រាជធានីភ្នំពេញ ៖ ពីរនាក់ប្តីប្រពន្ធជិះម៉ូតូរ៉ឺម៉កទៅទិញត្រីនៅច្រាំងចំរេះយកមកលក់នៅវិហារសួគ៌ ខណៈជិះដល់ពាក់កណ្តាលផ្លូវមិនទាន់ទាំងបានទិញត្រីផងត្រូវរថយន្តដឹកបន្លែបើកជែងរថយន្តមួយគ្រឿងទៀតអត់ផុតជ្រុលទៅបុកពីក្រោយម៉ូតូរ៉ឺម៉កដឹកត្រីពេញទំហឹងបណ្តាលឲ្យបុរសជាប្តីបែកក្បាលស្លាប់ ចំណែកប្រពន្ធប៉ើងទៅជាមួយរ៉ឺម៉កធ្លាក់ប្រឡាយតាមចិញ្ចើមផ្លូវរងរបួសធ្ងន់ ហេតុការណ៍នេះបានកើតឡើងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១ ខែមីនា ឆ្នាំ២០១៨ តាមបណ្តោយផ្លូវជាតិលេខ៦ នៅចំណុចស្ពានទី១២ ស្ថិតនៅក្នុងសង្កាត់បាក់ខែង ខណ្ឌជ្រោយចង្វារ ។
សពជនរងគ្រោះមានឈ្មោះ ហេង ប៉ុនធឿន ភេទប្រុស អាយុ៤០ឆ្នាំ មុខរបរអ្នកលក់ត្រីនៅវិហារសួគ៌ ស្នាក់នៅភូមិតាកែវ២ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ។
តាមប្រភពព័ត៌មានពីសាក្សីដែលឃើញហេតុការណ៍បានឱ្យដឹងថា មុនពេលកើតហេតុគេបានឃើញប្តីប្រពន្ធ២នាក់ជិះម៉ូតូរ៉ឺម៉កដឹកត្រីមកពីវិហារសួគ៌គោលបំណងទៅយកត្រីនៅឯយឿត្រីច្រាំងចំរេះក៏ធ្វើដំណើរមកតាមបណ្តោយផ្លូវជាតិលេខ៦ក្នុងទិសដៅពីជើងទៅត្បូងខណៈមកដល់ចំណុចកើតហេតុខាងលើមិនទាន់ទាំងបានទៅទិញត្រីផងក៏ស្រាប់តែមានរថយន្តបង្កម៉ាកសាំយ៉ុងមួយគ្រឿងពណ៌ស្លែ ពាក់ផ្លាកលេខ ភ្នំពេញ ២Z-៧៥៩១ ជាប្រភេទរថយន្តដឹកបន្លែបើកបរក្នុងទិសដៅស្របទិសគ្នាហើយរថយន្តបង្កបានបើកជែងរថយន្តមួយគ្រឿងទៀតមិនស្គាល់ម៉ាកក្នុងល្បឿនយ៉ាងលឿនក៏ជ្រុលទៅបុកគូទពីក្រោយរ៉ឺម៉កដឹកត្រីពេញទំហឹងបណ្តាលឱ្យបុរសជាប្តីដួលបោកក្បាលនឹងថ្នល់ស្លាប់ រីឯប្រពន្ធ និងម៉ូតូរ៉ឺម៉កដឹកត្រីផ្លោះហោះចូលទៅក្នុងប្រឡាយអត់មានទឹកនៅតាមចិញ្ចើមផ្លូវខ្ទាតចូលទៅក្នុងព្រៃរងរបួសធ្ងន់ ចំណែកឯរថយន្តបង្កវិញខូចខាតខ្ទេចមួយជំហៀងខាងស្តាំបានបើកទៅមុខប្រមាណ១០០ម៉ែត្រទើបឈប់រថយន្តទុកចោលហើយរត់គេចខ្លួនបាត់ស្រមោល ។
ក្រោយពេលកើតហេតុជនរងគ្រោះដែលរងរបួសធ្ងន់ត្រូវរថយន្តសង្គ្រោះដឹកយកទៅព្យាបាលនៅមន្ទីរពេទ្យកាល់ម៉ែត ។ សពជនរងគ្រោះត្រូវបានសាច់ញាតិដឹកយកទៅធ្វើបុណ្យទៅតាមប្រពៃណីនៅឯស្រុកកំណើត រីឯរថយន្តបង្ករួម និងរ៉ឺម៉កដឹកត្រីត្រូវបានសមត្ថកិច្ចវាស់វែងយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ