រាជធានីភ្នំពេញ ៖ បុរសជនជាតិអាមេរិកាំងវ័យ២៩ឆ្នាំម្នាក់ ត្រូវបានគេប្រទះឃើញដេកផ្ងារពោះស្លាប់នៅបន្ទប់ជាន់ទី៤ ក្នុងផ្ទះសំណាក់មួយកន្លែង ខណៈពេលដែលដល់ថ្ងៃចេញទៅវិញហើយ មិនទាន់ឃើញចុះ បុគ្គលិកឡើងទៅមើល ទើបដឹង និងបង្កការភ្ញាក់ផ្អើលកើតឡើងតែម្តង ។ ការណីនេះដែរ បានកើតឡើងកាលពីវេលាម៉ោង១០និង០០ព្រឹក ថ្ងៃទី២០ ខែមេសា ឆ្នាំ២០១៨ នៅចំណុចបន្ទប់លេខ២១១ ជាន់ទី៤ ក្នុងផ្ទះសំណាក់មួយកន្លែង ដែលមានទីតាំងតាមបណ្ដោយផ្លូវលេខ៣១០ ក្នុងសង្កាត់អូឡាំពិក ខណ្ឌចំការមន ។
តាមប្រភពពីសម្ថកិច្ចបានប្រាប់ឱ្យដឹងថា បុរសរងគ្រោះមានឈ្មោះ CHAGNON ROSS WESTCOTT អាយុ២៩ឆ្នាំ មុខរបរជាភ្ញៀវទេសចរ កាន់លិខិតឆ្លងដែនលេខ ៧២០៥១៦៨៤៩ ត្រូវបានគេប្រទះឃើញដេកស្លាប់ផ្ងារពោះនៅលើគ្រែពូកក្នុងបន្ទប់ស្នាក់នៅរបស់ខ្លួន ។ បុរសរងគ្រោះបានចូលមកជួលបន្ទប់លេខ២១១ ជាន់ទី៤ របស់ផ្ទះមួយកន្លែង ស្នាក់នៅតែម្នាក់ឯង នៅវេលាម៉ោង១២ថ្ងៃត្រង់ ថ្ងៃទី១៨ ខែមេសា ឆ្នាំ២០១៨ កន្លងទៅនេះ និងត្រូវចេញទៅវិញក្នុងថ្ងៃទី២០ ខែមេសា នេះវិញនោះ ។
តាមប្រភពដដែលបានប្រាប់បន្តទៀតថា ដោយមានការសង្ស័យដល់ថ្ងៃចេញហើយ នៅមិនទាន់ឃើញបុរសជនជាតិអាមរិកាំងរូបនេះចុះមកទៀតនោះ បុគ្គលិករបស់ផ្ទះសំណាក់ម្នាក់ក៏បានឡើងទៅមើល ក្នុងគោលបំណងចង់សួរនាំគាត់ថា តើរូបគាត់ត្រូវចេញ ឬក៏ស្នាក់នៅបន្តទៀត ពេលដែលបើកទ្វារចូលក៏ស្រាប់តែប្រទះឃើញរូបគេដេកស្លាប់ផ្ងារពោះនៅលើគ្រែពូកបាត់ទៅហើយ ទើបបង្កឲ្យមានការភ្ញាក់ផ្អើលកើតឡើង និងរាយការណ៍ប្រាប់កម្លាំង មានសម្ថកិច្ចមូលដ្ឋានឲ្យដឹងពីរឿងនេះផងដែរ ។
ក្រោយពេលកើតហេតុ កម្លាំងមានសម្ថកិច្ចមូលដ្ឋាន និងជំនាញក៏បានចុះមកដល់ផ្ទះសំណាក់កើតហេតុខាងលើ ដើម្បីធ្វើការត្រួតពិនិត្យ និងកោសលវិច្ច័យទៅលើសាកសពបុរសជនជាតិអាមរិកកាំងខាងលើដោយបានបញ្ជាក់ថា «បុរសបុរសរងគ្រោះរូបនេះគាត់បានស្លាប់ដោយសារតែជំងឺគាំងបេះដូងពិតប្រាកដមែន» ទើបបញ្ជូនយកទៅតម្កល់ទុកនៅ មន្ទីរពេទ្យមិត្តភាពខ្មែរសូវៀត ដើម្បីរង់ចាំក្រុមគ្រួសារមកទទួលយកទៅកាន់ប្រទេសកំណើតរបស់គេវិញ ៕
ចែករំលែកព័តមាននេះ