ទីក្រុងញូវយ៉ក ៖ សហរដ្ឋអាមេរិកកំពុងតែក្លាយជាប្រទេសនាំចេញប្រេងឆៅយ៉ាងសំខាន់ ព្រោះតែផលិតកម្មក្នុងប្រទេសកើនឡើង ដែលធ្វើឲ្យទីផ្សារប្រេងឥន្ធនៈសកលផ្លាស់ប្តូរផងដែរ ។
បច្ចុប្បន្ន សហរដ្ឋអាមេរិកបានបូមប្រេងជាង១០លានធុងក្នុង១ថ្ងៃ ហើយក្លាយជាប្រទេសផលិតប្រេងច្រើនជាងគេលេខ២ក្នុងពិភពលោក ក្រោយប្រទេសរុស្ស៊ីតែមួយប៉ុណ្ណោះ។ កំណើននេះ គឺជំរុញដោយបច្ចេកទេសបូម និងការផលិតប្រេងថ្មីៗ ។
កាលពីចុងឆ្នាំ២០១៥ សហរដ្ឋអាមេរិកបានដកការទប់ស្កាត់ការនាំចេញ ដែលបានអនុម័តតាំងពីវិបត្តិប្រេងក្នុងឆ្នាំ១៩៧០មកម្ល៉េះ ។ នៅឆ្នាំ២០១៧ ក្រុមហ៊ុនថាមពលបានឆ្លៀតឱកាសនាំចេញប្រេងប្រមាណ១,១លានធុងក្នុង១ថ្ងៃទៅកាន់ប្រទេសចំនួន៣៧ ។
ប្រទេសកាណាដា គឺជាទីតាំងនាំចេញធំជាងគេសម្រាប់សហរដ្ឋអាមេរិក ប៉ុន្តែសហរដ្ឋអាមេរិកក៏បាននាំចេញប្រេងកាន់តែច្រើនទៅកាន់តំបន់អាស៊ីផងដែរ ដែលជាទីផ្សារដ៏ធំរបស់់ OPEC ។
ទិន្នន័យបង្ហាញថា ប្រទេសចិនជាទីតាំងនាំចេញប្រេងធំជាងគេទី២ របស់សហរដ្ឋអាមេរិក។ ក្នុងរយៈពេល១០ឆ្នាំមកនេះ សហរដ្ឋអាមេរិកបាននាំចូលប្រេងតិចជាងមុន ដោយធ្លាក់ចុះពី១០លានធុងក្នុង១ថ្ងៃ មកស្មើតែ៨លានធុងក្នុង១ថ្ងៃប៉ុណ្ណោះ ។
ការរីកចម្រើននៃវិស័យប្រេងថ្ម សហរដ្ឋអាមេរិកមានគម្រោងសាងសង់បំពង់នាំប្រេងថ្មី ដែលអនុញ្ញាតឲ្យប្រទេសនេះនាំចូលប្រេងពីប្រទេសកាណាដា កាន់តែច្រើនជាងមុន ។ ប៉ុន្តែវាក៏បានផ្លាស់ប្តូរហេដ្ឋារចនាសម្ព័ន្ធថាមពលអាមេរិកផងដែរ ។
ពេលនេះ ក្រុមហ៊ុនអាមេរិកផ្តោតសំខាន់លើការបន្ថែមបំពង់នាំប្រេងក្នុងស្រុក និងច្រកនាំចេញក្នុងតំបន់ឈូងសមុទ្រ ដើម្បីនាំចេញប្រេងអាមេរិកទៅបរទេស ។
អ្នកជំនាញគិតថា ការនាំចេញប្រេងរបស់អាមេរិកអាចនឹងលូតលាស់បានប្រមាណពី៤ទៅ៥លានធុងក្នុង១ថ្ងៃ ដែលធ្វើឲ្យមានចម្ងល់ថា តើទីផ្សារណានឹងទិញប្រេងបន្ថែមទៀត។ ប្រសិនបើសហរដ្ឋអាមេរិកអាចរក្សាតម្លៃមានភាពប្រកួតប្រជែងបាននោះ ពួកគេអាចនឹងនាំចេញទៅកាន់តំបន់អាស៊ី ៕
ចែករំលែកព័តមាននេះ