ខេត្តស្ទឹងត្រែង ៖ សម្លេងផ្ទុះអាវុធនឹងលាន់ឮឡើងនៅខ្សែបន្ទាត់ព្រំដែលកម្ពុជា-ឡាវចំណុចអូរអាល័យ ភូមិសាស្ត្រឃុំសន្តិភាព ស្រុកសៀមប៉ាង ខេត្តស្ទឹងត្រែង នាថ្ងៃទី២៦ ខែកុម្ភៈ ឆ្នាំ២០១៨ ខាងមុខ នេះបើតាមការជូនដំណឹងរបស់យោធភូមិភាគទី១ កងពលតូចអន្តរាគមន៍លេខ១២៨ ក្នុងវគ្គហ្វឹកហ្វឺនបាញ់គ្រាប់ពិត ។
ក្នុងការជូនដំណឹងរបស់យោធភូមិភាគទី១កងពលតូចអន្តរាគមន៍លេខ១២៨បានបញ្ជាក់ថា នៅថ្ងៃទី២៦ ខែកុម្ភៈ ឆ្នាំ២០១៨ ខាងមុខនឹងមានការហាត់បាញ់គ្រាប់ពិតកាំភ្លើងត្បាល១០០មីលីម៉ែត្រ, ៨២មីលីម៉ែត្រ និង៦០មីលីម៉ែត្រ របស់វគ្គហ្វឹកហ្វឺនបំប៉នជំនាញអាវុធគាំទ្រកងពលតូចអន្តរាគមន៍លេខ១២៨ទីលានបាញ់គ្រាប់ពិតស្ថិតនៅភូមិសាស្ត្រឃុំសន្តិភាព ស្រុកសៀមប៉ាង ខេត្តស្ទឹងត្រែង ផ្លូវក្រវ៉ាត់ព្រំដែនថ្មីព្រំដែនកម្ពុជា-ឡាវ(អូរអាឡៃ)ចំណុចកម្ពស់ភ្នំ៣០០F-XA(៦៤៤២៨-៩៧០០០)M-XA(៦៤១០០-៩៥៥០០)រយៈពេលពេញ១ថ្ងៃ ។
ដូច្នេះប្រជាពលរដ្ឋនៅតាមខេត្តស្ទឹងត្រែងពិសេសប្រជាពលរដ្ឋនៅតាមស្រុកជាប់ព្រំដែលកម្ពុជា-ឡាវគប្បីកុំមានការភិតភ័យ និងភ្ញាក់ផ្អើល ព្រោះពុំមានអ្វីកើតឡើងគួរឱ្យបារម្ភណ៍នោះឡើយដោយនេះគ្រាន់ជាសកម្មភាពដែលកងទ័ពត្រូវហ្វឹកហ្វឺនបំប៉នជំនាញបន្ថែមដើម្បីពង្រឹងកងកម្លាំងនៅក្នុងកងពលតូចអន្តរាគមន៍លេខ១២៨ប៉ុណ្ណោះ ៕
ចែករំលែកព័តមាននេះ