ខេត្តបន្ទាយមានជ័យ ៖ កម្មករម្នាក់ត្រូវដីបាក់សង្កត់ក្នុងរណ្តៅ ខណៈចុះទៅដាប់ ឬស្វានសសរគ្រឹះ ដើម្បីចាក់បេតុងតសសរថ្មីបង្កភ្ញាក់ផ្អើល ។ ហេតុការណ៍ខាងលើកើតឡើងនៅព្រឹកថ្ងៃទី០៨ ខែមីនានេះ នៅភូមិក្បាលស្ពាន១…
ខេត្តបន្ទាយមានជ័យ ៖ កម្មករម្នាក់ត្រូវដីបាក់សង្កត់ក្នុងរណ្តៅ ខណៈចុះទៅដាប់ ឬស្វានសសរគ្រឹះ ដើម្បីចាក់បេតុងតសសរថ្មីបង្កភ្ញាក់ផ្អើល ។ ហេតុការណ៍ខាងលើកើតឡើងនៅព្រឹកថ្ងៃទី០៨ ខែមីនានេះ នៅភូមិក្បាលស្ពាន១ សង្កាត់និងក្រុងប៉ោយប៉ែត ។
ជនរងគ្រោះឈ្មោះ ជៀប ចេក ភេទប្រុស អាយុ៣៣ឆ្នាំ ជាកម្មករសំណង់ និងមានទីលំនៅភូមិស្វាយ ឃុំបឹងបត់កណ្តោល ស្រុកបាកាន ខេត្តពោធិ៍សាត់ ។
ប្រភពពីកម្មកររួមអាជីពម្នាក់ឈ្មោះ លាភ សុភ័ក្រ ភេទប្រុស អាយុ២៨ឆ្នាំ ប្រាប់ថា ដំបូងកម្មករចុះទៅក្នុងរណ្តៅដី ដើម្បីស្វាន ឬដាប់សសរគ្រឹះនោះមាន៤នាក់ លុះកំពុងធ្វើការស្រាប់តែបាក់រណ្តៅដីកប់បាត់ ជនរងគ្រោះ ខណៈគាត់ និងកម្មករ៣នាក់ទៀត នៅរណ្តៅផ្សេងឮក៏នាំគ្នាកាយដីរកជិត២នាទី ទើបឃើញក្បាលជនរងគ្រោះ ហើយនាំគ្នាកាយបន្តកន្លះម៉ោងទើបយកជនរងគ្រោះពីរណ្តៅកើតហេតុបាន ។ ជនរងគ្រោះត្រូវបានក្រុមកម្មកររួមអាជីពដឹកតាមរ៉ឺម៉កម៉ូតូកង់បី ទៅមណ្ឌលសុខភាពប៉ោយប៉ែត១ ដែលនៅក្បែរនោះ ដើម្បីឲ្យក្រុមគ្រូពេទ្យជួយសង្គ្រោះ ។
គួរបញ្ជាក់ថា ករណីដូចខាងលើកន្លងមកក៏ធ្លាប់កើតមានដែរ ក្នុងភូមិបាលិលេយ្យខាងលិចធនាគារអេស៊ីលីដា ជាប់ដងផ្លូវជាតិលេខ៥ ខណៈកម្មករម្នាក់ចុះទៅយកម៉ូទ័របូមទឹកស្រាប់តែបាក់ដីសង្កត់ស្លាប់ភ្លាមៗ ៕
ចែករំលែកព័តមាននេះ