ខេត្តកំពង់ធំ ៖ បុរសអ្នកដាំឈូកម្នាក់រាយខ្សែលួសតភ្លើងឲ្យឆក់គោក្របី បែរជាឆក់មនុស្សស្លាប់ត្រូវចាប់ខ្លួនករណីឃាត់ខ្លួនជនសង្ស័យត្រូវបានធ្វើឡើងនៅរសៀលថ្ងៃទី៧ ខែមីនា ឆ្នាំ២០១៨ ស្ថិតនៅចំណុចក្នុងត្រពាំងឆ្ដោ ក្នុងភូមិសាស្ត្រ ឃុំចំណាក្រោម ស្រុកស្ទោង…
ខេត្តកំពង់ធំ ៖ បុរសអ្នកដាំឈូកម្នាក់រាយខ្សែលួសតភ្លើងឲ្យឆក់គោក្របី បែរជាឆក់មនុស្សស្លាប់ត្រូវចាប់ខ្លួនករណីឃាត់ខ្លួនជនសង្ស័យត្រូវបានធ្វើឡើងនៅរសៀលថ្ងៃទី៧ ខែមីនា ឆ្នាំ២០១៨ ស្ថិតនៅចំណុចក្នុងត្រពាំងឆ្ដោ ក្នុងភូមិសាស្ត្រ ឃុំចំណាក្រោម ស្រុកស្ទោង ខេត្តកំពង់ធំ ដែលជាកម្មសិទ្ធរបស់ជនសង្ស័យពាក់ព័ន្ធ និងករណីខាងលើនេះ ។
លោកវរសេនីយ៍ត្រី វ៉ន សុភ័ណ អធិការរងនគរបាលស្រុកស្ទោងទទួលខាងព្រហ្មទណ្ឌបានឲ្យដឹងថា ជនសង្ស័យឈ្មោះ យ៉ាន ម៉ក់ ភេទប្រុស អាយុ៥៩ឆ្នាំ មានទីលំនៅភូមិសំព័រ ឃុំចំណាក្រោម ស្រុកស្ទោង ខេត្តកំពង់ធំ ។
ពាក់ពន្ធ័ករណីរាយខ្សែលួសតភ្ជាប់ចរន្តអគ្គិសនី ដាក់អាំងវាំងទ័រភ្ជាប់ជាមួយអាគុយឲ្យឆក់គោក្របី ដែលបណ្ដាលឲ្យឆក់ស្លាប់មនុស្សម្នាក់វិញ ។ នៅចំពោះសមត្ថកិច្ចជនសង្ស័យឈ្មោះ យ៉ាន ម៉ក់ បានសារភាពថា រូបគាត់បានទៅប្រកបរបដាំឈូកលក់ នៅចំណុចត្រពាំងឆ្តោខាងលើ ដោយសារតែខឹង និងគោក្របីដែលតែងតែចូលមកចុះផឹកទឹក និងស៊ីឈូករបស់ខ្លួនពេកក៏បានយកខ្សែលួសមករាយព័ទ្ធនៅតាមមាត់ត្រពាំង រួចចាប់អាំងវាំងទ័រទុកចោលសម្រាប់ឲ្យឆក់គោក្របីនោះទេ ពីព្រោះតែវាបានបំផ្លិចបំផ្លាញឈូករបស់គាត់ ដោយមិនបានដឹងថា ឆក់មនុស្សស្លាប់នោះឡើយ ទាល់តែនៅយប់ថ្ងៃទី៦ ខែមិនា ក៏មានប្រជាពលរដ្ឋប្រទះឃើញសព ហើយមកប្រាប់គាត់ទើបដឹង ។
លោកអធិការរងបន្តថា នៅវេលាម៉ោង៨និង៣០នាទីយប់ថ្ងៃទី០៦ ប្រជាពលរដ្ឋបានរាយការមកថា ប្រទះឃើញសព ដោយសារតែកន្លែងកើតហេតុនៅឆ្ងាយ ជិតដល់មាត់ទន្លេសាបឯណោះ ហើយយប់ទៀតនោះ កម្លាំងយើងរង់ចាំព្រឹកថ្ងៃទី០៧ បានចុះទៅឃើញសពត្រូវខ្សែលួសរុំជាប់ស្លាប់ឡើងហើម ក៏នាំគ្នាពិនិត្យឃើញថា ជនរងគ្រោះមានឈ្មោះ ហ៊ឹម ឡាង ភេទប្រុស អាយុ៤៦ឆ្នាំ មានទីលំនៅភូមិប្រាសាទ ឃុំចំណាលើ ស្រុកស្ទោង ពិតជាស្លាប់ដោយឆក់ និងខ្សែលួសប្រាដកមែន ។
បើតាមការបញ្ជាក់ពីសាច់ញាតិប្រាប់ថា ជនរងគ្រោះបានចេញពីផ្ទះកាលពីរសៀលថ្ងៃទី៥ ខែមីនា ឆ្នាំ២០១៨ ជាប់ជាមួយនៅប៉ោងសម្រាប់យកទៅដាក់អន្ទុងនៅចំណុចខាងលើ ហើយក៏បាត់ខ្លួនមិនឃើញមកផ្ទះរហូតដល់មានគេប្រទះឃើញសពបានស្លាប់យ៉ាងអាណោចអាធម្ម នៅក្នុងទឹកត្រពាំង ក៏រាយការណ៍ប្រាប់ដល់សមត្ថកិច្ចតែម្តង ករណីនេះជនសង្ស័យត្រូវបានសមត្ថកិច្ចជំនាញកសាងសំណុំរឿងតាមនីតិវិធីច្បាប់ ៕
ចែករំលែកព័តមាននេះ