រាជធានីភ្នំពេញ ៖ អនុវត្តតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋបាលរាជធានីភ្នំពេញបានចាប់ផ្តើមបញ្ចេញរថយន្តក្រុងដឹកជញ្ជូនអ្នកដំណើរថ្ងៃដំបូង ដើម្បីដឹកជញ្ជូនប្រជាពលរដ្ឋដែលត្រូវចាកចេញពីរាជធានីភ្នំពេញឆ្ពោះទៅតាមបណ្តាខេត្ត ក្រុងនានាក្នុងឱកាសបុណ្យចូលឆ្នាំថ្មីប្រពៃណីជាតិនេះ ។
មន្ត្រីរដ្ឋបាលរាជធានីភ្នំពេញបានឲ្យដឹងថា រថយន្តក្រុងដឹកជញ្ជូនអ្នកដំណើរចំនួន៦០គ្រឿង ត្រូវដាក់ពង្រាយតាមគោលដៅច្រកចេញចូលរាជធានីភ្នំពេញនៅថ្ងៃដំបូងនេះ គេសង្កេតឃើញបងប្អូនប្រជាពលរដ្ឋទាំងគ្រួសារ និងមិត្តភក្តិរបស់ខ្លួនឡើងជិះរថយន្តដោយក្តីសោមនស្សរីករាយតាមការរៀបចំរបស់រដ្ឋបាលរាជធានីភ្នំពេញ ។
លោកឃួង ស្រេង អភិបាលនៃគណៈអភិបាលរាជធានីភ្នំពេញនៅព្រឹកថ្ងៃទី១២ មេសានេះ បានអញ្ជើញទៅចំណតរថយន្តប្រជាធិបតេយ្យនៅខណ្ឌឬស្សីកែវ ដើម្បីពិនិត្យមើលដំណើរការដឹកជញ្ជូនប្រជាពលរដ្ឋទៅស្រុកកំណើតក្នុងឱកាសបុណ្យចូលឆ្នាំនេះ ដោយបានចាត់ទុកថា នេះជាកាដូឆ្នាំថ្មីរបស់សម្តេចតេជោ ជូនប្រជាពលរដ្ឋដែលធ្វើឲ្យប្រជាពលរដ្ឋធ្វើដំណើរទៅស្រុកកំណើតដោយមិនបង់ប្រាក់តាមរយៈរថយន្តក្រុងដឹកជញ្ជូនអ្នកដំណើររបស់រដ្ឋបាលរាជធានីភ្នំពេញ ដែលបងប្អូនទទួលបានទាំងសុវត្ថិភាព ផាសុខភាព និងពុំប្រឈមមុខនឹងគ្រោះថ្នាក់ផ្សេងៗ ។
លោកអ៊ាន សុឃីម អភិបាលរដ្ឋករស្វាយ័តដឹកជញ្ជូនសាធារណៈរថយន្តក្រុងឲ្យដឹងថា ៖ប្រជាពលរដ្ឋចេញដំណើរទៅតាមបណ្តាខេត្តក្រុងនានាច្រើនជាងគេនៅថ្ងៃដំបូងនេះ មានខេត្តបាត់ដំបង ,សៀមរាប, បន្ទាយមានជ័យ ។ លោកឃួង ស្រេង បានថ្លែងថា នេះបង្ហាញពីការគិតគូ យកចិត្តទុកដាក់របស់សម្តេចអគ្គមហាសេនាតេជោហ៊ុនសែន ក្នុងការផ្តល់ជូនកញ្ចប់កាដូរឆ្នាំថ្មីជូនប្រជាពលរដ្ឋយើង ។ លោកបានបន្តថា គណៈបញ្ជាការឯកភាពរាជធានីភ្នំពេញក៏បានពង្រឹងសន្តិសុខសណ្តាប់ធ្នាប់ក្នុងឱកាសបុណ្យចូលឆ្នាំថ្មីប្រពៃណីជាតិនេះ ។ លោកឃួង ស្រេង ក្នុងឱកាសនោះបានអំពាវនាវដល់បងប្អូនប្រជាពលរដ្ឋទាំងអស់ ក្នុងឱកាសបុណ្យចូលឆ្នាំនេះ មុនពេលដើរលែងចេញមកក្រៅផ្ទះត្រូវមើលទៀន ធូប និងបិទកុងតាក់ភ្លើងជាដើម ដើម្បីបង្ការកុំឲ្យអគ្គិភ័យកើតឡើង ។
បងប្អូនប្រជាពលរដ្ឋដែលបាននឹងកំពុងឡើងជិះរថយន្តក្រុងដោយមិនបង់ប្រាក់នេះបានបញ្ជាក់ឲ្យដឹងថា ពួកគាត់ពិតជាសប្បាយរីករាយណាស់ ដែលសម្តេចតេជោផ្តល់កាដូជូនពួកគាត់ លើការរថយន្តក្រុងដោយមិនបង់ប្រាក់ ទី១- ពួកគាត់បានជិះរថយន្តដែលមានម៉ាស៊ីនត្រជាក់ស្រួល មិនបញ្ជ្រៀតគ្នា ដល់ម៉ោងដឹងតែចេញដំណើរ ។ ទី២- មិនបង់ប្រាក់អាចសល់ប្រាក់យ៉ាងតិច២០ដុល្លារក្នុងម្នាក់ៗ ហើយពួកគាត់អាចសល់លុយនេះអាចយកទៅជូនម៉ែ ពុក ឬចំណាយលើអ្វីផ្សេងទៀតបាន ។
លោកយាយក្នុងវ័យ៦៥ឆ្នាំម្នាក់ ដែលកំពុងជិះរថយន្តក្រុងនេះបានឲ្យដឹងដែរថា មកដល់អាយុប៉ុណ្ណេៈហើយ លោកយាយមិនដែរបានជួបរឿងល្អបែបនេះទេ បានជិះឡានស្រួលទៅស្រុកកំណើតដោយមិនអស់ប្រាក់ ។ លោកយាយសូមឲ្យសម្តេចតេជោ ហ៊ុន សែន បន្តការផ្តល់កាដូនេះនៅក្នុងឱកាសបុណ្យភ្ជុំបិណ្ឌបន្តទៀត ។
គួរបញ្ជាក់ថា ទីតាំងដែលបងប្អូនប្រជាពលរដ្ឋអាចឡើងជិះរថយន្តបាននោះរួមមាន៥កន្លែងក្នុងនោះ នៅផ្លូវជាតិលេខ១ ឡើងរថយន្តនៅមហាវីសម្តេចតេជោ ហ៊ុន សែន (ផ្លូវ៦០ម៉ែត្រ) ទល់មុខក្រុមហ៊ុន ម៉ែកស៊ឺដេសបីន សម្រាប់បងប្អូនដែលធ្វើដំណើរតាមផ្លូវជាតិលេខ១ ឆ្ពោះទៅខេត្តកណ្តាល ព្រៃវែង និងខេត្តស្វាយរៀង ។ ផ្លូវជាតិលេខ៣ ឡើងរថយន្តនៅមុខទីបញ្ជាការដ្ឋានកងពលតូចថ្មើរជើងង៧០ ក្នុងសង្កាត់ចោមចៅ ខណ្ឌពោធិ៍សែនជ័យ ។ ផ្លូវជាតិលេខ៤ ឡើងរថយន្តចំណុចប្រសព្វរវាងផ្លូវជាតិលេខ៤ និងមហាវិថីឈ្នះឈ្នះ (កប់ស្រូវ) សង្កាត់ចោមចៅ ខណ្ឌពោធិ៍សែនជ័យ ។ ផ្លូវជាតិលេខ៥ ឡើងរថយន្តចំណតសួនច្បារឬស្សីកែវ (ទីលានប្រជាធិបតេយ្យថ្មី) សម្រាប់បងប្អូនធ្វើដំណើរតាមផ្លូវជាតិលេខ៥ ឆ្ពោះទៅខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ និងចំណុចប្រសព្វរវាងផ្លូវជាតិលេខ៤ និងមហាវិថីឈ្នះឈ្នះ (កប់ស្រូវ) សង្កាត់ចោមចៅ ខណ្ឌពោធិ៍សែនជ័យ ។ ផ្លូវជាតិលេខ៦ ឡើងរថយន្តនៅម្តុំរង្វង់ព្រំមុខបួនគល់ស្ពានជ្រោយចង្វារ ក្នុងតំបន់អភិវឌ្ឍន៍ក្រុងរណបជ្រោយចង្វារ ៕
ចែករំលែកព័តមាននេះ