រាជធានីភ្នំពេញ ៖ ក្នុងពេលដែលយុវវ័យសម័យហ្វេសប៊ុកចូលចិត្តណាស់បទបែបស្លុយៗ និងតារាបរទេសមកសម្តែងម្តងៗបាក់ទឹកបាក់ទំនប់និយាយមិនចេញ ប៉ុន្តែឱ្យតែសិល្បៈវប្បធម៌ខ្មែរចេញមក ខ្លះធម្មតាអត់សូវផុសឡើងដូចបរទេសឡើយ។
ក្នុងរយៈពេលនេះ គេឃើញតារាចម្រៀងយុវវ័យស្ទើរទាំងអស់នៅក្នុងប្រទេសកម្ពុជា ប្រជែងគ្នាចេញបទបែកស្លុយប្លែកៗជាច្រើន ដោយមិនខ្វល់ថា បទចម្រៀងទាំងនោះជាការពង្វក់ដល់ក្រុមយុវវ័យឱ្យឈ្លក់វង្វេង និងជាការរួមចំណែកបំបាត់នូវអត្តសញ្ញាណខ្មែរ ដែលធ្លាប់តែវាយលុកដោយបទចម្រៀងប្រពៃណីខ្មែរក្នុងពេលចូលឆ្នាំមកដល់នោះទេ។
យ៉ាងណាក៏ដោយ គេនៅតែឃើញតារាចម្រៀង អ្នកនាងខាត់ សុឃីម ប្រឹងចេញបទប្រពៃណី ដោយក្រៅពីចេញបទចម្រៀងសម្រាប់គ្រាន់តែរាំក្នុងឱកាសបុណ្យចូលឆ្នាំនៅក្នុងផលិតកម្មហង្សមាស អ្នកនាងក៏ចេញចម្រៀងឯកជនមួយបទ ស្ដាប់ហើយសង្វេគសិល្បៈបុរាណ ដែលមិនខុសពីខោកក្បាលអ្នកពេញនិយមបទបែកស្លុយ ដោយមិនខ្វល់ពីការប៉ះពាល់ចំពោះវប្បធម៌របស់ជាតិខ្លួនឯងនោះដែរ។
បទចម្រៀងដែលធ្វើឱ្យអ្នកលេងហ្វេសប៊ុកចាប់អារម្មណ៍ចំពោះអ្នកនាង ហើយទើបតែចេញក្ដៅៗនៅលើប្រព័ន្ធអនឡាញនោះ មានចំណងជើងថា បទ «រងារ» ដោយបទចម្រៀងនេះ ក្រៅពីមានសាច់ភ្លេងពោរពេញដោយអត្តសញ្ញាណពីតន្ត្រីរបស់ខ្មែរ ក៏មានអត្តន័យស្ដាប់ហើយឈឺចាប់ នឹងការប្រែប្រួលនៃសង្គមយុវវ័យចំពោះសិល្បៈបុរាណនាពេលនេះផងដែរ។ សាច់ភ្លេងក្នុងបទចម្រៀងនេះ ត្រូវគេដឹងថា មានការរួមបញ្ចូលដោយភ្លេងឆៃយ៉ាំ ភ្លេងពិណ្យពាទ្យ ស្ករ និងភ្លេងសម័យ ដែលធ្វើឱ្យប្លែកត្រចៀក ប៉ុន្តែគេនៅតែមើលឃើញថា អត្ថន័យបទនេះ ពោរពេញដោយខ្លឹមសារស៊ីជម្រៅជាង ដែលអ្នកបានស្ដាប់ហើយ ពិតជាមើលឃើញពីផលប៉ះពាល់នៃចង្វាក់បែកស្លុយ និងការពេញនិយមនូវបទចម្រៀងបែបចង្វាក់បរទេសទាំងនោះ។ ត្រង់ចំណុដែលអ្នកនាងច្រៀងថា «ល្ខោន យីកេ និងបទប្រពៃណីនានា លែងមានអ្នកចង់ស្ដាប់» ។
អ្នកនាងខាត់ សុឃីម បានអះអាងបន្ថែមពីលើបទចម្រៀងថា អ្វីដែលបានស្ដែងឡើងនៅក្នុងប៉ារ៉ូលចម្រៀងនេះ គឺជារឿងដែលមនុស្សភាគច្រើនមើលឃើញ ហើយក៏ជាអ្វីដែលអ្នកនាងចង់ផ្ញើសារទៅកាន់មហាជនផងដែរថា ការផ្លាស់ប្ដូរទម្លាប់ដែលបានធ្វើឡើង គឺជាអ្វីដែលរួមចំណែកឱ្យខ្មែរបាត់បង់អត្តសញ្ញាណវប្បធម៌របស់ខ្លួន។ អ្នកនាងថា ជាការសង្វេគចិត្តណាស់ ដែលពេលបទចម្រៀងបែកស្លុយបង្ហាញខ្លួននៅលើវេទិកា គឺមានយុវវ័យទះដៃស្ទះតែបាក់ដៃចោល ប៉ុន្តែដល់ពេលចម្រៀងបុរាណចេញមក គឺបាត់អ្នកគាំទ្រអស់រលីង ដែលមិនខុសពីធ្វើឱ្យក្រុមតន្ត្រីបុរាណ ឬអ្នកចម្រៀងបុរាណ បាត់បង់កម្លាំងចិត្តបន្តការងារ។ ស្របគ្នាដែលឆាកតន្ត្រី និងកម្មវិធីនានារំលេចតែបទបែកស្លុយ និងតម្រូវចិត្តតែយុវវ័យទៀត ទើបធ្វើឱ្យអ្នកសិល្បៈបុរាណក្លាយជាមនុស្សអស់តម្លៃ។
យ៉ាងណាមិញ អ្នកនាងថា ខ្លួននឹងបន្តធ្វើឱ្យសិល្បៈបែបចម្រៀងប្រពៃណី និងជាលក្ខណៈអត្តសញ្ញាណជាតិអាចហើបតិចៗ បើទោះជាការចេញបទរបស់ខ្លួន នៅមិនទាន់ដឹងថា នឹងមានអ្នកគាំទ្រកម្រិតណានៅឡើយ។ អ្នកនាងខាត់ សុឃីម និយាយថាបទចម្រៀង «រងារ» គឺសំដៅពីភាពបាត់បង់ការគាំទ្រនូវសិល្បៈបុរាណក្នុងស្រទាប់មហាជន ដោយអ្នកនាងបញ្ជាក់ថា នេះជាបទនៅខាងក្រៅផលិតកម្ម ដែលអ្នកនាងចេញច្រៀង ដើម្បីបង្វែរអារម្មណ៍មហាជនឱ្យអាណិតចំពោះតារាសិល្បៈខាងផ្នែកបុរាណវិញផង៕
ប្រភពវីដេអូពីហ្វេសប៊ុក ៖
https://www.facebook.com/BrandnameHD/videos/1348719355234610/
ចែករំលែកព័តមាននេះ