លោកតាអាចារ្យម្នាក់ ត្រូវសសររលំសង្កត់លើស្លា.ប់យ៉ាងរន្ធត់ នៅពេលទៅជួយរុះរើកុដិលោកក្នុងវត្ត
- បាត់ដំបង
ខេត្តបាត់ដំបង ៖ លោកតាអាចារ្យម្នាក់ត្រូវសសរកុដិរលំសង្កត់លើ បណ្ដាលឲ្យស្លាប់ភ្លាមៗ នៅពេលគាត់ជាមួយនឹងព្រះសង្ឃប៉ុន្មានអង្គទៀត ធ្វើការរុះរើកុដិចាស់ ដើម្បីរៀបចំសាងសង់កុដិជាថ្មី កាលពីរសៀលថ្ងៃទី០៧ មិថុនា នៅក្នុង «វត្តស្រែអណ្ដូង» ស្ថិតក្នុងភូមិកន្ទូត ឃុំសំឡូត ស្រុកសំឡូត ។
របាយការណ៍មន្ត្រីមូលដ្ឋានបានឲ្យដឹងថា ជនរងគ្រោះឈ្មោះ គឹម គក់ អាយុ៦៧ឆ្នាំ ហើយគាត់មានតួនាទីជា «អាចារ្យ វត្តស្រែអណ្ដូង» ។ លោកតា ត្រូវសសរកុដិដ៏ធំរលំសង្កត់លើ ពេលគាត់និងព្រះសង្ឃប៉ុន្មានអង្គទៀត កំពុងធ្វើការរុះរើកុដិចាស់ ដើម្បីរៀបចំធ្វើកុដិថ្មី ។
អធិការស្រុកសំឡូត លោក ម៉ែន រីម បានប្រាប់បន្ថែមថា ជនរងគ្រោះត្រូវសសររលំសង្កត់ចំក្បាល ហើយគាត់បានស្លាប់ភ្លាមៗតែម្ដង ដោយពុំអាចបញ្ជូនទៅមន្ទីរពេទ្យឡើយ ។ លោកអធិការបានបញ្ជាក់ដែរថា លោកតាអាចារ្យ រួមជាមួយចាស់ៗប៉ុន្មាននាក់ទៀត និងព្រះសង្ឃក្នុងវត្ត មានទាំងព្រះគ្រូចៅអធិការវត្តផង បានធ្វើការរុះរើកុដិឈើដែលចាស់ទ្រុឌទ្រម ។
ប៉ុន្តែពេលកំពុងធ្វើការរុះរើ ហាក់មានការធ្វេសប្រហែស ទើបធ្វើឲ្យសសេរមួយដើមធំ រលំសង្កត់លើតាអាចារ្យម្នាក់ ត្រូវចំក្បាលរបួសយ៉ាងធ្ងន់ធ្ងរ រហូតធ្វើឲ្យគាត់ស្លាប់ភ្លាមៗនៅកន្លែងកើតហេតុ ។ នេះជាការធ្វេសប្រហែស និងខ្វះការប្រុងប្រយ័ត្នពេលបំពេញការងារ ទើបបង្កឲ្យមានគ្រោះថ្នាក់បែបនេះ ៕
ចែករំលែកព័តមាននេះ