ខេត្តស្វាយរៀង ៖ លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានលើកឡើងថា ក្រោមនយោបាយឈ្នះឈ្នះរបស់ សម្តេចអគ្គមហាសេនាបតីតេជោ ហ៊ុន សែន នាយរដ្ឋមន្ត្រី បានដឹកនាំ និងកសាងប្រទេសជាតិឲ្យមានសុខសន្តិភាពពេញលេញ និងការអភិវឌ្ឍន៍គ្រប់លើវិស័យ ។ ដូច្នេះតម្លៃសុខសន្តិភាពមិនអាចកាត់ថ្លៃបានឡើយ មានសន្តិភាពទើបមានការអភិវឌ្ឍន៍ ។ ហើយរក្សារសន្តិភាពបានគឺមានតែយើងទាំងអស់គ្នារួមសាមគ្គីថែរក្សារការពារកុំជឿលើការញុះញង់ពីក្រុមជនអគតិនាំឲ្យសង្គមជាតិធ្លាក់ចូលក្នុងសង្គ្រាមដូចកាលពីអតីតកាល ។
លោកជំទាវ ម៉ែន សំអន ក៏បានកោតសរសើរដល់សប្បុរសជន និងថ្នាក់ដឹកនាំក្រុមការងារថ្នាក់ជាតិ ចុះជួយស្រុកចន្ទ្រា និងលោកគ្រូចៅអធិការវត្តសិរីវង្ស ហៅវត្តចន្ទ្រា បានកសាងសមិទ្ធផលនានាមាន ស្ពាន១ អស់ថវិកា៥,០០០ដុល្លារ បុកអណ្តូងទឹកជម្រៅពី១៥០ម៉ែត្រ ទៅ៣០០ម៉ែត្រ ចំនួន៤អណ្តូងអស់ថវិកា៤,០០០ដុល្លារ សាងសង់ទីស្នាក់ការគណបក្សប្រជាជនកម្ពុជា ឃុំចន្ទ្រាអស់ថវិកា១៥,០០០ដុល្លារ បានកសាងអគាររដ្ឋបាលឃុំចន្ទ្រា១ខ្នង អស់ថវិកា២១,៥០០ដុល្លារ ។ និងជាពិសេសឧបដ្ឋានសាលាវត្តសិរីវង្ស១ខ្នងនេះ ដែលមានបណ្តោយ២៤ម៉ែត្រ ទទឹង១៥ម៉ែត្រ អស់ថវិកា៩៨,៤០៥ដុល្លារ និងមានរូបបដិមាតម្កល់ទុកក្នុងឧបដ្ឋានសាលាធ្វើអំពីថ្ម ដាប់ទុកសម្រាប់ព្រះសង្ឃ និងប្រជាពុទ្ធបរិស័ទគោរពបូជាទាំងនេះ គឺបានអានិសង្សច្រើនណាស់ ។
លោកជំទាវបានផ្តាំផ្ញើរទៀតថា ទី១.ត្រូវរួមគ្នាថែរក្សាសុខសន្តិភាព និងការអភិវឌ្ឍន៍ និងរួមគ្នាថែរក្សានូវសមិទ្ធិផលនានារបស់រាជរដ្ឋាភិបាល ដែលបានផ្តល់ជូនឲ្យបានគង់វង្សសម្រាប់ទុកដល់កូនចៅជំនាន់ក្រោយៗទៀត ។ ទី២.មន្ត្រីរាជការគ្រប់លំដាប់ថ្នាក់ត្រូវតែប្រព្រឹត្តអំពើល្អ និងបម្រើសេវាសាធារណៈឲ្យបានល្អប្រសើរជូន ប្រជាពលរដ្ឋនៅមូលដ្ឋាន ។ ទី៣.រួមគ្នាការពារសន្ដិសុខសណ្ដាប់ធ្នាប់សាធារណៈអនុវត្ដន៍ឱ្យបាននូវគោលនយោបាយរបស់រាជរដ្ឋាភិបាល ស្តីពីភូមិ-ឃុំមានសុវត្ថិភាព ជៀសឲ្យផុតគ្រឿងញៀន មិនត្រូវបានបងតូចបងធំ និងក្រុមក្មេងទំនើង គោរពច្បាប់ចរាចរណ៍ ។ ទី៤.មិនត្រូវជឿតាមការញុះញង់របស់ជនអគតិមួយមួយដែលតែងតែរារាំងដល់រាជរដ្ឋាភិបាលក្នុងការអភិវឌ្ឍន៍ប្រទេស ។ ទី៥.បងប្អូនទាំងអស់គ្នាត្រូវត្រៀមខ្លួនទៅពិនិត្យបញ្ជីឈ្មោះតាមសេចក្តីប្រកាសរបស់គណៈកម្មការជាតិរៀបចំការបោះឆ្នោត ត្រូវចូលរួមបោះឆ្នោតឲ្យបានគ្រប់គ្រប់គ្នាដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ នាពេលខាងមុខកុំបីអាក់ខានឡើយ ដោយត្រូវប្រែក្លាយសមាជិកបក្សម្នាក់ទៅជាសំឡេងគាំទ្រគណបក្សមួយសន្លឹក និងត្រូវបោះឆ្នោតជូនគណបក្សប្រជាជនកម្ពុជា ព្រោះមានតែគណបក្សប្រជាជនតែមួយគត់ ដែលបានរួមសុខរួមទុក្ខជាមួយបងប្អូនប្រជាពលរដ្ឋ មិនចេះភូតភរ កុហកបោកប្រាស់ និងមានសម្ថតភាពគ្រប់គ្រាន់ក្នុងការដឹកនាំប្រទេសឆ្ពោះទៅរកវឌ្ឍនភាព និងធានាបាននូវសុខសន្តិភាពជូនប្រទេសជាតិ ។ ក្នុងឱកាសនេះដែរ ក៏មានបំពាក់មេដាយស្ថាបនាជាតិដល់សប្បុរសជនចំនួន៧រូបផងដែរ ។ ជាចុងក្រោយលោកជំទាវក៏បានអញ្ជើញកាត់ខ្សែបូដាក់ឲ្យប្រើប្រាស់ជាផ្លូវការនៅឧបដ្ឋានសាលាវត្តសិរីវង្ស និងសាលាឃុំចន្ទ្រាផងដែរ ៕
ចែករំលែកព័តមាននេះ