រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាបានអះអាងបើការអំពាវនាវស្នើសុំឲ្យលើកលែង និងបន្ធូរបន្ថយទោសដល់សកម្មជន អតីតគណបក្សប្រឆាំងមិនអាចទៅរួចទេ បើទាញបញ្ជូនមករឿងនយោបាយនោះ ។ ការលើកឡើងរបស់អ្នកនាំពាក្យបក្សកាន់អំណាចនេះ បន្ទាប់ពីក្រុមអតីតបក្សប្រឆាំងបានអំពាវនាវដល់រាជរដ្ឋាភិបាលគួរលើកលែង និងបន្ធូរបន្ថយទោសដល់សកម្មជនខ្លួនដែលកំពុងជាប់ពន្ធនាគារ ហើយអនុវត្តទោស២ភាគ៣ ដើម្បីឲ្យទៅជួបប្រពន្ធកូនខ្លួនវិញ កាលពេលចូលជួបសុខទុក្ខសកម្មជន នៅក្នុងពន្ធនាគារនាព្រឹកថ្ងៃទី០៥ ខែមេសា ឆ្នាំ២០១៨ ។
យ៉ាងណាក្តីលោកសុខ ឥសានអ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី០៦ ខែ មេសានេះ ថាការដែលមន្ត្រីអតីតបក្សប្រឆាំងមួយចំនួនត្រូវបានតុលាការកាត់ទោសឲ្យជាប់ពន្ធនាគារ គឺអាស្រ័យលើពិរុទ្ធភាពនៃអំពើល្មើសច្បាប់របស់ខ្លួនម្នាក់ ស្របតាមករណីនីមួយៗ ។
នេះ គឺជាការអនុវត្តច្បាប់ដែលហៅថា នីតិរដ្ឋនោះ ។ ដើម្បីធានាសន្តិភាពស្ថិរភាពនយោបាយ សុខសុវត្ថិភាពសង្គម ទាមទារការអនុវត្តតាមគោលការណ៍លទ្ធិប្រជាធិបតេយ្យ និងនីតិរដ្ឋ ។
លោកបញ្ជាក់ថា បើទណ្ឌិតណាបានកែប្រែកំហុសរបស់ខ្លួនមកជាមនុស្សដឹងខុសត្រូវ ហើយ បានទទួលទោស២-៣ រួចហើយនោះទើបគណៈគ្រប់គ្រងពន្ធនាគារវាយតម្លៃ និងសន្និដ្ឋាន រួចស្នើសុំតាមលំដាប់លំដោយ ថ្វាយព្រះមហាក្សត្រ ដើម្បីទ្រង់ព្រះតម្រិះទ្រង់ព្រះរាជទានលើកលែងទោស ប្ញបន្ធូរបន្ថយទោស ។
លោកគូសបញ្ជាក់ថា « ប៉ុន្តែ បើការអំពាវនាវឲ្យមានការលើកលែងទោសពីប្រមុខរាជរដ្ឋាភិបាលដោយយកឡេះថា ដើម្បីស្រុះស្រួលជាតិរវាងខ្មែរនិងខ្មែរនោះ បញ្ហានេះ គឺចង់ប្រទាញរឿងជាប់ពន្ធនាគារនេះជារឿងនយោបាយ ហើយដែលមិនអាចឈានទៅដល់ការលើកលែងទោស ប្ញបន្ធូរបន្ថយទោសបានឡើយ » ។
លោកបន្ថែមថា ការមានទោស ឬមិនមានទោសមិនមែនអាស្រ័យលើយោគយល់គ្នានោះទេ តែ គឺជារឿងផ្លូវច្បាប់ គឺនីតិរដ្ឋនេះឯង ។ ការចង់យកវប្បធម៌ទណ្ឌភាពមកប្រើប្រាស់នាពេលនេះមិនត្រឹមត្រូវទេ ។ ការចង់ឲ្យមានការស្រុះស្រួលជាតិមិនមែនចេះតែ អនុវត្តដោយរំលោភច្បាប់នោះទេ ។
ជាមួយគ្នានោះដែរ លោកសុខ ឥសានក៏បានលើកលើកឡើងថា មានទណ្ឌិត និងជនជាប់ចោទជាច្រើនរអ៊ូរទាំថា នៅក្នុងពន្ធនាគារ និងមន្ទីរឃុំឃាំងទណ្ឌិត ឬជនជាប់ចោទបាត់បង់អស់សិទ្ធិសេរីភាព មិនដូចពលរដ្ឋធម្មតានោះទេ ។ ទណ្ឌិត និងជនជាប់ចោទ ពិតជាបាត់បង់សិទ្ធិជាពលរដ្ឋហើយ ទាំងសិទ្ធិដើរហើរ សិទ្ធិនិយាយស្តី សិទ្ធិកម្សាន្ត ប្រាស់សម្ភារទំនើបផ្សេងៗពាក់ព័ន្ធនឹងជីវភាពរស់នៅប្រចាំថ្ងៃ ។
លោកបន្តថា បើចង់បានមានសព្វគ្រប់ដូចពលរដ្ឋធម្មតា គេមិនហៅថា ជាទណ្ឌិតឬជនជាប់ចោទទេ ។ បើចង់បានដូចពលរដ្ឋធម្មតាលុះត្រាតែកុំធ្វើខុសច្បាប់ឲ្យសោះ ដើម្បីកុំឲ្យជាប់គុក ឬជាប់ឃុំឃាំង ។
សូមជម្រាប់ថា ការលើកឡើងរបស់អុ្នកនាំពាក្យគណបក្សកាន់អំណាចនេះបន្ទាប់ពីលោក អ៊ូច ច័ន្ទ និងលោក ម៉ៅ មុន្នីវណ្ណអតីតសមាជិករដ្ឋសភាគណបក្សសង្គ្រោះជាតិបានស្នើសុំឲ្យរាជរដ្ឋាភិបាលលើកលែងទោសដល់សកម្មជនខ្លួនដែលកំពុងជាប់ពន្ធនាគារ ក្រោយពីលោកបានចូលជួបកាលពីថ្ងៃទី៥ ខែមេសាកន្លងមកនេះ ។
អតីតសមាជិកបក្សប្រឆាំងបានបញ្ជាក់ថា «ពួកគាត់ រួមទាំងខ្ញុំដែរ សុំស្នើសុំឲ្យលើកលែងដល់ពួកគា ត់ផង ព្រោះថាពួកគាត់ភាគច្រើនជាយុវជន ។ ពួកគាត់ខ្ញុំជឿថា មិនមែនជាមនុស្សសាហាវឃោឃៅទៅកាប់សម្លាប់មនុស្សទេ ។ ពួកគាត់ជាអ្នកទោសមនសិកា ដូច្នេះហើយកាលណាដាក់ពន្ធនាគារយូរគេនឹងធ្វើឲ្យប៉ះពាល់ដល់អាយុជីវិត និងក្រុមគ្រួសារគាត់ » ។
លោកទាំងពីរបានបន្តថា ពួកលោកបានអនុញ្ញាតឲ្យចូលជួបបានមនុស្សចំនួន១៤នាក់ ក្នុងចំណោមមនុស្ស១៥នាក់ ដែលក្រុមលោកចង់ជួប គឺមិនបានជួបលោក មាជ សុវណ្ណា រ៉ានោះ ទេ ៕
ចែករំលែកព័តមាននេះ