រាជធានីភ្នំពេញ ៖ រថយន្តម៉ាកហ៊ីយ៉ាន់ដាយដឹកក្រដាស់ឡាំងអេតចាយ១គ្រឿងបានបើកបរក្នុងល្បឿនលឿនជែងរថយន្តម៉ាកFUSO ដឹកកុងតឺន័រ១គ្រឿងទៀត ប៉ុន្តែជែងមិនផុតបានកៀរបណ្ដាលឲ្យបែកកញ្ចក់មើលក្រោយអស់១ចំហៀង ។ ប៉ុន្តែអ្នកបើកបររថយន្តដឹកអេតចាយមិនបានឈប់ដើម្បីដោះស្រាយគ្នាសិនទេបែរជាបើករត់ ហើយក៏ត្រូវបានរថយន្តកុងតឺន័របើកដេញតាមលឿនដូចក្នុងរឿង ។
ពេលនោះបានបង្កឲ្យមានការភ្ញាក់ផ្អើលយ៉ាងខ្លាំងហើយប្រជាពលរដ្ឋរស់នៅតាមដងផ្លូវបាននាំគ្នាចេញមើល និងខឹងសម្បារគ្រប់ៗគ្នាព្រោះតែអ្នកបើកបររថយន្តទាំងនេះព្រហើនមិនខ្លាចស្លាប់ និងមិនគិតពីសុវត្ថិភាពដល់អ្នកដំណើរតាមផ្លូវឡើយ ។ រថយន្តទាំង២គ្រឿងនេះបានបើកដេញគ្នាបង្កឲ្យមានការភ្ញាក់ផ្អើលកាលពីវេលាម៉ោង៨យប់ថ្ងៃទី២០ ខែកុម្ភៈ ឆ្នាំ២០១៨ នៅតាមផ្លូវបេតុងត្រង់ចំណុចរង្វង់មូលផ្សារសាមគ្គី ស្ថិតនៅមុខទីស្នាក់ការគណបក្សប្រជាជានកម្ពុជា សង្កាត់ត្រពាំងក្រសាំង ក្នុងភូមិសាមគ្គី១ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
នគរបាលបានឲ្យដឹងថា រថយន្តដឹកអេតចាយម៉ាកហ៊ីយ៉ាន់ដាយ ពណ៍ស ពាក់ស្លាកលេខ ភ្នំពេញ ៣D-៥៦៦២ បើកបរដោយយុវជនម្នាក់ឈ្មោះ សន សៀងហៃ អាយុ២៥ មានទីលំនៅក្នុងភូមិសូយោង ឃុំសូងយោង ស្រុកបារាយណ៏ ខេត្តកំពង់ធំ ។ រថយន្តនេះបានបើកកៀររថយន្តម៉ាក FUSO ពណ៍ទឹកប្រាក់ក្បាល ពាក់ស្លាកលេខ ចង្កូតស្ដាំ PSHN-០២៦៨ និងកន្ទុយរ៉ឺម៉កដឹកកុងតឺន័រពាក់ស្លាកលេខ ព្រះសីហនុ ៤A-២៦៤១ បើកបរដោយយុវជនមិនស្គាល់ឈ្មោះម្នាក់ ។
យុវជនដែលជាអ្នកបើករថយន្តបង្កបានឲ្យដឹងថា នៅមុនពេលកើតហេតុខ្លួនបានបើកបររថយន្តដឹកអេតចាយចេញពីខេត្តកំពង់ធំ ដើម្បីយកមកលក់នៅស្ដង់លក់ និងទិញអេតចាយមួយកន្លែង ស្ថិតនៅក្នុងភូមិត្រពាំងអណ្ដូង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នពេញ ដោយពេលនោះបើកតាមផ្លូវអូរដឹមកប់ស្រូវលុះពេលទៅដល់ត្រង់ចំណុចផ្លូវរថភ្លើងខ្សែភ្នំពេញ-កំពត ឆ្លងកាត់ស្ថិតនៅក្នុងភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ បានជែងរថយន្តដឹកកុងតឺន័រ១គ្រឿងនោះហើយមិនមែនរថយន្ត និងរថយន្តកៀរគ្នាទេ គឺខ្សែចងក្រដាសអេតចាយបានទាក់ជាមួយកញ្ចក់រថយន្តកុងតឺន័របណ្ដាលឲ្យបាក់ ។
ខណៈនោះដោយសារតែមានការភ័យខ្លាចទើបបើករត់ចូលតាមផ្លូវបេតុងក្នុងបំណងចូលទៅឈប់នៅកន្លែងលក់អេតចាយ ។ លុះពេលទៅដល់ត្រង់ចំណុចរង្វង់មូលផ្សារសាមគ្គីត្រូវបានរថយន្តកុងតឺន័របើកស្ទាក់មុខទើបខ្លួនឈប់ និងដោះស្រាយគ្នាដោយខ្លួនព្រមចេញសំណងចំនួន៤០០ដុល្លារទៅឲ្យខាងគាគីរថយន្តកុងតឺន័រ ។ ប៉ុន្តែពេលនោះអ្នកបើករថយន្តកុងតឺន័រអត់ព្រមយកលុយទេដោយទាមទារឲ្យទិញកញ្ចក់ថ្មីដាក់ឲ្យវិញហើយក្រោយមកត្រូវបាននគរបាលនាំយករថយន្តទៅរក្សាទុកនៅប៉ុស្ដិ៍តែម្ដង ។
ប្រជាពលរដ្ឋបាននិយាយថា ពួកគាត់គឺជាអ្នកទទូចឲ្យនគរបាលនាំយករថយន្តទាំង២គ្រឿងនេះទៅរក្សាទុកនៅប៉ុស្ដិ៍ដើម្បីណែនាំនិងដាក់ពិន័យចំពោះអ្នកបើកបរឲ្យបានតឹងរ៉ឹងបន្តិច ។ ព្រោះពួកគេព្រហើនខ្លាំងណាស់បើកដេញគ្នាដូចរឿងភាគចិនហុងកុង ឬរឿងអាមេរិកាំងអញ្ចឹង ពួកគេបានបើកលឿនដូចព្យុះបង្កឲ្យលាន់ឮសម្លេងគួរឲ្យខ្លាច ។ ដោយមិនបានគិតពីគ្រោះថ្នាក់ដល់អ្នកដ៏ទៃឡើយ នៅក្នុងពេលនោះពួកគាត់មានការភ័យខ្លាចខ្លាំងណាស់ ហើយសំណាងណាស់ ដែលនៅពេលនោះអត់មានមនុស្សធ្វើដំណើរតាមផ្លូវខាងលើដូចរាល់ថ្ងៃបើមានវិញប្រាកដជាមានអ្នកស្លាប់មិនខានឡើយ ។
នគរបាលបានឲ្យដឹងថា នៅក្នុងយប់នោះប្រជាពលរដ្ឋបានប្រតិកម្មខ្លាំងណាស់ពួកគាត់រាប់រយនាក់បាននាំគ្នាចេញមកឡោមព័ទ្ធរថយន្តទាំង២គ្រឿងនេះមិនឲ្យទៅណាក្រៅតែពីការនាំយកទៅកាន់ប៉ុស្ដិ៍ដើម្បីដាក់ពិន័យឡើយ ៕
ចែករំលែកព័តមាននេះ