ខេត្តព្រៃវែង ៖ ក្រុមអ្នកចែកចាយថ្នាំញៀនប្រុសស្រីចំនួន៦នាក់ ព្រមទាំងវត្ថុតាងថ្នាំញៀន និងឧបករណ៍ប្រើប្រាស់មួយចំនួន ត្រូវបានកម្លាំងអាវុធហត្ថខេត្តព្រៃវែង ធ្វើការបង្ក្រាបបានជាបន្តបន្ទាប់ នៅក្នុងករណី២ផ្សេងគ្នា ។ លោកវរសេនីយត្រី…
ខេត្តព្រៃវែង ៖ ក្រុមអ្នកចែកចាយថ្នាំញៀនប្រុសស្រីចំនួន៦នាក់ ព្រមទាំងវត្ថុតាងថ្នាំញៀន និងឧបករណ៍ប្រើប្រាស់មួយចំនួន ត្រូវបានកម្លាំងអាវុធហត្ថខេត្តព្រៃវែង ធ្វើការបង្ក្រាបបានជាបន្តបន្ទាប់ នៅក្នុងករណី២ផ្សេងគ្នា ។
លោកវរសេនីយត្រី ផាត់ សុជោត ប្រធានមន្ទីរយុត្តិធម៌កងរាជអាវុធហត្ថខេត្តព្រៃវែង បានឲ្យដឹងថា ករណីទី១បានធ្វើឡើងកាលពីវេលាម៉ោង១១ព្រឹក ថ្ងៃទី២៧ ខែកុម្ភៈ ឆ្នាំ២០១៨ នៅលើកំណាត់ផ្លូវជាតិលេខ១ ក្នុងភូមិ១ ឃុំព្រែកខ្សាយ (ខ) ស្រុកពាមរក៌ ដោយប្រើប្រាស់វិធានញុះញង់ កម្លាំងអាវុធហត្ថខេត្តបានធ្វើការចាប់ឃាត់ខ្លួនជនសង្ស័យចំនួន២នាក់ ដែលបម្រុងធ្វើសកម្មភាពចែកចាយថ្នាំញៀននៅក្នុងតំបន់អ្នកលឿង ។
ជនសង្ស័យដែលត្រូវបានឃាត់ទាំង២នាក់ ទី១ឈ្មោះ ញុញ ញ៉ាញ់ ភេទប្រុស អាយុ២៣ឆ្នាំ មុខរបរកម្មករ និងទី២ឈ្មោះ នូ ណយ ភេទស្រី អាយុ៣០ឆ្នាំ មុខរបរកម្មករ អ្នកទាំង២មានទីលំនៅក្នុងភូមិវាលស្បូវ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ និងដកហូតបានវត្ថុតាងថ្នាំញៀនប្រភេទម្សៅក្រាមពណ៌ស ចំនួន២កញ្ចប់ ទំងន់៦.៧០ក្រាម ។
ករណីទី២ធ្វើឡើងនៅវេលាម៉ោង១០និង១៥នាទីព្រឹក ថ្ងៃទី២៨ ខែកុម្ភៈ ឆ្នាំ២០១៨ កម្លាំងអាវុធហត្ថខេត្តព្រៃវែងបានចាប់ឃាត់ខ្លួនជនសង្ស័យចំនួន២នាក់ នៅលើកំណាត់ផ្លូវជាតិលេខ១ ក្នុងភូមិសឹង្ហ ឃុំកំពង់សឹង្ហ ស្រុកព្រះស្តេច ខេត្តព្រៃវែង និងដកហូតបានវត្ថុតាងថ្នាំញៀន ប្រភេទម្សៅក្រាមពណ៌សចំនួន២កញ្ចប់ ។
ជនសង្ស័យទាំង២នាក់ក្នុងករណីទី២នេះ ទី១ឈ្មោះ ឆៅ ស្រីលក្ខ័ ភេទស្រី អាយុ២៤ឆ្នាំ មុខរបរកម្មករ និងទី២ឈ្មោះ សូត្រ សែន ភេទប្រុស អាយុ២២ឆ្នាំ មុខរបរមិនពិតប្រាកដ អ្នកទាំង២មានទីលំនៅក្នុងភូមិកោះកែរ ឃុំកោះកែរ ស្រុកល្វាឯម ខេត្តកណ្ដាល ។ ក្រោយពីត្រូវបានឃាត់ខ្លួន ជនសង្ស័យទាំង២នាក់បានឆ្លើយសារភាពថា ថ្នាំញៀនទាំងនេះពួកគេយកមកពីបក្ខពួកនៅឯរាជធានីភ្នំពេញ ហើយពួកគេធ្លាប់បានយកមកចែកចាយនៅខេត្តព្រៃវែងនេះ ច្រើនដងមកហើយ ។
លោក ផាត់ សុជោត បានបញ្ជាក់ថា យោងតាមចម្លើយសារភាពរបស់ជនសង្ស័យទាំង២ និងដោយមានការអនុញ្ញាតិពីលោកព្រះរាជអាជ្ញាខេត្តព្រៃវែង និងព្រះរាជអាជ្ញារាជធានីភ្នំពេញ ទើបកម្លាំងអាវុធហត្ថខេត្តព្រៃវែង សហការជាមួយកម្លាំងអាវុធហត្ថលើផ្ទៃប្រទេស និងអាវុធហត្ថរាជធានីភ្នំពេញ បានបន្តចុះទៅឆែកឆេរក្នុងបន្ទប់ជួលមួយកន្លែង ស្ថិតនៅក្នុងភូមិឫស្សីស្រស់ សង្កាត់និរោធ ខណ្ឌច្បារអំពៅ នៅវេលាម៉ោង០២និង៣០នាទីរសៀល ថ្ងៃទី២៨ ខែកុម្ភៈ និងបានរកឃើញវត្ថុតាងថ្នាំញៀន ប្រភេទម្សៅក្រាមពណ៌ស ចំនួន២កញ្ចប់ ជញ្ជីងថ្លឹងថ្នាំញៀនចំនួន១ និងថង់ច្រកថ្នាំមួយចំនួនធំ ព្រមទាំងឃាត់ខ្លួនជនសង្ស័យបានចំនួន២នាក់ ទី១ឈ្មោះ សែម ពេជ្របញ្ចរង្គ ហៅ ថៃ ភេទប្រុស អាយុ២៥ឆ្នាំ មុខរបរមិនពិតប្រាកដ និងទី២ឈ្មោះ ទា លីឆេង ហៅ ម៉ី ភេទស្រី អាយុ២៦ឆ្នាំ មុខរបរមិនពិតប្រាកដ អ្នកទាំង២មានទីលំនៅក្នុងបន្ទប់ជួលខាងលើ ។
បច្ចុប្បន្ននេះ ជនសង្ស័យព្រមទាំងវត្ថុតាងថ្នាំញៀន ក្នុងករណីទាំង២ខាងលើ ត្រូវបានឃាត់ខ្លួន និងរក្សាទុកនៅបញ្ជាការដ្ឋានកងរាជអាវុធហត្ថខេត្តព្រៃវែង ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត ចាត់ការទៅតាមនីតិវិធី ៕
ចែករំលែកព័តមាននេះ