ខេត្តតាកែវ ៖ ទោះជាបែបណាក្តី ក្នុងពេលដែលមានការផ្លាស់ប្តូរតំណែងនេះ រឿងរ៉ាវអ្នកមេម៉ាយរូបស្រស់ចង.កសម្លាប់ខ្លួនកាលពីខែមករា ដើមឆ្នាំនេះ កំពុងអង្រួនទឹកដីខេត្តតាកែវឱ្យញាប់ញ័រផងដែរ ខណៈដែលមន្ត្រីប៉ូលិស៨នាក់ ក្នុងនោះមានបងប្រុសរបស់លោកម្នាក់ជាស្នងការរង គឺលោក ឡាយ ណារិទ្ធ ត្រូវបានកោះហៅមកសាកសួរនៅក្រសួងមហាផ្ទៃ ជុំវិញការចង.កសម្លាប់ខ្លួនរបស់អ្នកមេម៉ាយរូបស្រស់ ។
អ្នកនាំពាក្យអគ្គស្នងការដ្ឋាននគរបាលជាតិ នាយឧត្តមសេនីយ៍ គៀត ច័ន្ទថារិទ្ធ និងជាអគ្គស្នងការរងនគរបាលជាតិបានប្រាប់គេហទំព័រក្នុងស្រុក Swif News ថា លោកឧត្តមសេនីយ៍ត្រី ឡាយ ណារិទ្ធ ស្នងការរងនគរបាលខេត្តតាកែវ និងមន្ត្រីនគរបាលខេត្តតាកែវ៧នាក់ទៀត ត្រូវបានហៅមកសាកសួរនៅអគ្គ ស្នង ការដ្ឋាន នគរបាលជាតិ តាំងពីយប់ថ្ងៃទី២៨ មីនា ប៉ុន្តែលោកនាយឧត្តមសេនីយ៍មិនបានបញ្ជាក់លម្អិតពីលទ្ធផលនៃការសាកសួរនេះទេ គិតត្រឹមព្រឹកថ្ងៃទី៣០ មីនា ។ លោកឧត្តមសេនីយ៍ត្រី ឡាយ ណារិទ្ធ ជាស្នង ការរង និងជាបងប្រុសបង្កើតរបស់លោក ឡាយ វណ្ណៈ អតីតអភិបាលខេត្តតាកែវ ។
លោក សុខ សំណាង ស្នងការនគរបាលខេត្តតាកែវ មិនអាចទាក់ទងបានទេ ឯលោក សួន ផុន ស្នងការរងនគរបាលខេត្តតាកែវទទួលផ្នែកព្រហ្មទណ្ឌ ជាអ្នកកាន់សំណុំរឿងអ្នកមេម៉ាយរូបស្រស់ចង.កសម្លាប់ខ្លួននៅខេត្តតាកែវនោះ និងលោក ជីវ ចន្ទដារា ព្រះរាជអាជ្ញាអមសាលាដំបូងខេត្តតាកែវ ជាអ្នកដឹកនាំការស៊ើប អង្កេតករណីនេះ ក៏បានបដិសេធមិនធ្វើអត្ថាធិប្បាយជុំវិញករណីអគ្គស្នងការនគរបាលជាតិកោះហៅស្នង ការរងនគរបាលខេត្តតាកែវ មកសាកសួរនេះដែរ ។
ដោយឡែក លោកឧត្តមសេនីយ៍ឯក សុខ ខេមរិន្ទ ប្រធាននាយកដ្ឋាននគរបាលកណ្តាលយុត្តិធម៌ បានមានប្រសាសន៍ប្រាប់ថា មិនមែនជាករណីបើកការស៊ើបអង្កេតឡើងវិញទេ គឺគ្រាន់តែជាការផ្ទៀងផ្ទាត់ព័ត៌មាន និងភស្តុតាងឡើងវិញប៉ុណ្ណោះ ក្រោយពីមានការបកស្រាយជាច្រើនថា ករណីស្លាប់របស់អ្នកស្រី ចេវ សុវឌ្ឍនា ជាករណីឃាតកម្ម ។
ក្នុងរបាយការណ៍នគរបាលក្រុងដូនកែវ បានរៀបរាប់ថា អ្នកស្រី ចេវ សុវឌ្ឍនា បានយកខ្សែវាំងននបង្អួចចង.កសម្លាប់ខ្លួន ក្នុងកម្ពស់ពីកម្រាលឥដ្ឋ២៤០សង្ទីម៉ែត្រ ពីកន្លែងចងមកក៏មានប្រវែង៧០សង្ទីម៉ែត្រ ពីចុងជើងមកកម្រាលឥដ្ឋ២០សង្ទីម៉ែត្រ ពិតជាករណីធ្វើអត្តឃាតប្រាកដមែន ។
ជុំវិញការមន្ទិលសង្ស័យនានា
សូមរំលឹកថា អ្នកស្រី ចេវ សុវឌ្ឍនា អាយុ៣៦ឆ្នាំ រស់នៅរាជធានីភ្នំពេញ ជាសមាជិកនៃក្រុមយុវជនក្រុម១៥៧ និងក៏ជាអ្នកបម្រើការនៅរដ្ឋសភាផងដែរ ត្រូវបានអ្នកបម្រើប្រទះឃើញចង.កស្លាប់នៅក្នុងបន្ទប់ ដេក នៅក្នុងភូមិគ្រឹះមួយ នាភូមិផ្សារតាកោរ សង្កាត់រកាក្នុង ក្រុងដូនកែវ ខេត្តតាកែវ ដែលការស្លាប់នេះត្រូវបានសាច់ញាតិ និងមហាជនដាក់ការសង្ស័យថា មិនមែនជាករណីអត្តឃាតនោះឡើយ ព្រោះស្ថានភាពស្លាប់បង្កប់នូវចំណុចគួរឲ្យសង្ស័យជាច្រើន ។
កាលពីថ្ងៃទី២៧ ខែកុម្ភៈ ឆ្នាំ២០១៨ នាយកដ្ឋានព្រហ្មទណ្ឌក្រសួងមហាផ្ទៃ ដឹកនាំដោយលោកឧត្តមសេនីយ៍ ទោ ប៉ុល រតនា អនុប្រធាននាយកដ្ឋានព្រហ្មទណ្ឌ បានបើកការស៊ើបអង្កេតឡើងវិញ ចំពោះការស្លាប់របស់អ្នកមេម៉ាយរូបស្រស់រូបនេះ ដើម្បីបកស្រាយចំពោះព័ត៌មានមួយចំនួនដាក់ការសង្ស័យថា មិនមែនជាករណីធ្វើអត្តឃាតនោះ ។
ករណីសង្ស័យនានា ត្រូវបានមហាជនជាច្រើនដាក់ការសង្ស័យ ព្រោះនៅក្បែរសពស្ត្រីរូបនេះ មិនមានកៅអី ដើម្បីឡើងចង.ក ហើយស្ត្រីនោះ ក៏បានយកដៃកាន់ខ្សែចង.កថែមទៀត ហាក់ដូចជាប្រឹងរើបម្រះមុននឹងស្លាប់ ។ ចំណែកនៅលើ.ករបស់សាកសព ក៏មានស្នាមម្រាមដៃផងដែរ ។ មហាជនបានដាក់ការសង្ស័យទៀតថា ករណីស្លាប់នេះគឺជាឃាតកម្ម ប៉ុន្តែត្រូវបានគេបង្វែរថា ជារឿងអត្តឃាតដោយចង.កសម្លាប់ខ្លួន ព្រោះតែវិបត្តិស្នេហាត្រីកោណ ។
ចែករំលែកព័តមាននេះ