ខេត្តកំពង់ធំ ៖ ប្រជាជនខេត្តកំពង់ធំប្រមាណ៨៥% ប្រកបមុខរបរធ្វើស្រែ និងចម្ការ ចំណែកប្រមាណ១៥%ទៀតប្រកបមុខរបរ ផ្សេងៗគ្នា អ្នកខ្លះលក់ដូរ រីឯខ្លះទៀតធ្វើជាជាងចម្លាក់ថ្មគ្រប់ប្រភេទដើម្បីបំពេញទៅតាមសេចក្តីត្រូវការរបស់អតិថិជនជិតឆ្ងាយក្នុងនិងក្រៅខេត្ត ។ ធ្វើដំណើរពីភ្នំពេញតាមបណ្តោយផ្លូវជាតិលេខ៦ចម្ងាយប្រហែល១៥៣គីឡូម៉ែត្រដល់ភូមិសំណាក ឃុំកកោះ ស្រុកសន្ទុកខេត្តកំពង់ធំ បើក្រឡេកមើលនៅអមសងខាងផ្លូវនឹងឃើញជាងកំពុងតែឆាប ឈូស ដាប់ និងឆ្លាក់រូបចម្លាក់គ្រប់ប្រភេទចេញកម្ទេចហុយទ្រលោមធ្វើឡើងអំពីថ្មភក់ ថ្មកែវ ដើម្បីបម្រើទៅតាមសេចក្តីត្រូវការរបស់អតិថិជន មានដូចជាឆ្លាក់ទៅតាមរូបថត រូបសំណាកព្រះសង្ឃ រូបទេវតា រូបព្រះឥន្ទ រូបព្រះបាទជ័យវរ្ម័នទី៧ ព្រះពុទ្ធរូបរូបគោ រូបសេះ រូបតោ និងរូបដំរីជាដើម ។
ពាក់ព័ន្ធមុខរបរចម្លាក់នេះ លោកសុក ធន់អាយុ៣១ឆ្នាំ រស់នៅភូមិសំណាកឱ្យដឹងកាលពីពេល ថ្មីៗកន្លងមកថា លោកជាមេជាងចម្លាក់ទទួលបានប្រាក់ខែ៤០០ដុល្លារ ។ លោកមើលការខុសត្រូវគ្រប់គ្រងកូនជាងឱ្យឆ្លាក់ថ្មគ្រប់ប្រភេទ ដោយពួកគេ ម្នាក់ៗក្នុងមួយថ្ងៃទទួលបានកម្រៃ៣៥០០០រៀល ។ ចំណែករូបលោកជួយឆ្លាក់ផងដែរ ។ លោកទទួលបានប្រាក់ខែ៤០០ដុល្លារ ត្រឹមតែគ្រប់គ្រាន់ចំណាយនៅក្នុងបន្ទុកគ្រួសារប៉ុណ្ណោះ បើឱ្យសល់យកទៅធ្វើមានបាននឹងគេនោះអត់សល់ទេ ។
លោកជីវ វីន អាយុ៤៨ឆ្នាំ រស់នៅភូមិសំណាករៀបរាប់ឱ្យដឹងថា លោកប្រកបមុខរបរចម្លាក់អស់រយៈកាលជាង១០ឆ្នាំមកហើយ ដោយពីដំបូងធ្វើតូចតាចគ្រាន់តែដោះស្រាយជីវភាពប៉ុណ្ណោះ រហូតមកដល់ឥឡូវនេះជីវភាពគ្រួសាររបស់លោកបានធូរធារសមរម្យ ។ លោកបានចងការប្រាក់គេទិញឡានស្ទូចមួយសម្រាប់ដឹកថ្ម ដើម្បីឱ្យមុខរបរប្រសើរឡើង ។ មុខរបរចម្លាក់ចំណាយដើមទុនច្រើនដែរ ហើយវាមិនងាយស្រួលទេ ដោយសារថ្មនៅភ្នំ ជិតៗក្នុងស្រុកមានដែរ តែជាប្រភេទថ្មមានលក្ខណៈផុយស្រួយ ងាយនឹងរបេះបែកមិនអាចយកឆ្លាក់បានទេ ។ ហេតុដូច្នេះហើយមានតែរត់ច្បាប់ទៅខេត្តព្រះវិហារទិញថ្ម ល្អៗ ក្នុងមួយជើងតម្លៃរត់ច្បាប់៤៥០ដុល្លារ បង់ក្បាលឡានមួយឡាន១៧ម៉ឺនរៀល និងបង់តាមផ្លូវក្នុង មួយកន្លែងៗខ្លះ១ម៉ឺន ខ្លះ២ម៉ឺន ៣ម៉ឺនរៀល កន្លែងខ្លះទៀតទារពី១០ទៅ១៥ដុល្លារ ។ ទម្រាំតែដឹកដល់កំពង់ធំត្រូវចំណាយអស់ច្រើន។
លោកជីវ វីន មិនមែនជាអ្នកឆ្លាក់ដោយខ្លួនឯងទេ គឺនៅពេលបានថ្មហើយជួលជាងឱ្យឆ្លាក់ ។ ជាយកឈ្នួលទៅតាមតម្លៃតូច ឬធំ ខ្ពស់ឬទាប មិនអាចកំណត់ថ្លៃបានទេ ដូចជារូបព្រះអង្គប្រក់នាគមួយកម្ពស់៣ម៉ែត្រ ជាងឆ្លាក់យកថ្លៃ១៣០០ដុល្លារ លក់វិញបានតម្លៃជាង៣០០០ដុល្លារ គិតទាំងការដឹកជញ្ជូនយកទៅដាក់រៀបឱ្យដល់កន្លែងតាមជិតតាមឆ្ងាយ ។ រូបចម្លាក់ដែលដាក់តាំងលក់មិនអាចកំណត់ថ្លៃបានទេ គឺលក់ទៅតាមតូចធំ និងទៅតាមប្រភេទថ្ម ចាប់ពីជាង១០ដុល្លារទៅ៥០ដុល្លារ និងដល់រាប់រយ រាប់ពាន់ដុល្លារក៏មាន។ រូបចម្លាក់ ធំៗ ទាល់តែរយៈពេលយូរទើបលក់បានមួយ មិនមែនលក់ដាច់រាល់ថ្ងៃទេ ។ ច្រើនតែលក់ដាច់ចម្លាក់ តូចៗ ដោយក្នុង មួយថ្ងៃៗអាចលក់បានប្រហែលពី២០០ទៅ៣០០រយដុល្លារអាចចំណេញប្រហែល៥០ដុល្លារដែរ ផាត់ថ្លៃម្ហូប និងចំណាយ ផ្សេងៗទៅនៅសល់ប្រហែលជា៥ម៉ឺនរៀលប៉ុណ្ណោះ ។លោកជីវ វីន បានសំណូមពរដល់អតិថិជនជិតឆ្ងាយជួយជាវរូបចម្លាក់របស់លោក ដែលជាស្នាដៃរចនារបស់ជាងខ្មែរ ប្រណីតៗតាមសេចក្តីត្រូវការ ដោយដាក់តាំងលម្អបានរាប់រយឆ្នាំឯណោះមិនងាយខូចទេ ៕
ចែករំលែកព័តមាននេះ