ខេត្តបន្ទាយមានជ័យ ៖ សេចក្តីរាយការណ៍បឋមបានឱ្យដឹងថា កាលពីវេលាម៉ោង៦ និង២០នាទីព្រឹកថ្ងៃទី៩ ខែមេសា សមត្ថកិច្ចនគរបាលក្រុងប៉ោយប៉ែត បានទទួលព័ត៌មានតាមទូរស័ព្ទពីអ្នកគ្រប់គ្រងផ្ទះសំណាក់ហង្សមាស ដែលមានទីតាំងស្ថិតនៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែតថា មានភ្ញៀវជនបរទេសម្នាក់ មកស្នាក់នៅ ដេកស្លាប់ក្នុងបន្ទប់ខាងលើ ។
ក្រោយពីទទួលបានព័ត៌មាននេះ សមត្ថកិច្ចបានចុះទៅដល់ចំណុចកើតហេតុ ស្ថិតនៅបន្ទប់លេខ១០៥ ជាន់ទី១ផ្ទះសំណាក់ហង្សមាស ឃើញទ្វារបន្ទប់បិទជិតនិងដាក់គន្លឹះពីខាងក្នុង ។ លុះមើលតាមបង្អួចកញ្ចក់ដែលមានចម្រឹងដែក ឃើញផ្សែងហុយចេញពីក្នុងបន្ទប់ និងឃើញបុរសម្នាក់ដេកស្លាប់លើឥដ្ឋការ៉ូ ដោយឆេះខ្លួនខ្លោចខ្មៅ ។
តាមអ្នកមើលការខុសត្រូវផ្ទះសំណាក់ខាងលើបានឱ្យដឹងថា នៅថ្ងៃទី៨ ខែមេសា វេលាម៉ោងប្រមាណ១២ថ្ងៃត្រង់ មានបុរសបរទេសម្នាក់ជាជនជាតិម៉ាឡេសុី បានជួលបន្ទប់១ក៏បើកបន្ទប់លេខ១០៥ឱ្យស្នាក់ ។ បុរសម៉ាឡេស៊ីនេះបានឱ្យយកអាយផេតចាស់១គ្រឿងទៅលក់ តែអ្នកគ្រប់គ្រងផ្ទះសំណាក់មិនយកទៅលក់ឱ្យ ក៏ចេញទៅវិញដោយជិះម៉ូតូឌុប ។ លុះដល់ម៉ោង៨យប់ឃើញត្រឡប់មកវិញម្នាក់ និងចូលដេកទៅ ស្រាប់តែព្រឹកឡើងថ្ងៃទី៩ ខែមេសា ឃើញផ្សែងហុយក្នុងបន្ទប់ក៏យកទឹកជះពន្លត់ ។
មន្ត្រីនគរបាលឱ្យដឹងថា តាមការពិនិត្យមើលតាមកាមេរ៉ាសុវត្ថិភាព មុនពេលកើតហេតុគ្មានឃើញមនុស្សណាឆ្លងកាត់មុខបន្ទប់ទេ ។ ម្យ៉ាងទៀត បើតាមការត្រួតពិនិត្យបង្ហាញថា បុរសម៉ាឡេស៊ីរូបនេះបានយកប្រេងកាត១ដបចាក់ស្រោចហើយដុតខ្លួនធ្វើអត្តឃាត ។
ទោះបីជាបែបណា មជ្ឈដ្ឋានខ្លះងឿងឆ្ងល់ថា បើដុតខ្លួនឆេះរោលខ្មៅទៅហើយ ចុះពូកនៅក្បែរនោះហេតុអ្វីមិនឆេះ ? បន្ទប់នោះតូចចង្អៀត គួរតែឆេះអ្វីផ្សេងៗទៀត ៕
ចែករំលែកព័តមាននេះ