ខ្សែជីវិតអ្នកស្រីវីរៈ តារា តួឯករឿង «អនអើយស្រីអន»
- ភ្នំពេញ
ប្រភពដើម អ្នកស្រីវីរៈ តារា ចាប់កំណើតនាឆ្នាំ១៩៤៧ នៅខេត្តកំពត ។ «វីរៈ តារា» ជាឈ្មោះប្រើសម្រាប់អាជីពជាតារាភាពយន្ត តែឈ្មោះពីកំណើតរបស់អ្នកស្រីគឺ…
ប្រភពដើម
អ្នកស្រីវីរៈ តារា ចាប់កំណើតនាឆ្នាំ១៩៤៧ នៅខេត្តកំពត ។ «វីរៈ តារា» ជាឈ្មោះប្រើសម្រាប់អាជីពជាតារាភាពយន្ត តែឈ្មោះពីកំណើតរបស់អ្នកស្រីគឺ «គឹម ហៀក» ។
លោកកុក យិន ជាអ្នកបើកបររថយន្តពេទ្យ និងអ្នកស្រីសេង ញ៉ុង ជាមេផ្ទះ គឺជាឪពុកម្តាយរបស់អ្នកស្រីវីរៈ តារា ។
លោកកុក យិន មានឈាមជ័រជាចិនទាជីវ ចំណែកអ្នកស្រីសេង ញ៉ុង ជាកូនកាត់ចិនទាជីវ និងចិនហៃណាំ ។
ប្រវត្តិក្លាយជាតារាភាពយន្ត
អ្នកស្រីវីរៈ តារា មាននិស្ស័យស្រលាញ់ចូលចិត្តសិល្បៈតាំងពីនៅរៀន ហើយឧស្សាហ៍សម្តែងល្ខោននៅសាលា ។ នៅពេលអ្នកស្រីវីរៈ តារាធំពេញវ័យ ឪពុកម្តាយមិនពេញចិត្តឱ្យអ្នកស្រីសម្តែងសិល្បៈ ឬចាប់អាជីពសិល្បៈទេ ។ មូលហេតុដោយសារជំនាន់នោះអ្នកសម្តែងសិល្បៈច្រើនរងពាក្យនិន្ទាមិនល្អ ។
អាពាហ៍ពិពាហ៍គឺជាមាគ៌ាដែលតម្រង់ជីវិតអ្នកស្រីវីរៈ តារា ទៅជាតារាភាពយន្តដ៏ភ្លឺចិញ្ចាចចិញ្ចែង និងត្រូវទៅតាមនិស្ស័យពីកំណើតរបស់អ្នកស្រីដែលស្រលាញ់ចូលចិត្តសិល្បៈ ។ នាឆ្នាំ១៩៦៥ក្នុងវ័យ១៨ឆ្នាំស្រស់សោភា អ្នកស្រីវីរៈ តារា បានចូលរួមសម្តែងភាពយន្តជាលើកដំបូងក្នុងតំណែងតួឯកសម្រាប់រឿង «សព្វសិទ្ធិ»។ វណ្ណកម្មភាពយន្តនេះជារបស់ផលិតកម្ម «រន្ទះពេជ្រភាពយន្ត» ដែលលោកលី ប៊ុនយីម ជាចាងហ្វាង ។ លោកលី ប៊ុនយីម នេះហើយ ក្នុងនាមជាស្វាមី បានផ្តល់ឱកាសឱ្យអ្នកស្រីវីរៈ តារា ជាភរិយាចូលរួមសម្តែងភាពយន្ត ។
មិនមានការបង្ខិតបង្ខំពីលោកលី ប៊ុនយីម ទេ តែចូលរួមសម្តែងភាពយន្ត គឺអ្នកស្រីវីរៈ តារា ស្ម័គ្រចិត្ត ព្រោះស្រលាញ់ចូលចិត្ត ។
ពីដំបូងលោកលី ប៊ុនយីម មិនដឹងថា ភរិយារបស់ខ្លួនសម្តែងកើត ឬមិនកើតទេ ប៉ុន្តែឱ្យសាកល្បងមើល ។ បន្ទាប់ពីអ្នកស្រីវីរៈ តារា សម្តែងរឿង «សព្វសិទ្ធិ» ចប់ លោកលី ប៊ុនយីម មើលឃើញថា ភរិយារបស់ខ្លួនមានទេពកោសល្យសម្តែងភាពយន្តល្អគ្រាន់បើ ។ មិនតែប៉ុណ្ណោះនៅពេលខ្សែភាពយន្តរឿង «សព្វសិទ្ធិ» ចាក់បញ្ចាំង មានទស្សនិកជនច្រើនចូលទស្សនា ហើយគ្រប់គ្នាកោតសរសើរទេពកោសល្យសម្តែងរបស់អ្នកស្រីវីរៈ តារា ធ្វើឱ្យលោកលី ប៊ុនយីម សប្បាយចិត្តណាស់ ។
ចំពោះអ្នកស្រីវីរៈ តារា ផ្ទាល់រំភើបរីករាយណាស់ដែរ នៅពេលឃើញនៅមុខរោងភាពយន្តមានទស្សនិកជនច្រើនកកកុញប្រជ្រៀតគ្នាដណ្តើមទិញសំបុត្រចូលទស្សនាខ្សែភាពយន្តរឿង «សព្វសិទ្ធិ» ។
ទោះជាមានចំណូលចិត្ត តែអ្នកស្រីវីរៈ តារា ហាក់ដូចជាខ្វះទំនុកចិត្តខ្លួនឯង និងអៀនខ្មាសច្រើនក្នុងការសម្តែងភាពយន្តជាលើកដំបូង ទោះបីបានការណែនាំពីស្វាមីក្តី។ ខ្វះទំនុកចិត្ត និងអៀនព្រោះអ្នកស្រីវីរៈ តារា មិនធ្លាប់បានចូលរៀនផ្នែកសម្តែងភាពយន្ត ឬទទួលការបណ្តុះបណ្តាលពីមុនមកទេ គឺមានឱកាសតាមរយៈស្វាមីក៏ចូលរួមសម្តែងតែម្តង ។ អ្នកស្រី វីរៈ តារា គ្រាដំបូងនោះគ្រាន់តែឃើញកាមេរា៉ និងគេបើកភ្លើងបញ្ចាំងភ័យបាត់ទៅហើយ ។
ថ្វីបើមិនបានឆ្លងកាត់ការបណ្តុះបណ្តាលនៅសាលាក្តី តែទស្សនិកជនសរសើរចំពោះទេពកោសល្យសម្តែងរបស់អ្នកស្រីវីរៈ តារា ដូចជាតួអង្គនាង «អន» ក្នុងរឿង «អនអើយស្រីអន» ជាដើម ។
(សូមតាមដានភាគបន្តលេខក្រោយ)
ចែករំលែកព័តមាននេះ