រាជធានីភ្នំពេញ ៖ លំនៅឋានជនដៃដល់ជាខ្មាន់កាំភ្លើងបាញ់សម្លាប់គូស្នេហ៍នៅខណ្ឌសែនសុខ ដោយសារតែគំនុំស្នេហ៍ត្រីកោណ ត្រូវបានកម្លាំងនគរបាលតាមប្រមាញ់យ៉ាងប្រកិត និងឈានដល់ការឆែកឆេរលំនៅឋាន ព្រមទាំងដកហូតរថយន្តម៉ាក RANGE ROVER ពណ៌.ស ពាក់ផ្លាកលេខភ្នំពេញ២R-៦៩៦៧មួយគ្រឿង ដែលជនដៃដល់ជិះធ្វើសកម្មភាព ។ ទោះបីជាយ៉ាងណា ជនដៃដល់បានគេចខ្លួនពីផ្ទះបាត់ស្រមោលទៅហើយ ។
ការឆែកឆេរនេះ ធ្វើឡើងកាលពីវេលាម៉ោងប្រមាណ៩ព្រឹកថ្ងៃទី២៨ កុម្ភៈ នៅចំណុចផ្ទះលេខT៥៣A ក្នុងបុរីហ្គេនជ្រោយចង្វារក្នុងភូមិទី៣ សង្កាត់ជ្រោយចង្វារ ខណ្ឌជ្រោយចង្វារ ។ ជនដៃដល់ដែលសមត្ថកិច្ចកំពុងតែតាមចាប់ខ្លួន ត្រូវបានស្គាល់គឺឈ្មោះ ប៊ុន តេង ហៅហ្គោ អាយុ៣២ឆ្នាំ ជាមន្ត្រីយោធាភូមិភាគ៥ មានឋានន្តរសក្តិអនុសេនីយ៍ត្រី និងជាអ្នករកស៊ីនាំខោអាវពីប្រទេសថៃ មកបោះដុំនៅតាមផ្សារនានាក្នុងរាជធានីភ្នំពេញ ។ ជននេះ មានស្រុកកំណើតនៅភូមិប្រឡាយធំ ឃុំព្រៃញី ស្រុកសំពៅមាស ខេត្តពោធិ៍សាត់ មានប្រពន្ធឈ្មោះ ចាប វីលី អាយុ៣១ឆ្នាំនិងមានកូន២នាក់ ។ ការឈានទៅដល់ការកំណត់បានមុខសញ្ញា ខ្មាន់កាំភ្លើងនេះ គឺក្រោយមានការបាញ់ប្រហារជាច្រើនគ្រាប់ ផ្អើលទាំងវេលារំលងអធ្រាត្រថ្ងៃ២៦ កុម្ភៈ គឺត្រូវបានថតជាប់ដោយកាមេរ៉ាសុវត្ថិភាពពីរថយន្តRANGE ROVER ពណ៌.ស និងមានផ្លាកលេខយ៉ាងច្បាស់ ហើយក៏ត្រូវបានដឹងម្ចាស់រថយន្តនេះ តែងបានបញ្ជិះស្ត្រីរងគ្រោះមកផ្ទះជួលរបស់នាង តែក្រោយមក ប្រហែលជាស្នេហ៍បែកបាក់ នាងក៏មានស្នេហ៍ថ្មី ទើបជននេះគិតខ្លី ក៏តាមព្យាបាទដល់អាយុជីវិត ទីបំផុតខ្លួនឯងក៏បានក្លាយជាពិរុទ្ធជនបាត់បង់អ្វីៗទាំងអស់នាពេលនេះ ។
មន្ត្រីប៉ូលិសថា ជនដៃដល់បានជិះរថយន្តម៉ាក RANGE ROVER ពណ៌.ស ពាក់ផ្លាកលេខភ្នំពេញ២R-៦៩៦៧មួយគ្រឿង ប្រដាប់ដោយអាវុធខ្លី បានធ្វើសកម្មភាពបាញ់ប្រហារចំនួន៥គ្រាប់ ដើម្បីផ្តាច់ជីវិតគូស្នេហ៍នៅមុខផ្ទះ បណ្តាលឱ្យរងរបួសទាំង២នាក់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត ។ ហេតុការណ៍នេះ បង្កឱ្យមានការភ្ញាក់ផ្អើលកាលពីវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី២៦ កុម្ភៈ ត្រង់ចំណុចមុខផ្ទះជួលនៅតាមបណ្តោយផ្លូវ១៩៧៤ ក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។ បន្ទាប់ពីបាញ់សម្លាប់ហើយជនដៃដល់បានគេចខ្លួនបាត់ ។ ជនរងគ្រោះដែល ឃាតករតាមបាញ់សម្លាប់នេះ ១-ឈ្មោះ គង់ រ៉ាវិន ភេទប្រុស អាយុ៣០ឆ្នាំ មុខរបរលក់ដូរ ស្នាក់នៅផ្ទះលេខ៣៣កា ផ្លូវលំ ភូមិទួលថ្ងាន់ សង្កាត់ទួលសង្កែទី២ ខណ្ឌឬស្សីកែវ បានរងរបួសចំនួន៣គ្រាប់,២-ឈ្មោះ សឺង វិន ហៅស្រីលក្ខណ៍ ភេទស្រី អាយុ២៥ឆ្នាំ មុខរបេរលក់ខោអាវ និងខ្លះអះអាងថា នាងបម្រើការនៅហាងខារ៉ាអូខេមួយ ស្នាក់នៅផ្ទះជួលកន្លែងកើតហេតុខាងលើបានរងរបួសចំនួន២គ្រាប់ ។
ឃាតកម្មប៉ងផ្តាច់ជីវិតគូស្មេហ៍នេះ ខណៈពេលដែលជនរងគ្រោះទាំង២នាក់ជិះរថយន្តម៉ាកតូយូតា តាកូម៉ា ពណ៌ទឹកប្រាក់មួយគ្រឿង ពាក់ផ្លាកលេខភ្នំពេញ២Q-៥០៨១ធ្វើដំណើរមកពីដើរលេង ពេលមកដល់មុខផ្ទះត្រូវជនដៃដល់តាមបាញ់សម្លាប់តែម្តង ។ ភ្លាមៗ ត្រូវបានសមត្ថកិច្ចឱ្យដឹងថា ការតាមបាញ់ប្រហារនេះដោយសារតែគំនុំស្នេហាត្រីកោណ ព្រោះកន្លងមកនារីរងគ្រោះ ធ្លាប់មានទំនាក់ទំនងស្នេហាជាមួយជនដៃដល់ ។ លុះក្រោយមកនារីរងគ្រោះ ក៏មានទំនាក់ទំនងគ្នាជាមួយប្រុសផ្សេងទៀតដែលជាជនរងគ្រោះ ជាហេតុធ្វើឱ្យជនដៃដល់មានគំនុំតាមបាញ់សម្លាប់ចំនួន៥គ្រាប់ តែសំណាងល្អនាងនិងបុរសជាគូស្នេហ៍បានគេចផុតពីគ្រោះថ្នាក់ដល់អាយុជីវិតហើយ។
គិតត្រឹមរសៀលថ្ងៃ២៨ កុម្ភៈ ជនរងគ្រោះប្រុសស្រីទាំង២នាក់ ដែលត្រូវខ្មាន់កាំភ្លើង បើករថយន្តតាមបាញ់ប៉ងសម្លាប់នៅមុខផ្ទះ កាលពីយប់ថ្ងៃទី២៦ កុម្ភៈ នោះ ពេលនេះកំពុងសម្រាកព្យាបាលនៅមន្ទីរពេទ្យកាល់ម៉ែត ក្រោយពីធ្វើការវះកាត់រួចហើយ និងបន្តព្យាបាលដោយការលាងមុខរបួសផងដែរ ។ រវាងបុរសនិងស្រីដែលរងរបួស ត្រូវបានគេដឹងថា បុរសជាគូស្នេហ៍ធ្ងន់ជាងខាងស្រី តែសំណាងការបាញ់នោះមិនបានឆក់យកជីវិតពួកគេទាំង២ទេ ។
បន្ទាប់ពីមានឃាតកម្ម កម្លាំងនគរបាលព្រហ្មទណ្ឌកំរិតធ្ងន់នៃស្នងការដ្ឋាននគរបាលរាជធានីភ្នំពេញ បានសហការជាមួយកម្លាំងនគរបាលខណ្ឌសែនសុខ ធ្វើការស្រាវជ្រាវយ៉ាងសកម្ម ហើយឈានទៅកំណត់មុខសញ្ញាជនដៃដល់ និងបានទៅសហការជាមួយនគរបាលខណ្ឌជ្រោយចង្វារ ធ្វើការឡោមព័ទ្ធលំនៅឋានជនដៃដល់តាំងពីក្បាលព្រលប់ ។ លុះព្រឹកឡើង ក៏ធ្វើការឆែកឆេរដើម្បីឃាត់ខ្លួន តែត្រូវជនដៃដល់គេចខ្លួនបាត់នៅសល់តែរថយន្តដែលជិះធ្វើសកម្មភាពតែប៉ុណ្ណោះ ។ តាមស្ត្រីជាប្រពន្ធបានឱ្យសមត្ថកិច្ចដឹងថា ប្តីរបស់គាត់នេះបានគេចខ្លួនចេញពីផ្ទះ តាំងពីវេលាព្រឹកព្រលឹម ដែលសង្ស័យថា ទំនងជាដឹងខ្លួនមុន ព្រោះលំនៅឋានដែលស្នាក់នៅបានបំពាក់សុទ្ធតែកាមេរ៉ាសុវត្ថិភាពគេចទៅតាមផ្លូវក្រោយ ។
ទាក់ទិនរឿងរ៉ាវថា ប្តីបាញ់សម្លាប់គូស្នេហ៍នោះ ស្ត្រីជាប្រពន្ធពុំបានដឹងនោះទេ ។ បន្ទាប់ពីសមត្ថកិច្ចឆែកឆេរ និងកំណត់មុខសញ្ញាជនដៃដល់ សមត្ថកិច្ចក៏បានដកហូតរថយន្តដែលជិះធ្វើសកម្មភាព បញ្ជូនទៅកាន់អធិការដ្ឋានខណ្ឌសែនសុខ ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចេញដីកាតាមចាប់ខ្លួន ៕
ចែករំលែកព័តមាននេះ