ខេត្តស្វាយរៀង ៖ អ្នកលក់ដូរនៅខាងមុខរោងចក្រគ្មានសណ្តាប់ធ្នាប់ធ្វើឲ្យកកស្ទះចរាចរណ៍រាល់ថ្ងៃដោយសារក្រុមអ្នកលក់ដូរចំណីអាហារដើរ និងរត់ឆ្លងកាត់ផ្លូវដណ្តើមម៉ូយប្រសាច រីឯអ្នកបើកបររថយន្តឈប់រថយន្តកណ្តាលថ្នល់ និងចតបីជួរគ្មានការគោរពច្បាប់ចរាចរណ៍ឡើយ ។
បើតាមសមត្ថកិច្ចនគបាលដែលធ្វើចរាចរណ៍នៅខាងមុខរោងចក្របានឲ្យដឹងថា ការកកស្ទះចរាចរណ៍នេះគឺកើតឡើងជារៀងរាល់ថ្ងៃ ពេលព្រឹកចាប់ពីម៉ោង៦ដល់ម៉ោង៧និង០០នាទីព្រឹក ហើយពេលល្ងាចចាប់ពី៤និង៣០នាទីដល់ម៉ោង៥ល្ងាចដែលជាម៉ោងកម្មករ-កម្មការិនីរោងចក្រចូលធ្វើការ និងពេលចេញពីធ្វើការ ។
គេសង្កេតឃើញមានអ្នកលក់ដូរនំចំណីអាហារមួយចំនួនធំគឺយកចិញ្ចើមថ្នល់ដាក់តុដាក់គ្រែជាដើមដើម្បីតាំងលក់នំចំណីម្ហូបអាហារ និងបន្លែផ្លែឈើលក់យ៉ាងសប្បាយចិត្តហើយមានភាពរញ៉េរញ៉ៃខ្លាំងបើទោះបីជាមានរថយន្តតូចធំធ្វើដំណើរច្រើនគឺត្រូវបើកចៀសគ្នាស្ទើរធ្លាក់ផ្លូវក៏ដោយ ។
ជារឿយៗគេសង្កេតឃើញមានសមត្ថកិច្ចចុះសម្រួលចរាចរណ៍នៅមុខតំបន់សេដ្ឋកិច្ចពិសេស សានតុងសាន់សែល និងនៅមុខតំបន់សេដ្ឋកិច្ចពិសេស តាយសេង ប៉ុន្តែពុំដែលឃើញមានសមត្ថកិច្ចចុះអប់រំ ឬហាមឃាត់ក្រុមអ្នកលក់ដូរចល័តនោះទេ ។
ប្រជាពលរដ្ឋធ្វើដំណើរតាមផ្លូវជាតិលេខ១នេះសូមសំណូមពរដល់សមត្ថកិច្ចក៏ដូចជាអាជ្ញាធរដែលមានការពាក់ព័ន្ធមេត្តាចុះធ្វើការអប់រំដល់ក្រុមអ្នកលក់ដូរទាំងអស់ផង ពីព្រោះធ្វើដណើរទៅតាមផ្លូវនេះម្តងៗកកស្ទះខ្លាំងណាស់ទម្រាំដល់ក្រុងបាវិតហើយពេលមកវិញនោះត្រូវរងចាំទាល់តែរថយន្តដឹកកម្មករ-កម្មការិនីរោងចក្រទៅអស់ទើបអាចមកខេត្តវិញបានបើមិនដូច្នេះគឺរងចាំការកកស្ទះរាប់ម៉ោងទើបចេញរួច ៕
ចែករំលែកព័តមាននេះ