រាជធានីភ្នំពេញ ៖ បុរសម្នាក់ដែលគេស្គាល់ថាជាជនជាតិក្រូអាត មានជំងឺបេះដូងប្រចាំកាយបានដេកផ្កាប់មុខស្លាប់រហូតមានសភាពហើមស្អុយទៅហើយ បង្កឲ្យភ្ញាក់ផ្អើលដល់ប្រជាពលរដ្ឋ និងសមត្ថកិច្ចកាលពីវេលាម៉ោង០៦និង៣០នាទីយប់ ថ្ងៃទី២៣ ខែមេសា ឆ្នាំ២០១៨ តាមបណ្ដោយផ្លូវ៨៦ នៅចំណុចបន្ទប់ជួលលេខ៦ ផ្ទះលេខ៩៧B ស្ថិតនៅក្នុងក្រុម២៦៩ ភូមិ២២ សង្កាត់ស្រះចក ខណ្ឌដូនពេញ ។ សពជនរងគ្រោះដែលស្លាប់មានឈ្មោះ NINOSLAV MILIKOVIC ភេទប្រុស អាយុ៦៩ឆ្នាំ ជាជនជាតិក្រូអាត ស្នាក់នៅចំណុចកើតហេតុខាងលើ ។
តាមប្រភពព័ត៌មានពីសាក្សីដែលជាម្ចាស់ផ្ទះមានឈ្មោះ លី សូសាន ភេទប្រុស អាយុ៦៦ឆ្នាំ ស្នាក់នៅចំណុចកើតហេតុខាងលើ បានរៀបរាប់ប្រាប់ឲ្យដឹងថា ជនរងគ្រោះបានមកជួលបន្ទប់លេខ០៦ក្នុងតំលៃមួយខែ៥០ដុល្លារ រស់នៅបានប៉ុន្មានខែនេះទេ កន្លងមកជនរងគ្រោះតែងតែប្រាប់អ្នកជិតខាងដែលជាជនជាតិបរទេសដូចគ្នាថា ខ្លួនមានជំងឺបេះដូង និងជំងឺលើសឈាម ហើយពេលដែលជនរងគ្រោះធ្វើទុកម្តងៗតែងតែមានអាការៈតឹងទ្រូង ពិបាកដកដង្ហើមណាស់រួចក៏ដើរទៅទិញថ្នាំផឹកដោយខ្លួនឯង លុះពេលដល់ថ្ងៃកើតហេតុខាងលើ អ្នកដែលរស់នៅជិតខាងគាត់បានធំក្លិនស្អុយចេញមកពីបន្ទប់០៦ ហើយពេលនោះដែលអ្នកជិតខាងបានដើរទៅរុញទ្វារមិនបានចាក់សោ ស្រាប់តែប្រទះឃើញសពជនរងគ្រោះដេកផ្កាប់មុខហើយហើមស្អុយ សង្ស័យស្លាប់៤ទៅ៥ថ្ងៃបានជាហើមបែបនេះ ភ្លាមៗនោះដែរ ក៏បង្កឲ្យមានការភ្ញាក់ផ្អើលដល់ប្រជាពលរដ្ឋនាំគ្នាចោមរោមមើលរួម និងសមត្ថកិច្ចចុះមកធ្វើកោសល្យវិច្ច័យ ។
តាមការសន្និដ្ឋាន និងវាយតម្លៃរបស់គ្រូពេទ្យ និងបច្ចេកទេសវិទ្យាសាស្ត្រ នៃសង្នការដ្ឋានរាជធានីភ្នំពេញ គឺសពជនរងគ្រោះស្លាប់ដោយសារតែជំងឺគាំងបេះដូង ។ ក្រោយពេលកើតហេតុ សពជនរងគ្រោះត្រូវបានសមត្ថកិច្ចដឹកយកទៅតម្កល់នៅមន្ទីរពេទ្យរុស្ស៊ី ៕
ចែករំលែកព័តមាននេះ