ទីបំផុតក្រសួងមហាផ្ទៃទទួលស្គាល់ «គណបក្សខ្មែរតែមួយ» ជាផ្លូវការ
- ភ្នំពេញ
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃកាលពីថ្ងៃទី២៧ ខែមីនា ឆ្នាំ២០១៨ បានប្រកាសទទួលស្គាល់…
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃកាលពីថ្ងៃទី២៧ ខែមីនា ឆ្នាំ២០១៨ បានប្រកាសទទួលស្គាល់ «គណបក្សខ្មែរតែមួយ»ដែលដំបូងឡើយដាក់ឈ្មោះថា គណបក្សកែម ឡី នោះជាផ្លូវការហើយ ។
យោងតាមប្រកាសរបស់ក្រសួងមហាផ្ទៃចុះថ្ងៃទី២៧ ខែមីនា និងចុះហត្ថលេខាដោយសម្តេចស ខេង បានបញ្ជាក់ថា៖ «ត្រូវបានចុះឈ្មោះគណបក្សខ្មែរតែមួយ (គ.ខ.ម) មានស្នាក់ការកណ្តាលនៅផ្លូវលេខ៥០៤ ផ្ទះលេខ២១១ សង្កាត់វាលវង់ ខណ្ឌ៧មករា រាជធានីភ្នំពេញក្នុងបញ្ជីគណបក្សនយោបាយនៅក្រសួងមហាផ្ទៃ» ។ ក្នុងលិខិតដដែលថា គណបក្សខ្មែរតែមួយត្រូវធ្វើសកម្មភាពស្របតាមច្បាប់ស្តីពីគណបក្សនយោបាយ លិខិតបទដ្ឋានគតិយុទ្ធនានាមានជាធរមាន និងលក្ខន្តិកៈរបស់គណបក្សតម្កល់ទុកនៅក្រសួងមហាផ្ទៃ ។
លោកគុជ លី អនុប្រធានគណបក្សខ្មែរតែមួយ បានបញ្ជាក់លើបណ្តាញទំនាក់ទំនងសង្គមថា៖ «ក្រសួងមហាផ្ទៃបានទទួលចុះបញ្ជីគណបក្សខ្មែរតែមួយ» នៅក្នុងបញ្ជីគណបក្សនៅក្រសួងមហាផ្ទៃរួចហើយ ។
គួរបញ្ជាក់ថា គណបក្សខ្មែរតែមួយ មានប្រធានមួយរូប គឺលោក កែម រិទ្ធិសិត ដែលជាប្អូនប្រុសរបស់លោក កែម ឡី , អនុប្រធានលោកស្រី ឃី ម៉េងលីន និងលោកគុជ លី អនុប្រធាននិងអ្នកនាំពាក្យ ។
គណបក្សនេះធ្លាប់ត្រូវបានក្រសួមហាផ្ទៃ បដិសេធន៍ម្តងមកហើយ កាលពីដើមខែមីនានេះ ដោយសារតែប្រើឈ្មោះថា «គណបក្សកែម ឡី» ដែលផ្ទុយនឹងច្បាប់ស្តីពីគណបក្សនយោបាយ តែក្រោយមកក៏បានប្តូរទៅជាឈ្មោះ គណបក្សខ្មែរតែមួយ វិញ ទើបត្រូវបានទទួលស្គាល់ដោយក្រសួងមហាផ្ទៃនាពេលនេះ ។
ថ្នាក់ដឹកនាំគណបក្សថ្មីស្រឡាងមួយនេះធ្លាប់អះអាងថា ការបង្កើតគណបក្សនេះ គឺក្នុងគោលបំណងចូលរួមប្រកួតប្រជែងការបោះឆ្នោតថ្នាក់ជាតិខាងមុខ ដែលនឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ ៕
ចែករំលែកព័តមាននេះ