធ្លាប់បានទៅសម្ដែងនៅប្រទេសជាច្រើនដើម្បីផ្សាយពីវប្បធម៌ជាតិ ដូចជា ចិន វៀតណាម អាឡឺម៉ង ជាដើម ។ លើសពីនេះទៀត ក្រសួងមន្ទីរមួយចំនួនតែងតែស្នើឲ្យនាងរាំជូនភ្ញៀវជាតិ និងអន្តរជាតិទស្សនាទាំងនៅក្នុង និងក្រៅប្រទេសផងដែរ ៕
ចែករំលែកព័តមាននេះ