រាជធានីភ្នំពេញ ៖ សេដ្ឋីកសិកម្មកម្ពុជាលោកឧកញ៉ា ម៉ុង ឫទ្ធី ដែលធ្លាប់តែល្បីល្បាញខាងជំនួញកសិកម្ម ពេលនេះបានប្រកាសចូលខ្លួនមកអភិវឌ្ឍន៍វិស័យលំនៅឋានតម្លៃសមរម្យ និងកំពុងត្រូវបានមហាជនទាំងក្នុង និងក្រៅស្រុក ពិសេសអ្នកជំនួញអចលនទ្រព្យចាប់អារម្មណ៍ ។
គម្រោងលំនៅឋានតម្លៃសមរម្យនេះ អាចចាត់ទុកថាប្លែកពីគម្រោងដទៃ ដោយសារតម្លៃលំនៅឋានក្នុងគម្រោងនេះចាប់ពី៧ម៉ឺនដុល្លារឡើង និងមានទីតាំងនៅតំបន់ភ្នំ ខុសពីគម្រោងលំនៅឋានតម្លៃសមរម្យរបស់ក្រុមហ៊ុនអភិវឌ្ឍន៍ដទៃដែលមានតម្លៃត្រឹមក្រោម៤ម៉ឺនដុល្លារ និងមានទីតាំងនៅទីប្រជុំជន ។
បើតាមលោកឧកញ៉ា ម៉ុង ឫទ្ធី ប្រធានក្រុមហ៊ុន ម៉ុង ឫទ្ធី គ្រុប បានឲ្យដឹងថា គម្រោងមានឈ្មោះថា«ទីក្រុងភ្នំ» សព្វថ្ងៃកំពុងសម្រុកកសាងហេដ្ឋារចនាសម្ព័ន្ធ នឹងត្រៀមបើកការដ្ឋានសាងសង់ឆាប់ៗខាងមុខនេះនៅលើផ្ទៃដីប្រមាណ៣០០ហិកតា ស្ថិតនៅតំបន់ភ្នំ ក្នុងស្រុកសំរោងទង ខេត្តកំពង់ស្ពឺ ដោយគ្រោងសាងសង់លំនៅឋានចំនួន៣០០ខ្នង មានតម្លៃយ៉ាងតិច៧ម៉ឺនដុល្លារឡើង ។
លោកឧកញ៉ាបន្តថា ៖« គម្រោងសាងសង់ផ្ទះតម្លៃមធ្យមមួយនេះសម្រាប់អ្នករស់នៅក្នុងតំបន់មានចំណាប់អារម្មណ៍តិចតួច តែអ្នកនៅក្រុងភ្នំពេញ និងក្រៅប្រទេស មានចំណាប់អារម្មណ៍ច្រើន ជាពិសេសខ្មែរយើងទៅរស់នៅក្រៅប្រទេស គឺបានទាក់ទងមកច្រើន ចង់បានម្នាក់១ខ្នងដើម្បីចាស់ទៅមករស់នៅស្រុកវិញ »។
គម្រោង«ទីក្រុងភ្នំ»នេះ មានរៀបចំហេដ្ឋារចនាសម្ព័ន្ធសាធារណៈយ៉ាងប្រណីត ទីធ្លានិងផ្ទះនីមួយៗមានទំហំជាង១ពាន់ម៉ែត្រការ៉េ នៅដាច់ពីគ្នានិងមានរបងព័ទ្ធជុំវិញ មានសួនច្បារ ចំណតរថយន្ដ ។ ចំណែកទីសាធារណៈមានស្រះទឹក១៣កន្លែង និងដើមឈើជាង១លានដើម ប្រកបដោយបរិយាកាសបរិសុទ្ធគួរជាទីរស់នៅ ដែលក្រុមហ៊ុនបានចំណាយពេលរៀបចំអស់រយៈពេល១០ឆ្នាំមកហើយ ។ ដូច្នេះតម្លៃនេះបើគិតពីការទិញដី បូកនឹងតម្លៃផ្ទះ មិនជាថ្លៃណាស់នោះទេ ។
លោកឧកញ៉ាថា ៖« បើគាត់[អតិថិជន]យកលុយ១០ម៉ឺនដុល្លារមកទិញដីសង់ផ្ទះ ក៏អត់បានដែរ ម្ល៉ោះហើយគាត់ចង់ជ្រើសរើសផ្ទះបែបហ្នឹងដែលទំហំ១.២០០ម៉ែត្រការ៉េ យើងមានដាំដើមឈើឱ្យ និងថែទាំផ្ទះឱ្យទាំងអស់ ។ អីចឹងវាមានភាពងាយស្រួល ហើយតម្លៃផ្ទះ គិតទាំងអស់យ៉ាងតិច៧ម៉ឺនដុល្លារ និងមានមួយប្រភេទទៀតលើសពី៧ម៉ឺនដុល្លារ»។
លោកឧកញ៉ាលើកឡើងថា ៖« នៅប្រទេស កូរ៉េ តៃវ៉ាន់ និងជប៉ុន គេមានទីក្រុងឆ្នេរសមុទ្រ ទន្លេ និងទីក្រុងភ្នំ ។ ចំណែកយើងរាល់ថ្ងៃមានទន្លេ សមុទ្រ និងភ្នំ អីចឹងខ្ញុំមានចំណាប់អារម្មណ៍មួយគឺភ្នំ ។ ដូច្នេះ ខ្ញុំធ្វើជាទីក្រុងភ្នំ ហើយឥឡូវនេះ នៅចុងសប្តាហ៍ មានសិស្សសាលាតែងនាំគ្នាទៅលេងកម្សាន្ដស្រូបយកខ្យល់អាកាសបរិសុទ្ធ ដោយសារដើមឈើទាំងនោះក៏ចាប់លូតលាស់ធំៗខ្លះហើយដែរ »។
អ្នកជំនាញអចលនទ្រព្យលំដាប់អន្តរជាតិ លោក វ៉ា វីរៈ នាយកក្រុមហ៊ុន Century 21 មានប្រសាសន៍កាលពីថ្ងៃទី៩ មីនា ថា គម្រោងដែលគ្រោងអភិវឌ្ឍន៍នេះ បើនៅភ្នំពេញមិនជាធំនោះទេ ប៉ុន្តែបើសាងសង់នៅតាមខេត្ត គឺជាគម្រោងដ៏ធំមួយ ឬធំជាងគេនៅក្នុងខេត្ត ហើយនឹងជួយឲ្យតម្លៃដីធ្លី និងសកម្មភាពទិញលក់កាន់តែមានសន្ទុះថែមមួយកម្រិតទៀត ។
លោកបន្តថា ៖« នៅពេលមានការអភិវឌ្ឍសាងសង់ជាបុរី និងកសាងហេដ្ឋារចនាសម្ព័ន្ធ ហើយតម្លៃផ្ទះលក់ប៉ុណ្ណឹង ខ្ញុំគិតថាតម្លៃដីនៅក្នុងតំបន់ហ្នឹង នឹងកើនឡើងបន្ថែមទៀត ។ លើសពីនេះ ក្រោយគម្រោងនេះអភិវឌ្ឍន៍រួច អាចមានគម្រោងធំៗរបស់អ្នកផ្សេងទៀត នឹងចូលខ្លួនសាងសង់ផ្ទះតម្លៃទាបជាងនេះនៅក្បែៗនោះដែរ ព្រោះដីនៅតំបន់នោះធូរថ្លៃ ដើម្បីបង្កើតជាជម្រើសបន្ថែមជូនអតិថិជន ។ ជាងនេះទៅទៀត នៅថ្ងៃអនាគត អាចក្លាយជាតំបន់ដែលមានសក្តានុពលថែមទៀត »។
លោកបន្ថែមថា ៖« ជាទូទៅនៅតំបន់នោះ តម្លៃដីនៅធូរថ្លៃ មិនទាន់ជាថ្លៃណាស់ណាទេ ប៉ុន្តែបើមានការអភិវឌ្ឍគម្រោងដូចខាងលើ ខ្ញុំគិតថាតម្លៃដីនឹងកើនឡើង ។ ជាពិសេបើដីនៅតំបន់ក្បែរផ្លូវល្បឿនលឿន ពីភ្នំពេញទៅខេត្តព្រះសីហនុ គឺកាន់តែមានសក្ដានុពលថែមទៀត » ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting មើលឃើញថា មានមូលហេតុធំៗពីរដែលក្រុមហ៊ុនលោកឧកញ៉ា ម៉ុង ឫទ្ធី ទៅអភិវឌ្ឍន៍នៅតំបន់នោះ ។
លោក ង៉ែត ជូ បានឲ្យដឹងតាមទូរស័ព្ទកាលពីថ្ងៃទី១៦ មីនា ម្សិលមិញថា ៖« គម្រោងអភិវឌ្ឍន៍នេះ ក្រុមហ៊ុនអាចមានមូលហេតុធំពីរ គឺដីធ្លីនៅតំបន់នោះនៅមានថ្លៃទាប និងទីតាំងស្ថិតនៅមិនឆ្ងាយពីទីក្រុងភ្នំពេញ ដែលផ្ដល់ភាពងាយស្រួលសម្រាប់ប្រជាពលរដ្ឋចេញចូល និងធ្វើការនៅភ្នំពេញ ។ លើសពីនេះខេត្តកំពង់ស្ពឺ ក៏ជាខេត្តមានសក្តានុពលច្រើនទាក់ទងនឹងឧស្សាហកម្មនាពេលអនាគត ហើយក៏ជាផ្នែកមួយនៃការពង្រីកទីក្រុងភ្នំពេញដែលកំពុងអភិវឌ្ឍន៍ដ៏ខ្លាំងក្លាផងដែរ »៕
ចែករំលែកព័តមាននេះ