រាជធានីភ្នំពេញ ៖ ថៅកែទទួលបញ្ចាំ២នាក់ប្ដីប្រពន្ធនៅកាស៊ីណូណាហ្គា បានត្រូវក្រុមចោរ២នាក់ប្រដាប់អាវុធមិនស្គាល់អត្តសញ្ញាណធ្វើសកម្មភាពតាមបាញ់ប្រហារចំនួនពីរគ្រាប់ប្លន់យកកាបូបប្រាក់ទៅបាត់ ដែលតាមប្រភពព័ត៌មានថា ប្រាក់នៅក្នុងកាបូបនោះមានចំនួនជិត៣ម៉ឺនដុល្លារ កាលពីវេលាម៉ោង៨ និង១៥នាទីយប់ថ្ងៃទី២ មករា ២០១៣ នៅពេលមកដល់មុខផ្ទះរបស់ខ្លួនលេខ៧៨ ផ្លូវបេតុងក្រុមទី១២ ភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ ។
តាមប្រភពព័ត៌មានពីកន្លែងកើតហេតុឱ្យដឹងថា ស្ត្រីអាជីវករដែលត្រូវចោរប្លន់នេះឈ្មោះសយ គន្ធា អាយុ៣១ឆ្នាំ មានទីលំនៅក្នុងភូមិខាងលើ ។ ស្ត្រីជាប្រពន្ធបានត្រូវក្រុមចោរប្លន់បាញ់ចំក្បាលជង្គង់មួយគ្រាប់ និងត្រូវបញ្ជូនទៅសង្គ្រោះនៅមន្ទីរពេទ្យកាល់ម៉ែតភ្លាមៗ ។
ប្រភពព័ត៌មានជុំវិញហេតុការណ៍ខាងលើនេះឱ្យដឹងថា ស្ត្រីឈ្មោះសយ គន្ធា បានជិះរថយន្តឡិចស៊ីសRX៣៣០ ពណ៌ស ជាមួយប្ដីធ្វើដំណើរចេញពីកាស៊ីណូណាហ្គាឆ្ពោះមកលំនៅឋានវិញដូចធម្មតា ។ លុះពេលមកដល់មុខផ្ទះក៏បានឈប់រថយន្តបំណងថយចូលផ្ទះ ។ ចំណែកប្រពន្ធក៏ចុះពីរថយន្តមុនដោយស្ពាយកាបូបប្រាក់នៅជាប់នឹងខ្លួនផងដែរ ។ ខណៈនោះស្រាប់តែលេចមុខចោរប្លន់មានគ្នាពីរនាក់ជិះម៉ូតូសេ១២៥ ពណ៌ខ្មៅ ស៊េរី២០០៨ មួយគ្រឿងមកដល់ធ្វើសកម្មភាពភ្ជង់ និងបាញ់ប្រហារចំនួនពីរគ្រាប់ដណ្ដើមយកកាបូបប្រាក់ពីស្ត្រីជាប្រពន្ធរួចឡើងជិះម៉ូតូដែលបក្សពួកបញ្ឆេះចាំរួចជាស្រេចគេចខ្លួនទៅបាត់ស្រមោលគឺតាមមកប្លន់ឆៅតែម្ដងអត់និយាយមួយម៉ាត់សោះ ។
ចំពោះករណីខាងលើនេះ សមត្ថកិច្ចមូលដ្ឋានកំពុងធ្វើការស្រាវជ្រាវស្វែងរកមុខសញ្ញាចោរប្លន់ប្រដាប់អាវុធដើម្បីចាប់ខ្លួនយកមកផ្ដន្ទាទោសតាមច្បាប់ ។ សូមបញ្ជាក់ថា នេះជាករណីទីមួយហើយ សម្រាប់ដើមឆ្នាំ២០១៣នេះ អំពីសភាពការណ៍ប្លន់ប្រដាប់អាវុធដែលបានកើតឡើងគួរឱ្យភ័យខ្លាចសម្រាប់ប្រជាពលរដ្ឋស្លូតត្រង់រស់នៅក្នុងរាជធានីភ្នំពេញ ។
គួរបញ្ជាក់ថា ក្រោយពីកើតហេតុសមត្ថកិច្ចបានចុះទៅពិនិត្យដល់ទីកន្លែងរកឃើញសម្បកគ្រាប់កាំភ្លើងម៉ាកកា៥៩ចំនួនពីរនៅកន្លែងកើតហេតុ ។ ដូច្នេះសមត្ថកិច្ចអះអាងថា ចោរប្លន់បានប្រើកាំភ្លើងខ្លីធ្វើសកម្មភាពបាញ់ប្លន់នេះ ។
បញ្ហាគ្រប់គ្រងអាវុធជាតិផ្ទុះនៅតែស្ថិតក្នុងស្ថានភាពមួយមិនអាចគ្រប់គ្រងបាន ដោយសារតែក្រុមខ្មាន់កាំភ្លើងនៅតែមានលទ្ធភាពក្នុងការប្រើប្រាស់ដោយមិនស្របច្បាប់យកទៅបាញ់ប្លន់ ឬបាញ់ប្រហារមនុស្សដូចបាញ់ចាប ហើយពិតជាពិបាកស្រាវជ្រាវដើម្បីចាប់ខ្លួន ។ មានការកត់សម្គាល់ថា ករណីខាងលើនេះមិនមែនជាការប្លន់ដោយចៃដន្យនេះទេ ដែលតាមការសន្និដ្ឋានគឺចោរបានស្គាល់ច្បាស់នូវថៅកែរកស៊ីបញ្ចាំក្នុងកាស៊ីណូនេះ ហើយឆក់ឱកាសតាមប្លន់តែម្ដង ៕
ចែករំលែកព័តមាននេះ