ខេត្តក្រចេះ ៖ ស្ត្រីម្នាក់ដែលត្រូវសត្វឪម៉ាល់ទិចសុះសាច់នៅពេលឡើងបេះផ្លែដូងនៅខាងក្រោយផ្ទះបណ្តាលឱ្យស្លាប់យ៉ាងអាណោចអាធ័ម បើទោះបីជាត្រូវបាននាំមកសង្គ្រោះនៅមន្ទីរពេទ្យជាជាច្រើនថ្ងៃយ៉ាងណាក្តី។
ស្ត្រីរងគ្រោះខាងលើឈ្មោះ ឌីន សុខមាន អាយុ៣៧ឆ្នាំ រស់នៅសង្កាត់កោះទ្រង់ ក្រុងក្រចេះ បានជួបហេតុការណ៍សត្វឪម៉ាល់ទិចនេះកាលពីថ្ងៃទី១០ មេសា និងបានស្លាប់នៅថ្ងៃទី១៨ មេសា ក្រោយពីត្រូវក្រុមគ្រួសារនាំទៅសង្គ្រោះដល់មន្ទីរពេទ្យនៅភ្នំពេញបានរយៈពេល៧ថ្ងៃ។
នាយប៉ុស្តិ៍នគរបាលរដ្ឋបាលកោះទ្រង់លោកអនុសេនីយ៍ឯក ថាន សេរី បានឲ្យដឹងថា ស្ត្រីរងគ្រោះត្រូវសត្វឪម៉ាល់ទិចយ៉ាងសុះសាច់លើរាងកាយនៅពេលដែលឡើងបេះផ្លែដូងកម្ពស់៥ម៉ែត្រនៅខាងក្រោយផ្ទះ។
បើតាមសាច់ញាតិស្ត្រីរងគ្រោះប្រាប់ថា នៅថ្ងៃកើតហេតុ ស្ត្រីរងគ្រោះបានយកជណ្តើរដាក់ឡើងបេះផ្លែដូងដោយស្ត្រីរងគ្រោះជាអ្នកឡើងបេះ ចំណែកឯប្តីជាអ្នកទប់ជណ្តើរពីក្រោម។ នៅពេលលូកដៃមួលផ្លែដូងក៏ប៉ះចំសំបុកឪម៉ាល់មួយសំបុកធំដែលទុំនៅនិងធៀងដូង ស្រាប់តែឪម៉ាល់ចេញពីសំបុកចោមរោមទិច ទោះជាស្ត្រីរងគ្រោះត្រូវប្តីនាំរត់គេចចូលក្នុងពាងទឹកក៏ដោយ ក៏ហ្វូងឪម៉ាល់នៅតែតាមទិចដដែល។ ប៉ុន្តែអ្វីដែលចម្លែកនោះ គឺហ្វូងឪម៉ាល់ទាំងរាប់រយក្បាលនោះដេញទិចតែស្ត្រីរងគ្រោះម្នាក់ប៉ុណ្ណោះ ចំណែកឯប្តី និងអ្នកភូមិដែលទៅជួយក្បែរនោះមិនត្រូវពពួកសត្វទាំងនេះទិចនោះទេ។
ក្រោយពេលកើតហេតុភ្លាម ស្ត្រីរងគ្រោះត្រូវបាននាំមកសង្គ្រោះនៅមន្ទីរពេទ្យខេត្ត តែដោយអាការធ្ងន់ធ្ងរក៏ត្រូបញ្ជូនបន្តនៅភ្នំពេញ ក្រោយមកក៏ត្រូវបានស្លាប់ដោយក្រុមគ្រូពេទ្យអះអាងថា ស្ត្រីរងគ្រោះទទួលរងនូវជាតិពិសធ្ងន់ធ្ងរពីសត្វឪម៉ាល់ចូលពេញរាងកាយទៅហើយ៕
ចែករំលែកព័តមាននេះ