ខេត្តព្រៃវែង ៖ សេចក្តីរាយការណ៍បឋមឲ្យដឹងថា មានយុវនារីម្នាក់ត្រូវបានអាណាព្យាបាលប្តឹងសមត្ថកិច្ចឲ្យជួយស្រាវជ្រាវ និងស្វែងរកឃាត់ខ្លួន ដែលបានរត់ចេញពីផ្ទះ រួមទាំងយកនូវលុយកាក់មាសប្រាក់មួយចំនួនធំទៅផង ។ ករណីនេះកើតឡើងកាលពីព្រឹក ថ្ងៃទី០៧…
ខេត្តព្រៃវែង ៖ សេចក្តីរាយការណ៍បឋមឲ្យដឹងថា មានយុវនារីម្នាក់ត្រូវបានអាណាព្យាបាលប្តឹងសមត្ថកិច្ចឲ្យជួយស្រាវជ្រាវ និងស្វែងរកឃាត់ខ្លួន ដែលបានរត់ចេញពីផ្ទះ រួមទាំងយកនូវលុយកាក់មាសប្រាក់មួយចំនួនធំទៅផង ។ ករណីនេះកើតឡើងកាលពីព្រឹក ថ្ងៃទី០៧ ខែមេសា ឆ្នាំ២០១៨ ប៉ុស្តិ៍នគរបាលរដ្ឋបាលត្រពាំងស្រែ បានទទួលការរាយការណ៍ផ្ទាល់មាក់ពី លោក ហង់ សម្បត្តិ ក្រុមព្រឹក្សាឃុំត្រពាំងស្រែថា កាលពីថ្ងៃទី០១ ខែមេសា ឆ្នាំ២០១៨ មានករណីបាត់យុវនារីម្នាក់ឈ្មោះ ហ៊ាន ចាន់រ័ត្ន អាយុ១៧ឆ្នាំ រស់នៅភូមិស្រម៉ ឃុំត្រពាំងស្រែ ស្រុកព្រៃវែង ខេត្តព្រៃវែង ។
ឪពុកឈ្មោះ ហ៊ាន វ៉ាន់ អាយុ៤៥ឆ្នាំ ម្ដាយឈ្មោះ យ៉ាន់ សោភ័ណ្ឌ អាយុ៤៤ឆ្នាំ ខណៈពេលនេះឪពុកម្តាយ និងក្រុមគ្រួសារមានការព្រួយបារម្ភយ៉ាងខ្លាំង ។ តាមសម្ដីក្រុមប្រឹក្សាសង្កាត់បានបញ្ជាក់ថា នៅថ្ងៃកើតហេតុ ឪពុកម្ដាយយុវនារីនោះបានចេញទៅរកស៊ីធ្វើការនៅភ្នំពេញ ទុកឲ្យកូននៅចាំផ្ទះបីនាក់បងប្អូន ស្រាប់តែឈ្មោះ ហ៊ាន ចាន់រ័ត្ន បានចេញបាត់ពីផ្ទះ ដោយយកទៅជាមួយនូវទ្រព្យសម្បត្តិមួយចំនួនដូចជា មាសជិតមួយដំឡឹង ប្រាក់៥០០,០០០រៀល មិនដឹងមូលហេតុទៅណា ។ ដូច្នេះបានជាអាណាព្យាបាលបានទៅប្តឹងក្រុមប្រឹក្សា និងនគរបាលសង្កាត់ឲ្យជួយស្រាវជ្រាវ និងស្វែងរកកូននាំមកផ្ទះវិញ ៕
ចែករំលែកព័តមាននេះ