ADផ្ទាំងផ្សព្វផ្សាយពាណិជ្ជកម្ម

ទោះពេលកំពុងស៊ីការគេក៏ចូលចាប់ខ្លួនដែរ ព្រោះគាត់ជាឃាតករ

6 ឆ្នាំ មុន

០២ ខែ មេសា ឆ្នាំ ២០១៨ ម៉ោង ១១:០៧

ខេត្តកណ្តាល ៖ សេចក្តីរាយការណ៍បឋមឱ្យដឹងថា មានការចុះចាប់ខ្លួនឃាតកររបស់កម្លាំងសមត្ថកិច្ចប៉ុស្តិ្៍ និងស្រុក ក្នុងពិធីមង្គលការមួយ ខណៈឃាតករកំពុងស៊ីការគេនោះ កាលពីវេលាម៉ោង០៧ និង១០នាទីយប់ថ្ងៃទី០១ មេសា ស្ថិតនៅចំណុចភូមិគួយ ឃុំគ្រញូង ស្រុកត្រាំកក់ ខេត្តតាកែវ ហើយនឹងត្រូវបញ្ជូនមកឱ្យខាងសមត្ថកិច្ចស្រុកអង្គស្នួលវិញ ក្រោយពីមានដីកាចំនួន២ឱ្យចាប់ខ្លួន (ដីកាជាប់គុក១ជីវិត) របស់សាលាដំបូងខេត្តកណ្តាល ពាក់ព័ន្ធពីបទ «ឃាតកម្មគិតទុកជាមុន» ។

សេចក្តរាយការណ៍បន្តថា ជនសង្ស័យខាងលើឈ្មោះទឹម សារី អាយុ៣៥ឆ្នាំ ជាមន្ត្រីប៉ូលិសម្នាក់ ។ រីឯជនរងគ្រោះដែលស្លាប់ ឈ្មោះស្រី វុទ្ធី អាយុ៣៥ឆ្នាំដូចគ្នា ។ ទាំងជនសង្ស័យនិងជនរងគ្រោះ មានប្រពន្ធជាបងប្អូនជាដូនមួយនឹងគ្នា ។

ប្រភពបន្តថា ជនសង្ស័យរូបនេះ ត្រូវបានសមត្ថកិច្ចស្រាវជ្រាវជាយូរមកហើយ ទើបចាប់បាន កាលពីយប់ថ្ងៃទី០១ មេសា នេះ។ គួររំលឹកទៀតថា កាលពីថ្ងៃទី០៤ កក្កដា ឆ្នាំ២០១៥ កន្លងមក ស្ថិតក្នុងភូមិគោកពពេល ឃុំលំហាច ស្រុកអង្គស្នួល ខេត្តកណ្តាល (ជាកន្លែងកើតហេតុ) មានរៀបចំកម្មវិធីខួបកំណើតកូនរបស់បងប្អូន ។ ក្នុងពិធីនោះ មានទាំងជនសង្ស័យនិងជនរងគ្រោះបានផឹកស៊ីជាមួយគ្នា ។ ពេលនោះ ជនរងគ្រោះបានលើកកែវជល់រំលងក្បាលជនសង្ស័យ និងបានស្តីឱ្យជនសង្ស័យថា «ផឹកស៊ីលើកណា មិនដែលមានលុយនោះទេ» ខណៈជនសង្ស័យ ក៏មិនឆ្លើបតបនោះដែរដោយនៅស្ងាត់ស្ងៀម រហូតបានដើរចេញទៅផ្ទះ ។ ក្រោយមក ជនសង្ស័យបានដើរត្រឡប់មកក្នុងកម្មវិធីខួបកំណើតនោះវិញ ក៏ដកកាំភ្លើងបាញ់ជនរងគ្រោះចំនួន១៥គ្រាប់បណ្តាលឱ្យស្លាប់តែម្តង ហើយបានរត់គេចខ្លួនរហូតមកទល់ថ្ងៃឃាត់ខ្លួននេះ ។