ខេត្តក្រចេះ ៖ មានគ្រោះថ្នាក់ចរាចរណ៍ផ្លូវទឹកមួយ ដែលពុំធ្លាប់មានពីមុនមក រវាងទូកអ្នកភូមិ បុកជាមួយនឹងទូករបស់មណ្ឌលសុខភាពឃុំ ដែលកំពុងដឹកសពនៅកណ្តាលទន្លេដ៏ធំល្វឹងល្វើយនៅស្រុកសំបូរ បណ្តាលឱ្យបុរសអ្នកភូមិជាអ្នកបើកទូកធ្លាក់ទៅក្នុងទឹកទន្លេ និងបាត់ខ្លួនរកមិនទាន់ឃើញនៅឡើយ ។
ឧប្បត្តិហេតុគ្រោះថ្នាក់ផ្លូវទឹក ដែលនឹកស្មានមិនដល់នេះ ត្រូវបាននគរបាលស្រុកសំបូរនិយាយថា កើតឡើងកាលវេលាម៉ោង៤ទៀបភ្លឺថ្ងៃទី២២ មីនា នៅភូមិសំភិន ឃុំកំពង់ចាម ស្រុកសំបូរ ។ ចំពោះមូលហេតុដែលបណ្តាលឱ្យមានគ្រោះថ្នាក់ ត្រូវបាននគរបាលសន្និដ្ឋានថា មកពីយប់ងងឹត ភាគីទូកទាំងសងខាងមើលគ្នាពុំឃើញ ។
អធិការនគរបាលស្រុកសំបូរ លោកវរសេនីយ៍ឯក ប៊ុន ឈឿន បានឱ្យដឹងថា បុរសជាអ្នកនេសាទដែលបាត់ខ្លួនឈ្មោះ ជា សីហា អាយុ៣៨ឆ្នាំ មានទីលំនៅក្នុងឃុំសំបូរ ។ មុនពេលកើតហេតុ ជនរងគ្រោះបានបើកទូកប្រភេទអេវ (ទូកតូចតែលឿន) មកពីប៉ែកខាងលើ ដើម្បីរកទិញត្រីពីអ្នកនេសាទ ។ ចំណែកឯទូកមួយគ្រឿងទៀតជាប្រភេទទូកអេវដូចគ្នា គឺជារបស់មណ្ឌលសុខភាពឃុំ បើកដឹកសពអ្នកភូមិម្នាក់ដែលស្លាប់ដោយសារពស់ចឹកយកពីមណ្ឌលសុខភាពឆ្ពោះទៅធ្វើបុណ្យនៅឯលំនៅឋាន ។
លោកអធិការបញ្ជាក់ថា ក្នុងហេតុការណ៍បុកគ្នានោះ ទូកទាំងពីរគ្រឿងមិនបានលិចទេ តែបុរសជាអ្នកភូមិបានធ្លាក់ទឹកនិងបាត់ខ្លួន ហើយលោកសន្និដ្ឋានថា ប្រហែលជាស្លាប់ដោយសារលង់ទឹក ។ រហូតមកទល់នឹងរសៀលថ្ងៃដដែលនេះ កម្លាំងនគរបាលស្រុកកំពុងតែចុះស្វែងរក តែនៅមិនទាន់ឃើញនៅឡើយទេ ។
ចែករំលែកព័តមាននេះ