រាជធានីភ្នំពេញ ៖ អាជ្ញាធររាជធានីភ្នំពេញ បានអះអាងថា ដើម្បីរក្សាសន្តិសុខ និងសុវត្ថិភាព ជាពិសេសបញ្ហាចរាចរណ៍ឲ្យកាន់តែប្រសើរនោះ រដ្ឋបាលរាជធានីភ្នំពេញ បានត្រៀមកម្លាំងចម្រុះជាង១ពាន់នាក់ សម្រាប់អន្តរាគមន៍ និងការពារសុវត្ថិភាពសន្តិសុខសណ្តាប់ធ្នាប់ នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ។ ក្នុងកិច្ចប្រជុំគណៈបញ្ជាការឯកភាព នៅរដ្ឋបាលរាជធានីភ្នំពេញ ថ្ងៃទី០៩ មេសា ២០១៨នេះ លោក ឃួង ស្រេង អភិបាលរាជធានីភ្នំពេញ បានលើកឡើងថា អាជ្ញាធរបានត្រៀមកម្លាំងការពារជូនប្រជាពលរដ្ឋនៅរាជធានីភ្នំពេញ ជាង១ពាន់នាក់ ប្រចាំការ២៤ម៉ោងលើ២៤ម៉ោង ដើម្បីដាក់ពង្រាយតាមតំបន់គោលដៅ និងទីតាំងសំខាន់ៗ សម្រាប់ប្រារព្វពិធីបុណ្យចូលឆ្នាំថ្មីប្រពៃណីជាតិខ្មែរ។ លោកបន្តថា ក្នុងឱកាសនោះដែរក៏មានការត្រៀមមន្ត្រីនគរបាលពន្លត់ និងបង្ការអគ្គីភ័យ និងរថយន្តពន្លត់អគ្គីភ័យ កម្លាំងប្រដាប់អាវុធ ដើរល្បាត និងកម្លាំងសណ្តាប់ធ្នាប់ចរាចរណ៍ ដើម្បីជួយសម្រួលនៅច្រកចេញចូលសំខាន់ៗក្នុងរាជធានីភ្នំពេញ ដើម្បីកាត់បន្ថយការកកស្ទះ និងធានាបានសន្តិសុខសុវត្ថិភាពជូនប្រជាពលរដ្ឋ និងភ្ញៀងទេសចរណ៍ផងដែរ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឲ្យដឹងក្រោយកិច្ចប្រជុំខាងលើនេះថា កិច្ចប្រជុំនោះធ្វើឡើងដោយផ្តោតសំខាន់លើការងាររក្សាសន្តិសុខ សុវត្ថិភាព និងបញ្ហាចរាចរណ៍ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់នាពេលឆាប់ៗនេះ។ លោកបន្តថា សម្រាប់បុណ្យចូលឆ្នាំខ្មែរ គឺប្រជាពលរដ្ឋ ភាគច្រើនបានធ្វើដំណើរចាកចេញពីរាជធានីភ្នំពេញ ទៅស្រុកកំណើត និងចាកចេញធ្វើដំណើរទៅកម្សាន្តនៅតាមរមណីយដ្ឋាននានា ប៉ុន្តែការយកចិត្តទុកដាក់លើការងារសន្តិសុខសណ្តាប់ធ្នាប់នេះ គឺជាការងារដ៏សំខាន់បំផុត ដែលរដ្ឋបាលរាជធានីភ្នំពេញត្រូវយកទុកដាក់ពីព្រោះថា ក្រៅពីបងប្អូនដែលចាកចេញពីភ្នំពេញ ក៏នៅមានបងប្អូនមួយចំនួនទៀត រស់នៅក្នុងរាជធានីភ្នំពេញ ដែលទាមទារឲ្យមានការយកចិត្តទុកការពារសន្តិសុខផងដែរ។ ម្យ៉ាងទៀត ប្រជាពលរដ្ឋដែលចាកចេញ ទៅស្រុកកំណើតនោះ បានបន្សល់ទុកនូវផ្ទះសម្បែង ដែលត្រូវតែមានការការពារ លើបញ្ហាចោរកម្ម គាស់លួចអីវ៉ាន់ក្នុងផ្ទះ និងបញ្ហាអគ្គិភ័យដែលត្រូវធ្វើការត្រួតពិនិត្យតាមដាន។
អ្នកនាំពាក្យរដ្ឋបាលរាជធានីភ្នំពេញ បានឲ្យដឹងទៀតថា ចំណែកបញ្ហាចរាចរណ៍ នៅទីតាំងដែលមានមនុស្សច្រើន នឹងមានការកកស្ទះច្រើន ជាពិសេសនៅតាមច្រកចេញចូលរាជធានីភ្នំពេញចំនួន៥ដូចជា ផ្លូវជាតិលេខ១ លេខ២ លេខ៣ លេខ៤ និងផ្លូវជាតិលេខ៥ ដែលអភិបាលរាជធានី បានដាក់បទបញ្ជាទៅដល់គណៈបញ្ជាការឯកភាពខណ្ឌ សមត្ថកិច្ចចរាចរណ៍មូលដ្ឋានផ្ទាល់ត្រូវតែគិតគូរឲ្យបានហ្មត់ចត់ ដើម្បីសម្រួលចរាចរណ៍កុំឲ្យមានការកកស្ទះ និងកាត់បន្ថយជាអតិបរិមា ដែលបងប្អូនប្រជាពលរដ្ឋ បានសម្រុកចេញពីរាជធានីភ្នំពេញ។ ដោយឡែកបញ្ហាសំរាមក៏ត្រូវតែមានការយកចិត្តទុកដាក់ និងបានណែនាំទៅក្រុមហ៊ុនស៊ីនទ្រី គណៈបញ្ជាការឯកភាពខណ្ឌ មន្ទីរសាធារណការ និងដឹកជញ្ជូន ត្រូវធ្វើការបែងចែកវេនឲ្យបានត្រឹមត្រូវ។ ចំណែកឧត្តមសេនីយ៏ទោ ភួង ម៉ាឡៃ ស្នងការរង ស្នងការដ្ឋាននគរបាលរាជធានីភ្នំពេញ បានបញ្ជាក់ថា បុណ្យចូលឆ្នាំ២០១៨នេះ ស្នងការដ្ឋាននគរបាលរាជធានីភ្នំពេញ បានត្រៀបរៀបចំផែនការការពាររួចជាស្រេចអស់ហើយ នៅតាមតំបន់គោលដៅសំខាន់ៗជាច្រើនកន្លែង គឺសំដៅធានា ទប់ស្កាត់ឲ្យបាននូវសកម្មភាព បទល្មើសព្រហ្មទណ្ឌ ករណីលួចឆក់ប្លន់គាស់ផ្ទះ អំពើហិង្សា ក្មេងទំនើងជាដើម ជាពិសេសនៅតាមវត្តអារាម កន្លែងសប្បាយភាព រមណីយដ្ឋាន សហគមន៍ ភូមិ សង្កាត់ជូនប្រជាពលរដ្ឋឲ្យមានភាពកក់ក្តៅ និងទទួលបាននូវភាពសប្បាយរីករាយផងដែរ៕
ចែករំលែកព័តមាននេះ