(តពីលេខមុន)
រស់ក្រោមការត្រួតត្រារបស់ពួកខ្មែរក្រហមបានរយៈពេល៥ខែ អ្នកស្រីវីរៈ តារា និងលោកលី ប៊ុនយីម រត់គេចឆ្លងដែនចូលទៅហាទៀង ប្រទេសវៀតណាម ។ បន្ទាប់មកអ្នកស្រីវីរៈ តារា និងស្វាមី ឆ្លងដែនទៅប្រទេសឡាវទៀត ដោយមានគោលដៅទៅជួប កូនៗនៅក្រុងបាងកក ប្រទេសថៃ ។
ពេលឆ្លងចូលដល់ប្រទេសឡាវ អ្នកស្រីវីរៈ តារា និងលោកលី ប៊ុនយីម ត្រូវសមត្ថកិច្ចចាប់ខ្លួន ។ រយៈពេល៣ខែក្រោយមកអាជ្ញាធរឡាវបញ្ជូនអ្នកស្រីវីរៈ តារា និងស្វាមីទៅប្រទេសវៀតណាមវិញ នៅខេត្តគ័ងទ្រី ជាប់ទីក្រុងវ៉េ ។
រយៈពេលមួយឆ្នាំក្រោយមក ទើបអ្នកស្រីវីរៈ តារា និងលោកលី ប៊ុនយីម ត្រូវគេទទួលយកចេញពីប្រទេសវៀតណាម ទៅនៅប្រទេសបារាំង នាឆ្នាំ១៩៧៧ ។
អ្នកស្រីវីរៈ តារា និងស្វាមី កសាងជីវភាពថ្មីនៅប្រទេសបារាំង គេចផុតពីទុក្ខវេទនា ឬមិនអាចប៉ាន់ស្មានបានពីរឿង «ស្លាប់ ឬរស់» នៅក្នុងរបបខ្មែរក្រហមដែលជាប់ឈ្មោះជារបបប្រល័យពូជសាសន៍ ។
មានអ្នករួមអាជីពសិល្បៈភាពយន្តជាមួយអ្នកស្រីវីរៈ តារា ជាច្រើននាក់បានបាត់បង់ជីវិតក្នុងរបបប្រល័យពូជសាសន៍ខ្មែរក្រហម ជាក់ស្តែងគឺលោកណុប ណែម ស្លាប់នៅស្រុកកំណើតស្រុកត្រាំកក់ ខេត្តតាកែវ និងលោកគង់ សំអឿន ស្លាប់នៅស្រុកស្អាង ខេត្តកណ្តាល ។
ជីវភាពថ្មីនៅស្រុកបារាំង
មិនដូចនៅស្រុកកំណើតប្រទេសកម្ពុជា ដែលមានជីវភាពល្អប្រសើរដោយប្រកបរបរសិល្បៈភាពយន្តទេ នៅស្រុកបារាំងមានតែបាតដៃទទេ គ្មានសល់ធនធានអ្វីសោះ ដូច្នេះប្តី-ប្រពន្ធអ្នកស្រីវីរៈ តារា ត្រូវប្រឹងប្រែងធ្វើការងារតាមកម្លាំង និងអ្វីដែលអាចធ្វើបាន ។ ម្នាក់ៗខំធ្វើការហត់នឿយទាំងក្រុមគ្រួសារអ្នកស្រីវីរៈ តារា ទាំងជនរួមជាតិខ្មែរដែលភៀសខ្លួនទៅរស់នៅទីនោះដែរ ។
ឃ្លាតឆ្ងាយពីស្រុកជួបមុខអ្នករួមអាជីពនៅបារាំង
មិនមែនតែប្តី-ប្រពន្ធអ្នកស្រីវីរៈ តារា ទេ ដែលមានសំណាងនៅគង់ជីវិតដោយរំដោះខ្លួនរួចពីរបបប្រល័យពូជសាសន៍ ហើយភៀសខ្លួនទៅនៅប្រទេសបារាំង គឺមានជនរួមជាតិខ្មែរជាអ្នករួមអាជីពសិល្បៈមួយចំនួនទៀត ។ នៅទីនោះដោយរំភើបនឹករឭកចំពោះគ្នា អ្នកស្រីវីរៈ តារា បានជួបតារាភាពយន្តល្បីខាងកាចឆ្នាសឆ្នើម អ្នកស្រីសាក់ ស៊ីស្បោង, អ្នកស្រីពេជ្រ កញ្ញារ័ត្ន, ផ្កា រ៉ូហ្សែត និងអ្នកស្រីឌី សាវ៉េត ជាដើម ។ អ្នកស្រីពេជ្រ កញ្ញារ័ត្ន ចូលរួមសម្តែងភាពយន្តប្រមាណតែពីរទៅបីរឿងប៉ុណ្ណោះ ។
(សូមតាមដានភាគបន្តលេខក្រោយទៀត)
ភាគទី1
ខ្សែជីវិតអ្នកស្រីវីរៈ តារា តួឯករឿង «អនអើយស្រីអន»
ភាគទី2
https://kohsantepheapdaily.com.kh/article/614077.html
ចែករំលែកព័តមាននេះ