រាជធានីភ្នំពេញ ៖ អ្នករកស៊ីទិញលក់ទំនិញទិញចូល-លក់ចេញគ្រប់ប្រភេទ ត្រូវបានកម្លាំងសមត្ថកិច្ចនគរបាលព្រហ្មទណ្ឌកម្រិតស្រាលក្រសួងមហាផ្ទៃ ឃាត់ខ្លួនបញ្ជូនទៅកាន់សាលាដំបូងរាជធានីភ្នំពេញ កាលពីថ្ងៃទី២២ ខែកុម្ភៈ ឆ្នាំ ២០១៨ ពាក់ព័ន្ធចេញមូលបទានប័ត្រគ្មានសាច់ប្រាក់ចំនួន៣០.២១១ដុល្លារអាមេរិក ។
ជនសង្ស័យ ទា ប៊ុនថែន ភេទប្រុស អាយុ៣៩ឆ្នាំ ទីលំនៅភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
តាមសមត្ថកិច្ចនគរបាលព្រហ្មទណ្ឌបានឲ្យដឹងថា ជនសង្ស័យត្រូវបានជនរងគ្រោះចាប់មកប្រគល់ឲ្យសមត្ថកិច្ចជួយចាត់ការតាមផ្លូវ រឿងចេញសែកស្អុយចំនួន៣០.២១១ដុល្លារអាមេរិក ។ ដើមបណ្តឹងក្នុងសំណុំរឿងនេះមានឈ្មោះ ញ៉េប ហួយ ភេទស្រី អាយុ៥៦ឆ្នាំ អ្នកលក់ដូរនៅផ្សារអូឡាំពិក ។ ពាក្យបណ្តឹងបានបញ្ជាក់ថា កាលពីថ្ងៃទី១២ ខែកុម្ភៈ ឆ្នាំ២០១៨ ឈ្មោះ ទា ប៊ុនថែន និងប្រពន្ធបានទំនាក់ទំនទិញទឹកដោះគោពីឈ្មោះ ញ៉េប ហួយ ចំនួន៤ពាន់កេស ដើម្បីយកទៅលក់តាមទីផ្សារក្នុងរដូវចូលឆ្នាំចិននេះ ដែលទឹកដោះគោ៤ពាន់កេសនោះ គិតជាប្រាក់ស្មើនឹង៣០.២១១ដុល្លារអាមេរិក ។
បន្ទាប់ពីឈ្មោះ ទា ប៊ុនថែន បានយកទឹកដោះគោនោះដឹកដាក់រថយន្តទៅ ទា ប៊ុនថែន បានចេញមូលបទានប័ត្រមួយសន្លឹក លេខ ៤៤៣៩២៤ ដែលមានទឹកប្រាក់៣០.២១១ដុល្លារអាមេរិក ឲ្យទៅ ចែ ញ៉េប ហួយ ដើម្បីយកទៅបើកប្រាក់នោះ នៅធនាគារកំណត់ថ្ងៃទី១៧ ខែកុម្ភៈ ឆ្នាំ២០១៨ ។ លុះដល់ថ្ងៃកំណត់ជនរងគ្រោះបានយកសែកនោះទៅបើកយកប្រាក់ពីការលក់ទឹកដោះគោ៤ពាន់កេស ស្រាប់តែធនគារបញ្ជាក់ថា ជាសែកស្អុយអត់មានសាច់ប្រាក់ទេ ។
សមត្ថកិច្ចបន្តថា ក្រោយពេលចប់ចូលឆ្នាំចិន ចែ ហួយ បានទាក់ទងទៅលោក ទា ប៊ុនថែន ដើម្បីឲ្យមកជួបគ្នា និងយកប្រាក់មកទូទាត់ថ្លៃទឹកគោនោះវិញ ព្រោះសែកលោក ទា ប៊ុនថែន អត់សាច់ប្រាក់១រៀល ។ ចែ ហួយ បានទាក់ទងទៅលោក ទា ប៊ុនថែន ច្រើនលើកច្រើនសារ តែត្រូវលោក ទា ប៊ុនថែន គេចវេសមិនព្រមទៅជួប ដូច្នោះហើយទើបអ្នកស្រី ញ៉េប ហួយ សម្រេចិត្តដាក់ពាក្យបណ្តឹងទៅសមត្ថកិច្ចនគរបាលព្រហ្មទណ្ឌកម្រិតស្រាលក្រសួងមហាផ្ទៃ ដើម្បីឲ្យជួយចាត់ការតាមផ្លូវច្បាប់ ។
ក្រោយពេលដាក់ពាក្យបណ្តឹងទៅសមត្ថកិច្ចហើយ នៅថ្ងៃទី២២ ខែកុម្ភៈនេះ ដើមបណ្តឹងបានឃើញឈ្មោះ ទា ប៊ុនថែន នៅចំណុចមុខមជ្ឍមណ្ឌលរ៉ុក សង្កាត់ទន្លេរបាសាក់ ខណ្ឌចំការមន រាជធានីភ្នំពេញ ក៏បាននាំខ្លួនអ្នកចេញសែកស្អុយនោះ ប្រគល់ជូនសមត្ថកិច្ចចាត់ការតាមនីតិវិធី ។
ជនសង្ស័យក៏បានទទួលស្គាល់ថា ខ្លួនពិតជាបានទិញទឹកដោះគោ៤ពាន់កេសពីអ្នកស្រី ញ៉េប ហួយ និងបានចេញសែក១សន្លឹកដោយគ្មានទឹកប្រាក់មែន ។ ប៉ុន្តែមិនបានគេចវេស និងបំណុលនេះទេ កំពុងដើរប្រមូលប្រាក់យកមកសង ដើមបណ្តឹងវិញ គ្រាន់ថា មិនទាន់បានគ្រាប់ចំនួន ដោយសារម៉ូយជំពាក់តគ្នា ។
យ៉ាងណាក្តីជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ កាលពីរសៀលថ្ងៃទី២៣ ខែកុម្ភៈនេះ តាមពាក្យបណ្តឹងរបស់អ្នកស្រី ញ៉េប ហួយ នោះហើយ ៕
ចែករំលែកព័តមាននេះ