រាជធានីភ្នំពេញ ៖សមាគមភាពយន្តកម្ពុជាបានសម្រេចបោះឆ្នោតជ្រើសសមាសភាពដឹកនាំជាថ្មីថ្មី ហើយមានចាងហ្វាងផលិតកម្មមួយចំនួនចូលរួមឈរឈ្មោះ ។ ជាលទ្ធផលជាប់លោកឆាយ បូរ៉ា ជាប្រធាន និងលោកអ៊ិន សុភិនជាអនុប្រធាន ។…
រាជធានីភ្នំពេញ ៖សមាគមភាពយន្តកម្ពុជាបានសម្រេចបោះឆ្នោតជ្រើសសមាសភាពដឹកនាំជាថ្មីថ្មី ហើយមានចាងហ្វាងផលិតកម្មមួយចំនួនចូលរួមឈរឈ្មោះ ។ ជាលទ្ធផលជាប់លោកឆាយ បូរ៉ា ជាប្រធាន និងលោកអ៊ិន សុភិនជាអនុប្រធាន ។
បើទោះជាសមាគមភាពយន្តកម្ពុជា បានបោះឆ្នោតរួចហើយក្តី តែបានសម្រេចបោះឆ្នោតជាថ្មីកាលពីថ្ងៃទី២១ កុម្ភៈ ២០១៨ ។ ក្នុងពិធីបោះឆ្នោតមានការចូលរួមពីមន្ត្រីនាយកដ្ឋានភាពយន្ត មន្ត្រីក្រសួងវប្បធម៌ និងម្ចាស់ផលិតកម្មតូចធំជាច្រើន ។ ចាត់ទុកថា ជាការបោះឆ្នោតជ្រើសរើសក្បាលម៉ាស៊ីនអាណត្តិថ្មី ។
លោកអ៊ិន សុភិន ម្ចាស់ផលិតកម្មមហាហង្ស ត្រូវសមាជិកបោះឆ្នោតឱ្យធ្វើជាអនុប្រធាន ខណៈប្រធាននៅតែបានទៅលើលោកឆាយ បូរ៉ា ដដែល ។ សមាគមនឹងសម្រេចរៀបចំកម្មវិធីធំមួយក្នុងពេលដ៏ខ្លីខាងមុខដើម្បីប្រកាសឱ្យដឹងពីសមាសភាពដែលទើបជាប់ឆ្នោតនោះ ។
យោងតាមការប្រកាសរបស់សមាគមភាពយន្តកម្ពុជាថា ការបោះឆ្នោតផ្លូវការជាថ្មីបានរកឃើញក្បាលម៉ាស៊ីន៣រូបសម្រាប់អាណត្តិថ្មី ដោយលោកឆាយ បូរ៉ា ជាប់ជាប្រធាន លោកអ៊ិន សុភិន ជាប់ជាអនុប្រធាន និងលោកសែម វិសាល ម្ចាស់ផលិតកម្ម Wonderfilm Cambodia ជាអគ្គលេខាធិការ ។ នេះជាគឺតំណែងមិនធ្លាប់ទទួលបានរបស់អ្នកទាំងពីរនៅក្នុងសមាគមមួយនេះ ។
ក្រៅពីថ្នាក់ដឹកនាំទាំង៣ សមាសភាព២រូបទៀតគឺ លោក Millan Lov និងលោកព្រហ្ម សិលា ត្រូវបានបោះឆ្នោតតែងតាំងជាសមាជិកសកម្មរបស់សមាគម ។
លោកស៊ិន ចន្ទសាយ៉ា ទីប្រឹក្សាក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលសមាគមភាពយន្តកម្ពុជា បានហៅការបោះឆ្នោតនេះថា ជាការជ្រើសរើសថ្នាក់នាំសមាគមប្រកបដោយឆន្ទៈរបស់ផលិតករ ដោយលោករំពឹងថាក្បាលម៉ាស៊ីនដែលទើបជាប់ឆ្នោត ពិតជាធ្វើឱ្យមានផលប្រយោជន៍ពេញទំហឹង សម្រាប់វិស័យផលិតភាពយន្តទាំងមូល ។
លោកអ៊ិន សុភិន ដែលបានជាប់ឆ្នោតជាអនុប្រធានសមាគម អះអាងថា ក្រោមការបោះឆ្នោតឱ្យលោកទទួលបានតំណែងនៅក្នុងសមាគមមួយនេះ លោកនឹងរួមចំណែកដឹកនាំសមាគមឱ្យមានការរីកចម្រើន ជាពិសេសគឺការលើកស្ទួយវិស័យភាពយន្តនៅកម្ពុជា ដើម្បីឱ្យមានគុណភាព និងមានការរីកចម្រើន។ ក្នុងនោះលោកក៏ត្រៀមបណ្ដុះឯកទេសដល់ផលិតករជំនាន់ក្រោយ ដើម្បីផលិតករដែលជ្រកក្រោមសមាគមហើយចង់ផលិតភាពយន្ត មានលទ្ធភាព និងសមត្ថភាពគ្រប់គ្រាន់ក្នុងការប្រកួតប្រជែង ។ ក្បាលម៉ាស៊ីនដែលបានជាប់ឆ្នោតទាំងអស់នឹងរួមដៃគ្នាធ្វើឱ្យផលិតករនៅក្នុងប្រទេសកម្ពុជា កាន់តែផ្ដល់ប្រយោជន៍ឲ្យគ្នា និងធ្វើឱ្យវិស័យភាពយន្តទាំងរឿងសម្រាប់រោងកុន និងរឿងភាគទូរទស្សន៍មានការឈានឡើង ។
លោកអ៊ិន សុភិន ឲ្យដឹងថា សមាគមមានគម្រោងរៀបចំកម្មវិធីសមោសរធំមួយ ដើម្បីប្រកាសឱ្យតារាសម្តែង និងមហាជនបានដឹងពីសមាសភាពប្រធាន អនុប្រធាន និងអគ្គលេខាក្នុងអាណត្តិថ្មីក្នុងពេលដ៏ខ្លីខាងមុខ ដើម្បីឲ្យថ្នាក់ដឹកនាំទើបជាប់ឆ្នោតទាំងនោះបានបង្ហាញពីការតាំងចិត្ត និងយុទ្ធសាស្ត្រដែលកំណត់ ៕
ចែករំលែកព័តមាននេះ